طريقة عمل السينابون بسهولة جدا في البيت

طريقة عمل السينابون بسهولة جدا في البيت

طريقة عمل السينابون فالبيت عمرها مكانت صعبة، بالعكس السينابون طريقته سهلة جدا وخطواته ومكوناته بسيطة أي حد يقدر يعمله في البيت، وبصراحة اكلة حلوة زي السينابون ناس كتير بتحبها جدا وبيكون نفسهم يتعلموا يعملوها في البيت، لان طبعا مش دايما بيكون في امكانا اننا نخرج ونشتريها من المحلات، عشان كده قررنا ان اول اكلة من الحلويات نعملها في موقعنا تكون اكلة كل الناس بتحبها وناس كتير عاوزة تتعلمها، وبصراحة ملقيناش احلي من السينابون.

السينابون أصلا تعتبر اكلة امريكاني مكوناتها بسيطة جدا لكن مفعولها عالمزاج جامد جدا 😅😅، كفاية ان داخل في تكوينها شوكولاتة وقرفة وكريمة يعني حاجات بتخلي اللي يدوقها يتجنن أصلا، ولا ريحة السينابون وهو لسة في الفرن بصراحة ريحة متتوصفش لازم تجربوها بجد، بس عشان نتعلم طريقة عمل سينابون كويسة لازم نركز كويس جدا في المكونات أولا ونحضر مكونات السنابون كويس، وبعد كده لازم نركز في خطوات طريقة عمل السينابون اللي هنقول عليها دلوقتي👇.

مكونات ومقادير عجينة السينابون

• نصف كيلو دقيق ابيض.
• كوباية لبن دافية.
• 1 صفار بيضة.
• تلت كوباية زيت او معلقة كبيرة سمنة او زبدة.
• نصف كوباية سكر.
• معلقة صغيرة فانيليا.
• معلقة كبيرة خميرة فورية.
• 3 معالق لبن بودرة.
• معلقة صغيرة بيكينج باودر.
• نصف معلقة صغيرة ملح.

مقادير ومكونات حشو السينابون

• كوباية الا ربع سكر.
• 3 ملاعق زبدة كبار.
• 3 ملاعق كاكاو كبار.
• 3 ملاعق قرفة كبار.

مقادير ومكونات توبينج السينابون

• نصف كوباية سكر بودرة.
• نصف كوباية لبن بودرة.
• معلقة كبيرة زبدة او سمنة.
• 4 قطع جبنة كيري.

خطوات طريقة عمل السينابون

زي ما قولنا في الأول ان طريقة عمل السينابون مش صعبة خالص بالعكس هي سهلة جدا بس محتاجة شوية تركيز في الخطوات واحدة بواحدة عشان بس متبوظش مننا.

1. اول حاجة هنعملها في السنابون هنجيب أي اناء غويط ونحط فيه كل المكونات الجافة، اللي هي نصف كيلو الدقيق ونصف كوباية السكر ومعلقة الفانيليا الصغيرة ومعلقة الخميرة الكبيرة و3 معالق لبن البودرة ونصف معلقة الملح الصغيرة ومعلقة البيكينج باودر الصغيرة، بعد كده هنقلبهم مع بعض كويس بالمعلقة.
2. بعد كده هنجيب طبق غويط وهنضيف فيه كل المكونات السائلة الباقية مع بعض، اللي هي كوباية اللبن الدافئة وصفار البيضة وثلث كوباية الزيت، وهنقلبهم كويس بردو مع بعض.
3. بعد كده هنضيف الخليط اللبن السائل على الخليط الجاف اللي فيه الدقيق ونبدأ نخلطهم مع بعض ونعجنهم كويس جدا (اهم حاجة في العجينة انها تتعجن كويس جدا جدا).
4. بعد ما نجهز عجينة السينابون هنغطيها بكيس بلاستك ونسيبها تخمر في التلاجة لمدة ساعة، وبعدها هتكون العجينة جاهزة.
5. دلوقتي هنجهز حشو السنابون ودي خطوة سهلة جدا كل اللي هنعمله اننا هنحط الكاكاو والقرفة والسكر على بعض في طبق وهنقلبهم كويس مع بعض.

6. بعد كده هنجيب العجينة بعت ما تكون خمرت وهنبدأ نفردها كويس على شكل مستطيل، بس الأول هنحط رشة دقيق علي المكان اللي هنفرد فيه العجينة عشان العجينة متلزقش وتبوظ مننا، وخلو بالكو بردوه نفرد العجينة لحاد ما تبقي رقيقة بس مش رقيقة اوي.

7. بعد كده هنجيب 3 معالق الزبدة وهنفردهم على العجينة بعد ما فردناها وهنوزع الزبدة كويس جدا على العجينة.

8. ودلوقتي هنبدأ نوزع الحشو بالتساوي على العجينة ونضغط على الحشو بادينا بالراحة عشان نثبته في العجينة وممكن نضيف علي الحشو بعد ما حطيناه شوية مكسرات صغيرين لو متوفر معانا في الوقت ده، بس لازم نخلي بالنا نسيب ضلع من اضلاع المستطيل من غير حشو عشان لما نيجي نبرم العجينة ونلفها نقدر نلزق العجينة ومتفكش مننا.

9. بعد ما وزعنا الحشو كويس على العجينة هنبدأ نلفها بالراحة ونراعي اننا منسيبش أي فراغات في اللفة خالص، وبعد ما نلف العجينة والحشو مع بعض بالراحة نحاول نلزق العجينة في بعضها عشان متفكش مننا ابدا.

10. بعد كده هنبدأ نقطع لفة السينا بون بالتساوي، ويفضل يكون عرض قطعة السينابون هو عرض 3 صوابع لكل قطعة، وبعدين نحط نبدأ نرص السينابون في الصينية اللي هتدخل الفرن، ونخلي بالنا اننا نرص السينابون جمب بعضه ونغطيهم بكيس بلاستيك ونسيبهم شوية لحاد ما حجم كل قطعه يتضاعف بسبب الخميرة.

11. بعد ما حجم السينابون يتضاعف هنبدأ نبعد كل القطع عن بعضها ونسيب مسافات بين القطع وبعضها، وبعد كده ندخل قطع السينابون الفرن لمدة ربع ساعة على درجة حرارة 180، ويفضل اننا نكون مشغلين الفرن قبل ما ندخل السينابون بشوية.

12. بعد ما ندخل السينابون الفرن هنبدأ نحضر توبين ج السينابون اللي هو الصوص الأبيض اللي بيكون علي وش السينابون، كل اللي هنعمله اننا هنحط السكر البودرة واللبن البودرة ومعلقة الزبدة الكبيرة و4 قطع جبنة كيري علي بعض ونقلبهم مع بعض شوية بالمعلقة وبعد كده هنضربهم بالمضرب لحاد ما السكر يدوب.

13. بعد كده هنطلع السنابون من الفرن بعد ما يستوي ونسيبه برة شوية علما يبرد وبعد كده نبدأ نزوقه بالصوص اللي جهزناه، وممكن كمان نضيف عليه شوية صوص شوكولاتة لو حابين، وبكده يكون السينابون جاهز للتقديم.

وبكده نكون وضحنالكو كل خطوات طريقة عمل السينابون، وان شاء الله تجربوه ويعجبكم جدا، اكلة حلوة وجديدة ان شاء الله اولادكم هيحبوها جدا جدا، وباذن الله هنعملكو حلويات واكلات تانية كتير وهنقدمهالكم هنا في موقع اطعم اكلات، يا رب نكون قدرنا نوضحلكم كل اللي انتو عاوزينه في السينابون.

ومتنسوش لو في أي حاجة في طريقة عمل السينابون مش واضحة او في انكم أي ملحوظات او استفسارات متترددوش وسيبوهالنا تحت في التعليقات، ولو في عندكم أي اكلات او حلويات عاوزين تعرفو طريقة عملها سيبولنا اسمها بردو في التعليقات واحنا هنرد عليكو في اسرع وقت بأذن الله، جربو السينابون بألف هنا وشفا، ودمتم في صحة💪💪.

اكلات ممكن تعجبك:

• اسرار طريقة عمل الكيكة بالشوكولاته.
• طريقة عمل المكرونة بالبشاميل.
• اهم اسرار طريقة الكنافة النابلسية بالتفصيل.
• طريقة عمل اكلة المانتي التركي | اكلات تركية.
• طريقة عمل كريب شاورما الفراخ بكل سهولة.
• طريقة عمل اجنحة الدجاج.

وتقدري بردو تشتري أفضل أدوات المطبخ اللي هتساعدك وتوفر ليكي كتير وكمان بأسعار ممتازة من هنا