أكلات سريعة | طريقة عمل الشيش طاووق بالتفصيل في 10 خطوات فقط
طبعا كلنا بنحب الاكلات السريعة وبالذات اكلات
المحلات اللي بنشتريها من برة زي كريب شاورما الفراخ وفاهيتا الفراخ والبرجر والشيش طاووق 🍢، لكن
لو جربنا نعمل اكلات المحلات دي في البيت بطريقتها الصحيحة طبعا هتكون أجمل بكتير
من اكلات المحلات وكمان هتكون انضف بكتير ومضمونة 100% عشان هتكون معمولة بأدينا
وتحت عنينا، وهو ده طبعا الأفضل لصحة أولادنا.
ناس من متابعينا طلبوا مننا طريقة عمل الشيش
طاووق، عشان كده قررنا نكمل سلسلة اكلات سريعة ونوضح لكم طريقة عمل الشيش طاووق
بكل تفاصيلها خطوة بخطوة، يلا بينا دلوقتي نخش على مكونات الشيش طاووق وطريقة عمل
الشيش طاووق👇👇.
ملحوظة مهمة: في ناس بتحب تعمل الشيش طاووق بصدور الفراخ، وفي ناس بتحب تعمله بوراك الفراخ، وفي ناس تانيين بيحبوا يعملوا الشيش طاووق باللحمة، لازم نعرف ان طريقة عمل الشيش طاووق واحدة سواء هنعملها باللحمة او صدور الفراخ او وراك الفراخ، يعني مفيش فرق في التتبيلة ولا في الخطوات.
مكونات ومقادير الشيش طاووق:
- 1 كيلو من وراك أو صدورالفراخ المخلية أو لحمة، (الصنف حسب الرغبة).
- حباية بصل.
- قرن فلفل اخضر حلو.
- قرن فلفل احمر حلو.
- قرن فلفل اصفر حلو.
- عصيان أو أعواد الشيش طاووق (sticks).
مكونات تتبيلة الشيش طاووق:
- ربع كباية خل.
- ربع كباية زيت.
- معلقة كبيرة من الكاتشب.
- برتقالة بلدي واحدة معصورة. (اختياري)
بهارات تتبيلة الشيش طاووق:
- معلقة كبيرة زعتر.
- معلقة كبيرة بصل بودرة.
- معلقة صغيرة من بهارات اللحمة (السبع بهارات).
- معلقة صغيرة ملح.
- معلقة صغيرة فلفل اسود.
- معلقة صغيرة بصل بودرة.
خطوات طريقة عمل الشيش طاووق:
1.
اول حاجة هنعملها هي اننا هنبدأ ننضف الفراخ كويس
جدا ونشيل من عليها الجلد وكمان نخليها من العضم، وبعد كده هنبدأ نقطع الفراخ على
شكل مكعبات، او مربعات.
2.
بعد كده هنجيب البصلة والفلفل الأخضر والاحمر
والالصفر ونبدأ نعسلهم كويس جدا، وبعدين نبدأ ننضفهم من البزر وبعد كده نبدأ
نقطعهم على شكل مربعات، ونسيبهم على جنب دلوقتي.
3.
دلوقتي هنعمل تتبيلة الشيش طاووق، كل اللي هنعمله
اننا هنجيب بولة او أي وعاء غويط وكبير ونحط فيه كل مكونات وبهارات تتبيلة الشيش
طاووق اللي جهزناها واللي هي (ربع كباية خل، ربع كباية زيت، معلقة كبيرة من
الكاتشب، برتقالة بلدي واحدة معصورة، معلقة كبيرة زعتر، معلقة كبيرة بصل بودرة، معلقة
صغيرة من بهارات اللحمة "السبع بهارات"، معلقة صغيرة ملح، معلقة صغيرة
فلفل اسود، معلقة صغيرة بصل بودرة).
4.
بعد ما نحط كل المكونات دي مع بعضها هنبدأ نقلبها
كويس جدا مع بعض بالمعلقة او بالمضرب اليدوي، ولازم نضربهم لحاد ما نتأكد ان كل
المكونات امتزجت كويس جدا ببعضها، وبكده تكون تتبيلة الشيش طاووق جاهزة.
5.
بعد كده هنضييف كل قطع الفراخ اللي قطعناها على
شكل مكعبات لتتبيلة الشيش طاووق، ونقلب قطع الفراخ كويس جدا في التتبيلة، وبعد كده
نسيب قطع الفراخ في التتبيلة لمدة متقلش عن 3 ساعات، وطبعا كلما زادت مدة قطع
الفراخ في التتبيلة كلما كان الطعم أجمل، (يفضل لو تركنا الفراخ في التتبيلة لمدة
ليلة كاملة).
6. بعد ما
تبلنا الفراخ مدة كافية، هنبدأ نجيب مكونات الشيش طاووق اللي جهزناها اللي هي
الفلفل الأخضر والاحمر والاصقر والبصلة اللي قطعناهم مربعات، وكمان هنجيب مكعبات
الفراخ اللي تبلناها، وكمان هنجيب اعواد الشيش طاووق(sticks)، وهنبدأ
نحط مكونات الشيش طاووق على الاعواد بالشكل ده 👇.
رصة عود الشيش طاووق= (قطعة بصل وفلفل+ قطعة فراخ) + (قطعة بصل وفلفل+ قطعة فراخ) + (قطعة بصل وفلفل+ قطعة فراخ) + قطعة بصل وفلفل
7.
طبعا هنعمل كل كمية الفراخ اللي معانا بالشكل ده👆، وبعد ما
نخلص رص كل الكمية هنبدأ في تسوية الشيش طاووق، وفي الخطوة دي يا اما هنسوي الشيش
طاووق على الفحم، يا اما هنسويه على البوتاجاز.
8.
تسوية
الشيش طاووق على الفحم بتكون سهلة جدا كل اللي هتعمله إنك هترص اعواد
الشيش طاووق جنب بعضها على شبكة معدنية فوق الفحم بشوية عشان النار متحرقش الاعواد
الخشبية، وبعد
كده هتبدأ تقلب اعواد الشيش طاووق على كل جوانبها لحاد ما تستوي من كل الجوانب.
9.
وبالنسبة لتسوية الشيش طاووق على
البوتاجاز،
هنجيب طاسة او جريل تيفال او جرانيت (عشان الشيش طاووق ميلزقش فيها)، وهنحط في
الطاسة معلقة زيت كبيرة، وبعد ما الزيت يسخن هنبدأ نرص اعواد الشيش طاووق جنب
بعضها في الطاسة، وطبعا مننساش اننا نقلبهم كل شوية على كل الجوانب عشان الشيش
طاووق يستوي من كل ناحية.
10. هنسوي
كل اعواد الشيش طاووق اللي جهزناها من كل الجوانب سواء على الفحم او على البوتاجاز
وبكده يكون الشيش طاووق جاهز للتقديم، وطبعا ممكن نقدم الشيش طاووق مع شوية رز
اصفر مفلفل او رز صيادية، وكمان ممكن ناكلة بالعيش والطحينة وممكن كمان نعمله
سندويتشات.
بعد ما وضحنا لكم طريقة عمل الشيش طاووق، نتمنا
انها تكون عجبتكم ووضحت لكم كل التفاصيل اللي محتاجينها عن الشيش طاووق، وياريت
طبعا لو في عندكم أي استفسارات أو أي حاجة غير واضحة في طريقة عمل الشيش طاووق، او
في طريقة عمل أي اكلة تانية، تكتبولنا استفساراتكم وملاحظاتكم وآراءكم في
التعليقات تحت 👇.
أو ممكن بردوا تبعتوهالنا
في رساسل على صفحتنا في الفيس بوك واحنا هنرد عليكم في أسرع وقت، ولو كان عندكم أي اكلة
او وصفة مش عارفين تعملوها وحابين انكم تعرفوا طريقتها بالتفصيل قولولنا على اسمها
في التعليقات او في الرسايل واحنا هنجهزهالكم ونبعتهالكم في أسرع وقت، جربوا طريقة
عمل الشيش طاووق بتاعتنا، بألف هنا وشفا، ودمتم في صحة.