طريقة السبانخ المصري | طريقة عمل السبانخ في 3 خطوات بسيطة
طريقة السبانخ على الطريقة المصرية هي طريقة عمل السبانخ الاجمل على الاطلاق، ولان السبانخ واحدة من أجمل الاكلات في مصر وكمان على مستوى الدول العربية، قررنا نجيب لكم وصفتها ونوضح لكم كل خطواتها ومقاديرها المظبوطة، طبعا كلنا عارفين فوائد السبانخ للأطفال والكبار، والمعروف اكتر عن السبانخ انها مليانة عناصر غذائية كتير جدا أولها طبعا البروتينات والمعادن.
الجميل في طريقة عمل السبانخ المصرية انها مش بيدخل فيها دهون وزيوت كتيرة، بل بالعكس بتكون اكلة خفيفة جدا وجميلة وقليلة السعرات الحرارية والكوليسترول كمان يعني السبانخ هتكون ممتازة معاك لو انت بتعمل دايت، او عندك مشاكل من الكوليسترول، ودلوقتي يلا بينا نشوف خطوات طريقة عمل السبانخ وكمان مقادير السبانخ المصرية 🥗🥗.
مقادير ومكونات السبانخ
· حزمة شبت وكزبرة.
· كبايتين صلصة (عصير طماطم)
· نصف كباية شعرية لسان عصفور.
· معلقة كبيرة ثوم مفروم.
· بصلاية كبيرة مفرومة.
· معلقتين كبار سمنة.
· كباية شوربة (مرقة).
بهارات السبانخ:
- معلقة صغيرة كزبرة.
- معلقة صغيرة ملح.
- معلقة صغيرة فلفل اسود.
- نصف معلقة صغيرة سكر.
خطوات طريقة عمل السبانخ:
طبعا اهم حاجة قبل ما نبدأ في خطوات طريقة عمل السبانخ لازم نغسل السبانخ كويس هي والشبت والكزبرة، وكمان نبدأ نخرطهم ونقطعهم قطع صغيرة ونخلطهم كلهم على بعضهم، وبعد كده نبدأ في الخطوات 👇👇.
أولا: خطوات تسبيكة السبانخ 🥗:
1. هنجيب حلة متوسطة الحجم وهنحطها على النار ونحط في الحلة معلقة سمنة كبيرة، هنضيف على معلقة السمنة بصلاية كبيرة مفرومة كويس ونقلبهم على النار شوية لحاد ما البصلاية لونها يتغير وتبدأ تدبل.
2. اول ما البصلاية تبدأ تدبل وريحتها الجميلة تطلع، هنضيف عليها كبايتين عصير الطماطم 🍅🍅 اللي جهزناهم، وهنبدأ نقلبهم مع بعض لمدة دقيقة.
3. بعد كده هنضيف على البصل وعصير الطماطم كل كمية السبانخ والشبت والكزبرة اللي جهزناهم وقطعناهم وقلبناهم مع بعض، وهنسيبهم مع بعض شوية في الحلة على نار هادية عشان يبدأوا يتسبكوا مع بعض شوية ونقفل عليهم الحلة.
4. بعد شوية هنفتح الحلة ونبدأ نقلب السبانخ والشبت والكزبرة، مع الصلصة والبصل كويس جدا ونقفل عليهم الحلة تاني ونسيبهم شوية، لحاد ما يتسبكوا كويس.
ثانيا: خطوات طشة السبانخ 🥘:
1. هنجيب حلة صغيرة ونحطها على النار ونحط فيها معلقة سمنة، وبعد كده هنضيف عليها معلقة كبيرة من الثوم المفروم، ونقلب الثوم شوية في السمنة على النار من غير ما يغير لونه.
2. اول ما الثوم يبدأ يعير لونه هننزل فيه نص كباية شعرية لسان العصفور ونستمر في التقليب كويس جدًا، عشان يتحمروا مع بعض ويبدأوا ياخدوا اللون الذهبي.
3. اول ما الثوم ولسان العصفور يبدأوا ياخدوا اللون اللبني هنضيف عليهم معلقة صغيرة من الكزبرة الناشفة، عشان تتحمر وريحتها وطعمها يكونو حلوين جدا.
ثالثا: الخطوات الأخيرة لطريقة السبانخ 🌿:
1. بعد ما سبكنا السبانخ كويس جدا هنضيف عليها كباية شوربة (مرقة) ونقلبها شوية مع بعضها.
2. بعد كده هنضيف الطشة على السبانخ كلها مرة واحدة، وكمان هنضيف عليها باثي البهارات اللي هي معلقة ملح صغيرة، ومعلقة فلفل اسود صغيرة وكمان نص معلقة السكر الصغيرة.
3. هنقلب كل مكونات السبانخ مع بعضها كويس جدا وبعد كده هنقفل عليهم الحلة، ونسيبهم على النار لمدة 3 دقايق وبعد كده نقفل النار، وبكده تكون السبانخ جاهزة معانا للتقديم.
ملحوظة بمليون جنيه:ممكن نضيف على السبانخ وهي بتتسبق قبل ما نضيف عليها الطشة، شوية قطع لحمة مسلوقة وبدل ما نضيف عليها كباية مرقة هنحط طبعا من مرقة اللحمة اللي سلقنا اللحمة فيها هتكون جميلة جددا، والخطوة دي طبعا اختيارية حسب الرغبة، ده طبعا غير اننا ممكن نعملها بالماشروم هتبقى جامدة جدا وهتعجبكم.
وبكده نكون وضحنا لكم كل تفاصيل طريقة السبانخ المصرية، نتمنى اننا نكون علمناكم طريقة سبانخ جميلة وان شاء الله تجربوها وتعجبكم جدا، طبعا لو في عندكم أي استفسار او أي ملحوظات يا ريت تسيبوهالنا تحت في التعليقات واحنا بأذن الله هنرد على كل استفساراتكم وآراءكم في أسرع وقت، جربو طريقة السبانخ بتاعتنا وان شاء الله تعجبكم بالف هنا وشفا، ودمتم في صحة💪💪.
اكلات ممكن تعجبك: