أكلات مصرية | طريقة عمل الحواوشى فى البيت

أكلات مصرية | طريقة عمل الحواوشى فى البيت

جبنا لكم أحلي اكلة طريقة عمل الحواوشى الاسكندرانى على اصوله، الحواوشي طبعا واحدة من أجمل أكلات مصرية ممكن تدوقها، ولان الإسكندرية معروفة بأكلات مصرية جميلة زي الحواوشى قررنا نوضح لكم طريقة عمل الحواوشى بكل تفاصيله عشان تعملوه في البيت أجمل من المحلات بكتير، وطبعا عشان نستخدم أدوات مضمونة ونضيفة عشان صحة أولادنا.

طريقة عمل الحواوشى الاسكندرانى مش صعبة ابدأ بالعكس طريقة الحواوشي سهلة جدا، أصلا الحواوشي عبارة عن عيش (خبز) جواه لحمة بس، لكن اللي بيخلي طريقة عمل الحواوشى ممكن تكون صعبة شوية هي التتبيلة والبهارات، لان طبعا الحواوشى لازم طعمه يكون مظبوط جدا، وبأذن الله في المقالة دي هنوضحلكم كل تفاصيل طريقة عمل الحواوشى، وبأذن الله في المقالات الجاية هنعملكم اكلات مصرية كتير هتعجبكم.

مكونات ومقادير عجينة عيش الحواوشى:

·         كيلو دقيق ابيض.

·         ربع كباية مية دافية (عشان اختبار الخميرة).

·         كبايتين مية دافية (عشان العجينة).

·         كباية زبادي كبيرة.

·         ربع كباية زيت.

·         رشة ملح.

·         معلقة ونصف صغيرة سكر.

·         معلقة ونصف صغيرة خميرة.

مكونات لحمة الحواوشى:

·         كيلو لحمة مفرومة.

·         ربع كيلو دهن مفروم.

·         كيلو بصل مفروم.

·         قرنين فلفل رومي.

·         قرن فلفل حار.

·         معلقتين سمنة بلدي او زبدة.

·         معلقة كبيرة ملح.

بهارات لحمة الحواوشي:

·         معلقة كبيرة بهارات حواوشي.

·         معلقة صغيرة فلفل اسود.

·         معلقة صغيرة بابريكا.

·         معلقة صغيرة كذبره ناشفة.

·         معلقة صغيرة ثوم بودرة.

·         معلقة صغيرة بصل بودرة.

·         معلقة صغيرة من (السبع بهارات).

·         معلقة صغيرة حبهان مطحون.

·         معلقة صغيرة ورق لورى مطحون.

خطوات طريقة عمل الحواوشى:

بعد ما جهزنا كل مكونات ومقادير الحواوشي دلوقتي هنبدأ نتعرف على طريقة عمل الحواوشي، وطبعا زي ماحنا عارفين ان الحواوشي بيتكون من جزئين الجزء الأول هو عجينة الحواوشي والجزء التاني هو حشو الحواوشي أو اللحمة، ودلوقتي يلا بينا نبدأ في الخطوات 👇👇:

تحضير عجينة الحواوشى:

1.      أول حاجة هنعمل اختبار للخميرة عشان نشوفها شغالة وكويسة ولا لا، هنجيب ربع كباية الماية ونحط فيها معلقة ونص صغيرة سكر ومعلقة ونص صغيرة خميرة ونقلبهم مع بعض شوية ونسيبهم على جمب دلوقتي.

2.      بعد كده هنجيب الدقيق ونحطه في بولة متوسطة الحجم او نحطه في العجانة، بعد كده هنضيف على الدقيق رشة الملح، وكباية الزبادي الكبيرة، وربع كباية الزيت، ونيدأ نقلب كل المكونات دي مع بعض ونعجن في العجينة.

3.      طبعا هيكون جمبنا كبايتين المية وكل ما نحتاج شوية مية هنحط على العجينة واحنا بنعجن، لحاد ما كمية المية تخلص كلها بس لازم نخلي بالنا منحطش كل كمية المية مرة واحدة هنحطها بالتدريج، وطبعا هنستمر في العجن.

4.      هنرجع للخميرة هنلاقيها فارت وعليت وده يدل على انها كويسة وشغالة، هنفضي كل الكمية على العجينة ونستمر في التقليب والعجين بأدينا او بالعجانة، لحاد ما العجينة تتظبط وتبقى تمام وطبعا لو احتاجت أي رشة دقيق ولا أي حاجة نعطيلها.

5.      هنحط العجينة في البولة ونغطيها ونسيبها في مكان دافي عشان تخمر لحاد ما حجمها يكبر ويتضاعف علما نجهز الحشو.

تحضير حشو الحواوشي:

1.      أول خطوة هنجهز اللحمة، كل اللي هنعمله اننا هنفرم كيلو اللحمة وهنفرم عليه ربع كيلو الدهن ونقلبهم كويس مع بعض، وهنضيف عليهم معلقة كبيرة ملح.

2.      بعد كده هنضيف عليهم كل مكونات حشو الحواوشي اللي جهزناها، اللي هي كيلو البصل المفروم ومعلقتين السمنة البلدي او الزبدة، وهنضيف كمان قرنين الفلفل الرومي وقرن الفلفل الحار بعد ما نقطعهم قطع صغيرة جدا.

3.     بعد كده هنضيف كل البهارات اللي جهزناها، اللي هي معلقة كبيرة بهارات حواوشي، معلقة صغيرة فلفل اسود، معلقة صغيرة بابريكا، معلقة صغيرة كذبره ناشفة، معلقة صغيرة ثوم بودرة، معلقة صغيرة بصل بودرة، معلقة صغيرة من (السبع بهارات)، معلقة صغيرة حبهان مطحون، معلقة صغيرة ورق لورى مطحون.

4.      هنقلب كل المكونات دي مع بعضها كويس جدا لحاد ما البهارات واللحمة والبصل يختلطوا مع بعض كويس.

5.     بعد كده هرجع لعجينة الحواوشي هلاقيها خمرت وحجمها اتضاعف وصارت جاهزة للحشو، طبعا هنبدأ ناخد قطع من العجينة ونحشيها باللحمو ونعملها على شكل رغيف مدور وطبعا بالحجم والكمية اللي انتوا عاوزينها.

ملحوظة خطيرة:لو اتبقى معانا كمية من اللحمة ممكن نحشي بيها عيش بلدي على فكرة بيكون طعمه جميل جدا فالحواوشي.

6.      بعد ما نخلص حشو الحواوش كله هنبدأ نحط ارغفة الحواوشى اللي جهزناها في الصواني المعدنية او الصيجان اللي هتخش الفرن بس لازم قبل ما نحط في ها الحواوشي ندهنها الأول بالزيت.

7.      بعد كده هنبدأ ندخل الصواني او الصيجان في الفرن بس الأول هندهن كل ارغفة الحواوشى بشوية عصير طماطم او ممكن نحط عليها شوية جبنة شيدر او موزاريلا او رومي أو أي حاجة احنا حابينها، وكمان ممكن نعمله من غير أي إضافات.

8.     ودلوقتي هندخل الحواوشي في الفرن من تحت وهنظبط درجة الحرارة على 180 درجة، وكمان هنشغل الشواية على الهادي شوية، وطبعا نتابع الحواوشي باستمرار من فوق ومن تحت عشان ميتحرقش، لحاد ما يستوي ونطلعه من الفرن.

وبكده نكون وضحنا لكم طريقة عمل الحواوشي في البيت عشان نعملها لولادنا ونحميهم من اكل الشارع، نتمنى انكم تجربوا طريقة عمل الحواوشي في البيت وتقولوا لنا على رأيكم في التعليقات تحت 👇👇، وبأذن الله هنعملكم أكلات مصرية جديدة هتعجبكم جدا، ولو عاوزين أكلات مصرية تانية غير الحواوشي ممكن تشوفو طريقة الكبدةالاسكندراني وكمان طريقة السبانخ المصرية وأكلات مصرية تانية كتير على موقعنا.

بنفكركم دايما لو في عندكم أي استفسارات او أي ملاحظات يا ريت تسيبوهالنا تحت في التعليقات، وكمان لو عندكم أي اكلات جديدة عاوزين تعرفوا طريقتها سيبوا لنا اسمها في التعليقات واحنا نجهزها لكم في أسرع وقت، متنسوش تجربوا طريقة عمل الحواوشى بتاعتنا بألف هنا وشفا، ودمتم في صحة 💪💪.

اكلات ممكن تعجبك:

• طريقة عمل الكيكة بالشوكلاته.
• طريقة عمل الفراخ على الطريقة الصينية.
• طريقة عمل الفراخ ستربس.
• طريقة عمل البوتين الكندي.
• طريقة القرنبيط بالبشاميل بسهولة جدا.
• أسهل طريقة لعمل كريب شاورما فراخ في البيت.