طريقة عمل الفراخ ستربس مشطشطة | اكلات سريعة
زي ما عودناكم على أجمل وأطعم اكلات سريعة،
جبنالكم النهاردة طريقة عمل الفراخ ستربس مشطشطة، للناس اللي عاوزة اكلات بالفراخ حارة
ومشطشطة، الاكلة دي هتعجبكم جدا جدا بصراحة طعمها وريحتها متتقاومش ابدًا، وللأسف
ستربس الدجاج اكلة مش منتشرة خالص ولما بنحب نأكلها بيكون الحل الوحيد هو اننا
نشتريها من المطاعم.
عشان كده قررنا نوضح لكم طريقة عمل الفراخ ستربس بكل تفاصيلها، عشان نعملها لاولادنا في البيت
ونحافظ عليهم من اكل الشارع، يعني هنأكلهم اكلات سريعة من اللي بيحبوها وكمان
جودتها ونضافتها مضمونة جدا عشان احنا اللي عاملينها في البيت، يلا بينا نشوف
المكونات والمقادير وكمان خطوات طريقة عمل الفراخ ستربس.
مكونات ومقادير ستربس الدجاج:
2 كيلو صدور فراخ.
البهارات:
·
معلقة كبيرة ثوم بودرة.
·
معلقة كبيرة زنجبيل.
·
معلقة كبيرة فلفل اسود.
·
معلقة كبيرة ببريكا.
·
معلقة كبيرة بصل بودر.
·
معلق كبيرة من السبع بهارات.
مكونات تتبيلة الفراخ:
·
نصف كمية خلطة البهارات.
·
بيضتين كاملين.
·
كباية كبيرة لبن كامل الدسم.
·
معلقة صغيرة ثوم مهروس ناعم.
·
ليمونة.
·
معلقة خل كبيرة.
·
3 أكياس مرقة دجاج فورية أو مكعبين مرقة دجاج.
مكونات طبقة الكرسبي المقرمشة:
·
نصف كيلو دقيق ابيض.
·
كباية الا ربع دقيق ذرة ناعم.
·
كباية الا ربع نشا.
·
النصف الثاني من كمية خلطة البهارات.
·
معلقتين بيكينج باودر صغيرين.
·
كيسين مرقة دجاج فورية او مكعب ونصف من مرقة
الدجاج.
·
معلقة أو معلقتين شطة حارة. (حسب الرغبة).
خطوات طريقة عمل الفراخ ستربس:
طريقة عمل الفراخ ستربس على فكرة سهلة جدا، افكرة
بس انها بتحتاج مكونات وتوابل وبهارات كتيرة بس في الاآخر بيطلع طعمها جميل جدا،
وناس كتيرة بتعتبرها أجمل من اكلات سريعة كتير موجودة، عشان كده يا ريت نركز كويس
جدا في الالخطوات بتاعتها عشان تطلع معانا ستربس الدجاج مظبوط ومقرمش.
أولا تتبيل الفراخ:
1.
اول حاجة هنخلط كل البهارات مع بعضها كويس جدا في
طبق خارجي، وبعد ما نخلطهم كويس نقسمهم لمقدارين متساويين (معلقة كبيرة ثوم بودرة،
معلقة كبيرة زنجبيل، معلقة كبيرة فلفل اسود، معلقة كبيرة ببريكا، معلقة كبيرة بصل
بودر، ومعلق كبيرة من السبع بهارات).
2.
بعد كده هنجيب بولة أو أي وعاء بلاستيك غويط ونحط
فيه كباية اللبن الكبيرة وهنعصر عليه الليمونة ونضيف عليهم البيضتين.
3.
بعد كده هنضيف عليهم معلقة الثوم المهروس الصغيرة
وكمان هنضيف عليهم معلقة الخل الكبيرة، وبعد كده هنضيف عليهم نصف كمية الهارات
اللي خلطناهم ببعض.
4.
هنضيف كمان عليهم 3 أكياس مرقة دجاج فورية أو
مكعبين مرقة دجاج، وبعد كده هنقلب كل المكونات دي مع بعضها كويس جدا في
البولة.
5. هنجيب
كل كمية صدور الفراخ وننضفها كويس ونخليها وبعد كده نقطعها على شكل صوابع ونحطها
في الخلطة اللي عملناها ونقلبهم مع بعض، وبعد كده هنسيب الفراخ في التتبيلة لمدة
متقلش عن 6 ساعات عشان الفراخ تتبل كويس جدا.
ثانيًا: خطوات طبقة الكرسبي المقرمشة:
1.
هنجيب نصف كيلو الدقيق الأبيض ونحطه في بولة او أي
طبق كبير وغويط ونحط عليه كباية الا برع دقيق ذرة ناعم وكمان هنضيف عليه كباية الا
ربع نشا.
2.
بعد كده هنحط عليهم معلقتين صغيرين بيكينج باودر
وكمان هنضيف الشطة، وهنصيف عليهم كمان النصف الثاني من كمية الهارات اللي جهزناها
قبل كده 👆👆، وطبعًا هنضيف كيسين مرقة دجاج فورية او مكعب ونصف من مرقة
الدجاج، ونصف معلقة ملح.
3. بعد
كده هنقلب كل المكونات دي مع بعضها بأدينا او بالمعلقة عشان يختلطوا كويس جدا ببعض
وكمان يختلطوا مع الدقيق، وبكده تكون طبقة الكرسبي جاهزة معانا.
ثالثا: خطوات التغطية والقلي والتجهيز:
بعد ما قطع الفراخ أخدت وقتها في التتبيلة واتبلت
كويس جدا، هنبدأ نغطي قطع الفراخ بالطبقة الكرسبي قبل ما نقليها:
1.
اول حاجة هناخد كباية من خلطة الدقيق ونحطها في
طبق ونبدأ نغطي قطع الفراخ بالخلطة دي واحدة بواحدة ونرصصهم جنب بعض في طبق خارجي،
وكل ما كمية الدقيق اللي أخدناها تخلص نزودها.
2.
في طريقة تانية، وهي اننا هنجيب كيس نظيف وسليم
ونحط فيه كباية دقيق ونحط فيه كمان قطعطتين من الفراخ، ونقفل الكيس بأدينا ونخلي
فيه هوا ونبدأ نرج الكيس وجواه الدقيق والفراخ وبعد كده نطلع قطع الفراخ هنلاقيها
اتغرقت دقيق، وبردو نرصصهم جنب بعض.
3.
بعد ما نخلص كل كمية الفراخ هنجيب طاسة زيت كبيرة
وياريت يكون الزيت فيها عالي وكتير، هنبدأ نسخن الزيت الأول قبل ما ننزل فيه
بالفراخ، وبعد كده هننزل بالفراخ في الزيت ولازم يكون الزيت سخن عشان الفراخ تاخد
الصدمة.
4. طبعا
هنقلب قطع الفراخ في الزيت عشان تستوي من كل ناحية، وأول ما قطع الفراخ تاخد لونها
الذهبي هنطلعها ونحطها في طبق التقديم عشان تبقى جاهزة للتقديم.
معلومة مهمة: لو احنا مش هنستخدم كل كمية الفراخ دي يفضل اننا نغطيها بطبقة الدقيق كويس وبعد كده نرصصهم في طبق ونحطهم في الفريزر مش هيحصلهم أي حاجة، وطبعا لو اتبقي أي كمية من خلطة الدقيق منرميهاش ونحطها في كيس ونشيلها في الثلاجة عشان نستخدمها مرة تانية.
وبكده نكون وضحنا لكم طريقة
عمل الفراخ ستربس بكل خطواتها وتفاصيلها، جربوا الاكلة دي هتعجبكم جدا ولو في عندكم
عدومة كمان هتشرفكم وهتسد معاكم، انتظروا مننا اكلات سريعة وأكلات بالفراخ جديدة
بأذن الله، وطبعا لو في عندكم أي استفسارات او أي حاجة مش واضحة يا ريت تسيبوهالنا
تحت في التعليقات واحنا هنرد عليكم في أسرع وقت.
وطبعا
لو في اعندكم أي اكلات جديدة عاوزين تعرفوا طريقتها يا ريت تسيبولنا اسماءها تحت
في التعليقات واحنا هنوضح لكم طريقتها في مقالات جديدة، جربوا طريقة عمل الفراخ
ستربس بتاعتنا هتعجبكم جدًا، بالف هنا وشف ودمتم في صحة 💪💪.
اكلات جديدة ممكن تعجبك
اكلات جديدة ممكن تعجبك
- طريقة عمل الكنافة النابلسية.
- طريقة عمل البان كيك.
- طريقة عمل العجة التركية.
- طريقة عمل الكيكة الاسفنجية.
- طريقة عمل كيكة الشوكولاتة الاسفنجية.
وتقدري بردو تشتري أفضل أدوات المطبخ اللي هتساعدك وتوفر ليكي كتير وكمان بأسعار ممتازة من هنا