اعرفي طريقة عمل البرجر الأصلي المضمون 100%

اعرفي طريقة عمل البرجر الأصلي المضمون 100%

طريقة عمل البرجر من اكتر الوصفات اللي بتطلب مننا، ناس كتير جدا بيكونو عاوزين يعرفوا طريقة عمل البرجر في البيت لأنهم طبعا مش ضامنين البرجر من برة، وده طبعًا لان اغلبية الناس اللي بيحبوا البرجر بتكون من الأطفال والشباب، وعشان نحافظ على صحة ولادنا فكرنا اننا نعملهم كل الاكلات اللي بيحبوها في البيت وتكون كمان طعمها احلي بكتير من اللي في المطاعم.

طريقة عمل الهمبرجر سهلة جدا والمميز فيها طبعا ان تكاليفها قليلة جدا ومتتقارنش ابدا مع تكاليف برجر المحلات، عشان كده لو اتعلمنا طريقة عمل البرجر في البيت هنوفر كتير جدا وفي نفس الوقت هنحافظ على صحتنا وصحة بيتنا واولادنا، طريقة عمل البرجر البيتي مش بتحتاج مكونات كتيرة ابدا بالعكس مكوناته بسيطة وموجودة في كل بيت وخطوات عمل الهمبرجر سهلة واي حد ممكن يعملها.

مقادير ومكونات البرجر:

عشان نعمل سندوتش البرجر زي اللي بنشتريه من المحلات فاحنا لازم نقسم الوصفة الي أجزاء، هنعمل الاول عيش البرجر وبعد كده نعمل الحشو اللي هو بيتكون من اللحمة والاضافات التانية.

1. مكونات عيش البرجر:

·         كيلو دقيق ابيض.

·         كوباية مية دافية.

·         3 كوبيات زبادي.

·         3 معالق خل كبار.

·         ربع كوباية زيت.

·         ربع كوباية مية دافية.

·         باكو بيكينج باودر.

·         معلقة ونص كبيرة سكر.

·         نصف معلقة صغيرة ملح.

·         معلقة ونص كبيرة خميرة.

·         معلقتين كبار لبن بودرة.

2. مكونات حشو البرجر:

·         كيلو لحمة مفرومة.

·         بصلة كبيرة.

·         كوباية فول صويا.

·         كوبايتين مية مغلية.

·         معلقتين بهارات برجر.

·         معلقة صغيرة ملح.

·         نصف معلقة صغيرة سكر.

·         معلقة صغيرة فلفل اسمر.

خطوات طريقة عمل البرجر في البيت:

زي ما قولنالكم قبل كده عشان نقدر نعمل البرجر جميل جدا واحلي من اللي بنشتريه من المطاعم فاحنا لازم نقسم مكونات البرجر وبردو لازم نقسم خطوات عمل البرجر، بمعني اننا هنبدأ نحضر العيش البرجر الأول ونعمل العجينة بتاعته وبعد كده نخش على الحشو، عشان كده لازم تركزو معانا كويس جدا عشان محدش يتلغبط خالص ونقدر نطلع البرجر بتاعنا بطعم جميل كمان شكل جامد جدا.

أولا: طريقة عمل عيش البرجر:

1. اول حاجة هنعملها هنجيب ربع كوباية المية الدافية وهنحط فيها معلقة ونص كبيرة خميرة ومعلقة ونص كبيرة سكر ونقلبهم كويس مع بعض ونسيبهم على جنب شوية لمدة متقلش عن 10 دقايق.

2. بعد كده هنحط الدقيق في بولة كبيرة او أي وعاء ممكن نعجن فيه، ونحط عليه نصف معلقة الملح الصغيرة وباكو البيكينج باودر ومعلقتين اللبن البودرة الكبار، ونبدأ نقلبهم مع بعض ونخلطهم كويس بالمعلقة.

3. بعد كده هنضيف 3 كوبايات الزبادي على الدقيق، ونضيف كمان 3 معالق الخل ونبدأ نخلط بأدينا بالراحة.

4. هننزل على الخليط بتاعنا بشوية مية صغيرين واحنا بنعجن، بعد كده هنبص على مخلوط الخميرة هنلاقيها كترت وفارت بعد 10 دقايق هنضيف الخميرة دي علي العجينة ونقلب كويس بردو.

5. بعد كده هنضيف ربع كوباية الزيت، وطبعا كل ده واحنا بنقلب بأدينا، وكل شوية نضيف على العجينة شوية مية صغيرين كل ما تحتاج العجينة، لحاد ما نخلص المية الدافية اللي احنا محضرينها، والعجينة تبدأ تمسك في نفسها.

6. بعد ما العجينة تمسك نفسها هنحط رشة دقيق علي صينية واسعة او على الرخامة وهننزل عليها العجينة من البولة وهنبدأ نفرد العجينة ونلمها ونعجن فيها كويس جدا لمدة متقلش عن 10 دقائق، لحاد ما العجينة تمسك نفسها كويس جدا وتبقي ناعمة خالص وطرية.

7. هنرجع العجينة في البولة او في الوعاء اللي كنا بنعجن فيه تاني ونغطيها بكيس بلاستيك ونسيبها شوية في مكان دافي لحاد ما تخمر.

8. هنرجع للعجينة اللي عملناها بعد ما تخمر ونبدأ نقطع منها ونشكلها على هيئة كرات بحجم الخوخ الكبير، ونرصهم جنب بعض في طبق واسع مرشوش في ارضيته دقيق عشان العجينة متلزقش في الطبق.

9. بعد كده هنجيب كل كورتين مع بعض ونبططهم عشان يتفردو نص فردة كده بحيث يكون سمك العجينة 1 سنتي، وبعدين هندهن وش العجينتين اللي بططناهم بالزيت او بالسمنة او بالزبدة وبعد كده نحط العجينتين فوق بعض على شكل رغيف الهمبرجر ونحطهم في صينية الومنيوم، ونكرر الخطوة دي مع كل الكور والعجين اللي عندنا.

10. بعد ما نعمل كل العجين زي الخطوة اللي فاتت ونرصهم في الصينية الألومنيوم، هنجيب كوباية لبن صغيرة وندوب فيها نصف معلقة سكر ونصف معلقة نسكافيه ونبدأ ندهن بيها وش كل رغيف من اللي عملناهم، وبعد كده هنرش على وش كل رغيف شوية سمسم.

11. دلوقتي باه هنسوي العيش في الفرن، كل اللي هنعمله اننا هنولع الفرن من تحت علي درجة حرارة 200 ونشغل بردو الفرن من فوق ( الشواية ) علي الهادي خالص، وبعد كده نحط الصينية الألومنيوم في أرضية الفرن، ونسيبه شوية لحاد ما وش العيش يحمر وميحمرش اوي من تحت وبعد كده نطلعه و بكده يكون جاهز.

ثانيا: طريقة عمل حشو البرجر.

1. اول حاجة هنعملها في تجهيز حشو الهمبرجر هي اننا هنجيب كوباية فول الصويا ونحطهم في طبق كبير ونحط عليهم كوبايتين المية المغلية، ونسيبهم على جنب لمدة نصف ساعة.

2. بعد كده هنجيب البصلاية ونقطعها شرايح، ونجيب طاسة ونحطها علي نار هادية ونحط فيها معلقة زيت كبيرة وننزل فيها شرايح البصل ونقلبها تقليبة خفيفة بحيث البصلاية تبدأ تدرل وتاخد لون بس وعلي طول نطلعها.

3. بعد كده هنفرم اللحمة، ويفضل طبعا لو فرمنا معاها حتة دهن بس مش كبيرة.

4. هنبدأ نفرم البصل في الكابة او الخلاط وبعدين نصفي فول الصويا كويس جدا من المية ونضيفه على البصل ونفرمهم مع بعض تاني كويس جدا في الخلاط او الكابة او المفرمة.

5. واحنا بنفرم البصل وفول الصويا هنبدأ نضيف عليهم معلقتين بهارات برجر ومعلقة صغيرة ملح ونصف معلقة صغيرة سكر ومعلقة صغيرة فلفل اسمر ونكمل فرمهم مع بعض ومع التوابل كويس جدا.

6. بعد ما فرمنا البصل وفول الصويا مع بعض هننزل الخليط ده على اللحمة المفرومة ونبدأ نخلطهم ببعض ونعجنهم مع بعض كويس جدا.

7. بعد ما نخلط اللحمة بابصل وفول الصويا كويس هنبدأ نشكل البرجر ونعمله على شكل دواير بسمك نص سنتي، وممكن نستخدم في خطوة تشكيل البرجر غطا برطمان نضيف، او ممكن نستخدم مكبس البرجر لو متوفر، ونخلي بالنا منحطش البرجر فوق بعضه عشان ميبوظش مننا، ولما نخلص تشكيل الهمبرجر نسيبه في التلاجة شوية لمدة ساعتين.

8. بعد ما سيبنا البرجر بتاعنا في التلاجة يرتاح شوية لمدة ساعتين، هنطلعه من التلاجة ونحط معلقةتين زيت كبار في الطاسة التيفال ونحطها على نار متوسطة شوية، ونبدأ ننزل قطع البرجر في الطاسة ونسويهم بالراحة خالص علي الوشين، وبكده يكون البرجر جاهز.

دلوقتي هنبدأ نحضر ساندويتش البرجر عشان نقدمه، كل اللي هنعمله اننا هنجيب العيش اللي جهزناه وهنفتحه من النص، وهنا هتبان فايدة طبقة الزيت اللي حطيناها علي العيش قبل ما نحط طبقتين العجين، هنلاقي ان طبقتين رغيف العين بتفتحو معانا كويس بسهولة جدا من غير منقطع العيش بالسكينة.

بعد كده هنحط فيه قطع اللحمة بعد ما نسويها، وطبعا ممكن ناكل السندوتش كده وممكن نضيف كل الحاجات اللي احنا عاوزينها زي شرايح الجبنة الشيدر، والمايونيز والكاتشب والكابوتشي ( الكرنب الفرنساوي ) وممكن بردو نضيف مخللات وشرايح طماطم ومهجون الجبنة والبصل المكرمل، او أي إضافات احنا بنحبها طبعا.

نتمنا اننا نكون وضحنالكم طريقة عمل البرجر في البيت بخطوات واضحة وسهلة ويا رب تجربوها وتعجبكم وتعجب اولادكم بأذن الله، وطبعا لو في عندكم أي استفسارات او لو في أي حاجة مش واضحة متتكسفوش وسيبولنا كل استفساراتكم تحت في التعليقات، ولو في عندكم أي اكلات عاوزين تعرفوا طريقتها سيبولنا اسمها بردو تحت في التعليقات 👇👇 واحنا هنجهزهالكو في اسرع وقت وننشرهالكم علي موقعنا اطعم اكلات، متنسوش تجربوا الهمبرجر بتاعنا هيعجبكم جدا، بالهنا والشفا ودمتم في صحة 💪💪.

اكلات ممكن تعجبك:

• اسرار طريقة عمل الكيكة بالشوكولاته.
• طريقة عمل المكرونة بالبشاميل.
• اهم اسرار طريقة الكنافة النابلسية بالتفصيل.
• طريقة عمل اكلة المانتي التركي | اكلات تركية.
• طريقة عمل كريب شاورما الفراخ بكل سهولة.
• طريقة عمل اجنحة الدجاج.

وتقدري بردو تشتري أفضل أدوات المطبخ اللي هتساعدك وتوفر ليكي كتير وكمان بأسعار ممتازة من هنا