طريقة عمل الكيكة بالشوكولاتة بأسهل وصفة وأجمل طعم

طريقة عمل الكيكة بالشوكولاتة بأسهل وصفة وأجمل طعم

كيكة الشوكولاته يلا باه عشان نحلي يا جماعة، اظن باه مفيش حاجة نحلي بيها أجمل من كيكة الشوكولاته، عشان كده جبنالكم طريقة عمل الكيك بالشوكولاتة عشان تعملوها في البيت لاولادكم وكمان عشان تكون راسكم دايما مرفوعة في كل العزومات والمناسبات، لان بصراحة حاجة حلوة زي كيكة الشوكولاته لما بتكون مظبوطة بترفع الراس قدام الضيوف لانها بتعجبهم كلهم وكل الناس بيحبوها.

باذن الله في المقالة دي هنوضحلكم بالتفصيل طريقة عمل الكيك بالشوكولاتة في البيت عشان نعمل كل مكونات كيكة الشوكولاته بنفسنا وبأدينا عشان تكون مكونات كيكة الشوكولاته مظبوطة ومضمونة 100%، وباذن الله لو مشيتوا معانا خطوة بخطوة نوعدكم ان كيكة الشوكولاتة هتطلع معاكم اجمل من كيكة المحلات، يلا بينا نخش علي طريقة عمل الكيكة بالشوكولاتة ركزو معانا👇👇 .

مكونات ومقادير كيكة الشوكولاته:

عشان نعمل كيكة الشوكولاته بتاعتنا وتطلع جميلة ومفيهاش غلطة، لازم نقسم مكوناتاها وادواتها، عشان كده هنقسم طريقة عمل الكيكة بالشوكولاتة لجزئين الأول هيكون عن صوص الشوكولاتة والتاني هيكون عن كيك الشوكولاتة.

1. مكونات ومقادير صوص الشوكولاتة:

• كوباية زيت.
• كوباية سكر بودرة.
• كوباية لبن.
• 4 معالق كاكاو خام.
• مكعبين او ثلاثة شوكولاتة خام حسب الرغبة (المكعب في حجم مكعب مرقة الدجاج).

2. مكونات ومقادير كيكة الشوكولاته:

• كوبايتين دقيق ابيض.
• كوباية لبن حليب.
• كوباية سكر.
• نصف كوباية زيت نباتي.
• 3 بيضات.
• معلقة كبيرة نشا.
• 3 معالق كبار كاكاو خام.
• معلقة صغيرة فانيليا.
• معلقة كبيرة بيكينج باودر أو باكو كامل (ظرف).
• نصف معلقة صغيرة ملح.

خطوات طريقة عمل الكيكة بالشوكولاتة:

بعد ما جهزنا كل المكونات اللي هنستخدمها في تحضير كيكة الشوكولاته دلوقتي هنبدأ نحضر كيك الشوكولاتة، وزي ما قولنالكو هنقسم خطواتنا ونرتبها عشان مفيش حاجت تبوظ مننا، عشان كده هنحضر صوص الشوكولاتة الأول وبعد كده هنجهز كيكة الشوكولاته.

1. طريقة عمل صوص الشوكولاتة:

1. اول خطوة في تجهيز صوص الشوكولاتة هي اننا هنجيب كنكة كبيرة او أي طاسة معدن غويطة وهنحط فيها كوباية اللبن ومعاها كمان مكعبات الشوكولاتة الخام ونحطها شوية على نار هادية جدا ونبدأ نقلبهم كويس جدا مع بعض لحاد ما مكعبات الشوكولاتة الخام تسيح وتختلط كويس جدا باللبن.

2. بعد كده هنجيب الخلاط ونحط فيه خليط كوباية اللبن بالشوكولاتة، بعد كده هنضيف عليه كل المكونات اللي جهزناها لصوص الشوكولاتة، واللي هي كوباية السكر البودرة وكوباية الزيت، وال 4 معالق الكاكاو الخام.

3. هنقفل عليهم الخلاط ونبدأ نضربهم كويس جدا جدا في الخلاط عشان كل المكونات تمتزج وتختلط كويس مع بعضها وفي النهاية هيكون صوص الشوكولاتة بالشكل اللي في الصورة ده 👇👇.

2. طريقة عمل الكيكة بالشوكولاتة:

1. اول حاجة هنعملها في خطوات عمل كيكة الشوكولاته هي اننا هنجيب ال 3 بيضات ونكسرهم ونفضيهم في طبق خارجي وعلى طول نحط عليهم معلقة الفانيليا الصغيرة عشان نضيع ريحة البيض، ويفضل ان الفانيليا تكون سائلة لأنها بتكون أقوى بكتير من الفانيليا البودرة.

2. بعد كده هنجيب شفشق الخلاط ونبدأ نحط فيه كل المكونات السائلة اللي جهزناها في الأول، وهي كوباية اللبن ونصف كوباية الزيت النباتي وال3 بيضات معاهم معلقة الفانيليا الصغيرة،وطبعا معاهم كوباية السكر وهنضربهم كويس جدا في الخلاط، عشان السكر يدوب خالص والمكونات كلها تختلط كويس ببعضها.

3. بعد ما ضربنا خليط المكونات السائلة كويس هنفضي الشفشق في بولة غويطة او أي اناء او وعاء غويط، بس لازم الوعاء ده يكون جاف جدا مفيش فيه أي نقطة مية.

4. ودلوقتي هنحضر المكونات الجافة لكيك الشوكولاتة، هنجيب كوبايتين الدقيق الأبيض ونحطهم في طبق كبير وغويط، وهنضيف عليهم نصف معلقة الملح الصغيرة، وهنضيف عليهم كمان معلقة كبيرة نشاومعلقة كبيرة بيكينج باودر، وكمان هنضيف 3 معالق كبار كاكاو خام.

5. بعد ما حطينا كل المكونات الجافة مع بعض هنبدأ دلوقتي نخلط كل المكونات دي مع بعضها بالمعلقة، وبعد ما نخلطها هنبدأ ننخلها بالمنخل او باي مصفة عشان يدخل فيها هوا وتكون كيك الشوكولاتة بتاعتنا هشة واسفنجية.

6. دلوقتي كل المكونات السائلة جاهزو وكل المكونات الجافة جاهزة بردو، كل اللي هنعمله دلوقتي اننا هنتبدأ نضيف المكونات الجافة الي المكونات السائلة في البولة او الاناء الغويط، لكن نخلي بالنا لازم نضيف المكونات بالراحة خالص وياريت معلقة معلقة.

7. هنضرب كل المكونات مع بعضها بالمضرب اليدوي او بالمضرب الكهربي، ولازم نخلي بالنا نضيف المواد الجافة بالراحة عشان العجينة متكلكعش مننا، ونستمر في التقليب كويس جدا لحاد ما القوام يبقي ناعم معانا وسلس زي اللي في الصورة ده 👇👇.

8. بعد كده هنجيب الصينية اللي هتدخل الفرن وندهنها بمعلقة زيت من كل الجوانب عشان الكيكة متلزقش في الصينية وتبقي سهلة علينا اننا نطلعها من الصينية، بعد كده هنحط فيها عجينة الكيكة اللي جهزناها كلها وندخلها الفرن علي درجة حرارة 180 لمدة متقلش عن 35 دقيقة، ويفضل طبعا اننا نكون مشغلين الفرن قبل ما ندخلها فيه بفترة كبيرة.

9. بعد ما كيك الشوكولاتة يستوي في الفرن هنطلعه ونسيبه يبرد شوية بعد كده هنطلع الكيك من الصينية ونضيف عليه صوص الشوكولاتة اللي جهزناه قبل كده، وطبعا هنفرد صوص الشوكولاتة على كل صينية كيكة الشوكولاته، او طبعا ممكن نضيفه بالطريقة اللي احنا عاوزينها، وكمان ممكن نزين كيكة الشوكولاتة بشوية قطع فاكهة زي الفراولة والموز.

وبكده نكون عملنا مع بعض ووضحنالكم طريقة عمل الكيكة بالشوكولاتة وكمان طريقة عمل صوص الشوكولاته، عشان نقدر نعملها في البيت براحتنا بكل سهولة من غير ما نحتاج اننا نشتريها من برة، ونصيحة مننا: يفضل اننا نشتري مكونات كويسة من عند بائعين مضمونين عشان النتيجة في الآخر تطلع كويسة جدا وخصوصا الدقيق والكاكاو لازم يكونوا كويسين جدا عشان كيكة الشوكولاته تطلع معانا كويسة جدا جدا.

نتمنا ان طريقة عمل الكيكة بالشوكولاتة تكون عجبتكم وتكونوا استفدتم مننا، ونتمنا بردك انكم تجربوها في البيت وتقولولنا على طعمها اللي جربتوه تحت في التعليقات، ومتنسوش تكتبولنا بردك في التعليقات لو في عندكم أي أسئلة او في فوصفة كيك الشوكولاتة أي حاجة مش واضحة، ولو في عندكم أي اكلة عاوزين تعرفوا طريقتها سيبولنا اسمها بردو تحت في التعليقات واحنا هنعملهالكم في أقرب وقت، جربوا كيكة الشوكولاته بتاعتنا بالهنا والشفا، ودمتم في صحة💪💪.

اكلات ممكن تعجبك:

• طريقة عمل الكيكة بالشوكلاته.
• طريقة عمل الفراخ على الطريقة الصينية.
• طريقة عمل الفراخ ستربس.
• طريقة عمل البوتين الكندي.
• طريقة القرنبيط بالبشاميل بسهولة جدا.
• أسهل طريقة لعمل كريب شاورما فراخ في البيت.

وتقدري بردو تشتري أفضل أدوات المطبخ اللي هتساعدك وتوفر ليكي كتير وكمان بأسعار ممتازة من هنا