طريقة عمل القرنبيط بالبشاميل | طريقة القرنبيط رقم (2)
جبنالكم المرادي طريقة عمل القرنبيط بالبشاميل 🥦🥦، الاكلة الجميلة اللي هتعجب كل الناس، كنا عملنالكم قبل كده طريقة القرنبيط المقلي المقرمش، والمراد يان شاء الله هنعملكم طريقة قرنبيط جميلة جدا هتاكلوا صوابعكم وراها 👌، طريقة عمل القرنبيط بالبشاميل بصراحة طريقة جميلة جدا واكلة ملهاش حل وناس كتير بيحبوها جدا، بس يا خسارة في ناس كتير بيكونوا عاوزين يعملوها بس مش بتظبط معاهم خالص.
عشان كده قررنا هنا في موقع أطعم اكلات نجيبلكم طريقة عمل قرنبيط بالبشاميل سهلة جدا ومضمونة 100%، وكمان هنوضحلكم كل مقادير طريقة القرنبيط بالبشاميل وكمان كل تفاصيل طريقة القرنبيط بالبشاميل واحدة واحدة عشان مفيش حاجة تبوظ معانا، واقرنبيط يطلع جميل جدا معانا ويعجب كل البيت والكبار والصغيرين ياكلوا منه، يلا بينا نشوف المكونات والخطوات 👇👇.
مكونات ومقادير القرنبيط بالبشاميل:
· واحدة قرنبيط كبيرة
· ربع كيلو لحمة مفرومة
· معلقة زيت
· بصلاية كبيرة مبشورة.
· نصف قرن فلفل رومي
· نصف قرن فلفل احمر
· 3 فصوص ثوم
· معلقة ملح كبير
· معلقة صغيرة فلفل اسمر
· معلقة صغيرة بهارات لحمة
· كمون
مكونات البشاميل:
· معلقتين ونص دقيق كبار.
· 1 لتر لبن.
· مكعب مرقة دجاج.
· معلقة كبيرة كريمة طبخ او معلقة كبيرة جبنة كريمي.
· كوباية كبيرة شوربة.
· معلقة ملح صغيرة.
· معلقة فلفل اسود صغيرة.
· رشة جوز الطيب.
خطوات طريقة عمل القرنبيط بالبشاميل:
طبعا كلنا عارفين ان طريقة القرنبيط بالبشاميل زيها زي أي اكلة بيتعمل فيها بشاميل بتتقسم لاكتر من خطوة وطبعا بنرتب فيها افكارنا كويس جدا عشان منتلغبطش عشان كده هنقسم خطواتنا واحنا بنعمل القرنبيط بالبشاميل زي ما عملنا في اكلة المكرونة بالبشاميل وأكلة الكوسة بالبشاميل وأكلة النجرسكو، يلا بينا نشوف الخطوات دي 👇👇.
أولًا: خطوات تجهيز القرنبيط:
1. اول حاجة هنعملها هنجيب القرنبيطة وننضفها كويس جدا ونبدأ نقطعها ونشيل منها الجدر ويفضل هنا اننا نقطع القرنبيطة قطع صغيرة عشان تتسلق كويس وبعدين نغسلها كويس.
2. بعد كده هنجيب حلة ونملاها مية لحاد نصها او فوق نصها بشوية، ونحطها على نار علية ونحط فيها معلقة ملح كبيرة ونص معلقة كمون صغيرة وأول ما المية تغلى ننزل فيها بكل كمية القرنبيط.
3. هنسيب القرنبيط شوية لمدة 20 دقيقة على النار عشان يتسلق كويس جدا وأول ما ال 20 دقيقة يخلصوا هنطلعه وهنصفيه كويس جدا جدا من المية.
4. بعد كده هنحط القرنبيط كله في حلة او أي وعاء غويط ونبدأ نهرسه شوية، وبكده نكون جهزنا القرنبيط.
ثانيا: خطوات عمل تعصيجة اللحمة:
1. هنجيب طاسة ونحط فيها معلقة سمنة كبيرة او معلقتين زيت ونحطها على نار هادية.
2. هنبشر البصلة الكبيرة والفلفل وكمان 3 فصوص الثوم وننزل بيها في الزيت، ونبدأ نقلب البصلة المبشورة في الزيت على النار لحاد ما البصلة تبدأ تاخد لون وتذوب.
3. اول ما البصلة لونها يتغير هنضيف كل كمية اللحمة اللي معانا، ونحط عليها البهارات بتاعتها اللي مجهزينها اللي هي معلقة صغيرة فلفل اسمر ومعلقة صغيرة بهارات لحمة ومعلقة صغيرة ملح.
4. هنقلب كل المكونات مع البصل واللحمة ونهدي النار عليها ونغطيها شوية لحاد ما اللحمة كلها لونها يتغير وبكده تكون اللحمة المفرومة او التعصيجة جاهزة.
ثالثا: خطوت تجهيز البشاميل:
1. هنجيب حلة متوسطة الحجم وهنحطها على نار هادية ونحط فيها معلقتين سمنة او زبدة كبار، بعد ما السمنة تسيح هننزل عليها بمعلقتين ونص دقيق كبار ونبدأ نقلبهم مع بعض كويس جدا.
2. بعد كده هنلاحظ ان الدقيق والسمنة كلكعوا ومسكو فبعض، هنستمر في التقليب وبعد كده نجيب لتر اللبن ويفضل انه يكون بارد طبعا ونضيف اللبن البارد على عجينة الدقيق واسمنة تدريجيا وطبعا كل ده واحنا مستمرين في التقليب.
3. بعد كده هنضيف معلقة جبنة كريمي كبيرة أومعلقة كبيرة كريمة طبخ حسب المتوفر في البيت وقتها وهنضيف كمان مكعب مرقة الدجاج، ونفضل نقلب كويس جدا.
4. آخر خطوة نضيف كوباية كبيرة من الشوربة ونضيف معاها معلقة ملح صغيرة وكمان معلقة فلفل اسود صغيرة مع رشة جوز الطيب لو حابين، ونفضل نقلب نقلب باستمرار لحاد ما يبدأ البشاميل يمسك معانا ويعمل قوام متماسك شوية، وبكده يكون الشاميل خلص ونطفي النار عليه.
رابعًا: خطوات تجهيز صينية القرنبيط بالبشاميل:
1. هنجيب الصينية اللي هتخش الفرن وهندهنها بشوية بشاميل حلوين كده ففي الأول.
2. بعد كده هنفرد طبقة من القرنبيط اللي هرسناه وجهزناه والطبقة دي هنستخدم فيها نص كمية القرنبيط اللي معانا، وبعد كده هنحط طبقة اللحمة المفرومة وفي الطبقة دي هنحط كل كمية اللحمة اللي معانا.
3. بعد كده هنرجع نضيف طبقة ثانية من القرنبيط، هنعمل الطبقة دي بردو بالكمية الباقية اللي معانا، وبعد كده هنحط عليهم من فوق باقي كمية البشاميل كلها ونفردها كويس فوق القرنبيط.
4. بعد كده هنحط طبقة من الجبنة الموتزاريلا فوق البشاميل عشان تعمل للصينية شكل ولون جميل، هندخل الصينية الفرن على درجة حرارة 220 لحاد ما الوش يتحمر معانا وبكدة تكون جاهزة.
وبكده نكون وضحنا لكم طريقة عمل القرنبيط بالبشاميل بتاعتنا، نتمنى انكم تجربوها وبأذن الله هتطلع معاكم جميلة وكمان طعمها يجنن، ولو عجبتكم طريقة القرنبيط بالبشاميل دي متنسوش تقولوا لنا على رأيكم في التعليقات، وبردوا لو في عندك أي استفسارات او ملحوظات ياريت تسيبوهالنا تحت في التعليقات واحنا هنرد عليكم في اسرع وقت، ولو في عندكم أي اكلة عاوزين تعرفوا طريقتها متترددوش ابدا وسيبولنا اسمها تحت في التعليقات واحنا بأذن الله هنعملهالكم في اسرع وقت، جربوا طريقة القرنبيط بالبشاميل، بالف هنا وشفا ودمتم في صحة 💪💪.
اكلات ممكن تعجبك:
وتقدري بردو تشتري أفضل أدوات المطبخ اللي هتساعدك وتوفر ليكي كتير وكمان بأسعار ممتازة من هنا