الاكل التركي | أفضل طريقة لعمل المانتي التركي

الاكل التركي | أفضل طريقة لعمل المانتي التركي

المانتي التركي واحدة من اكلات تركية شعبية كتير جدا، لكن المانتي التركي بيتميز بشعبيته الكبيرة جدا في تركيا، وده طبعا لان المانتي التركي يعتبر واحدة من أفضل الاكلات التركية السريعة والسهلة وكمان طعم المانتي التركي شهي جدا وجميل.

ولأن الاكل التركي معروف دايما بطعمه الجميل جدا قررنا في المقالة دي نوضحلكم واحدة من الاكلات التركية الجميلة جدا واللي بأذن الله هتتعودوا على انها تكون موجوده دايما في جدول اكلاتكم لان مش بس طعمها جميل، لا ده كمان عشان هي اكلة سهلة ومكوناتها سهلة جدا ودايما موجودة في البيت، ودلوقتي يلا بينا نشوف مكونات وخطوات المانتي التركي 👇👇.

مكونات ومقادير المانتي التركي:

أولا: مكونات عجينة المانتي التركي

• 3 كبايات دقيق.
• معلقة كبيرة ملح.
• بيضة.
• كباية مية.

ثانيا: مكونات حشو المانتي التركي

• ربع كيلو لحمة مفرومة.
• بصلة صغيرة.
• فصين ثوم.
• بقدونس. (الكمية حسب الرغبة)
• معلقة صغيرة فلفل اسود.
• معلقة صغيرة بهارات لحمة.
• معلقة صغيرة بابريكا.

ثالثا: مكونات صوصات المانتي

صوص اللبن:

• كيلو لبن رايب.
• معلقة صغيرة ملح.
• راس ثوم صغير.

الصوص الأحمر:

• معلقة كبيرة صلصة طماطم معلبة.
• 3 معالق كبار زبدة.
• معلقة صغيرة فلفل شطة احمر مطحون.
• معلقة صغيرة نعناع ناشف.

خطوات طريقة عمل المانتي التركي

قبل ما نبدأفي خطوات عمل المانتي التركي لازم نعرف ان اكلة المانتي التركي زي ما ذكرنا في المكونات ☝☝ بتتكون من جزئين العجينة والحشو بتاعها عشان كده في الأول هنجهز العجينة ونسيبها ترتاح شوية وبعد كده نبدأ نعمل اللحمة، ركزوا معانا في الخطوات دي 👇👇:

أولا: خطوات عمل عجينة المانتي التركي

1. هنحط 3 كبايات الدقيق في بولة او حلة غويطة ونحط عليه الملح ونقلبهم مع بعض كويس.
2. بعد كده هنضيف البيضة على الدقيق ونبدأ نعجن الدقيق مع البيضة وننزل عليهم بشوية مية بالراحة خالص.
3. هنستمر في العجن كويس جدا وهنضيف كمية المية على العجينة واحنا بنعجنها بالتدريج، لحاد ما تبقي العجينة ناعمة وطرية ومتماسكة ولازم نخلي بالنا ان عجينة الماندي بتكون متماسكة وجامدة زي عجينة العيش ومش بتكون سائلة زي عجينة الكيكة.
4. بعد ما نخلص العجينة هنقطعها بالسكينة 3 قطه وهنغطيها ونسيبها نصف ساعة في التلاجة.

ثانيا: خطوات عمل حشو المانتي التركي

1. في الأول هنفرم البصل كويس جدا وكمان هنفرم الثوم وكمان هنقطع البقدونس ناعم خالص.
2. بعد كده هنضيف كل مكونات حشو المانتي التركي علي اللحمة المفرومة واللي هي، البصلاية المفرومة وفصين الثوم المفرومين وكمان هنصيف الكمية اللي احنا عاوزينها من البقدونس، وهنضيف كمان الفلفل الأسمر وبهارات اللحمة ومعلقة البابريكا.
3. هنقلب كل المكونات كويس جدا مع بعضها عشان يختلطوا كويس ببعض.

ثالثا: خطوات تشكيل عجينة المانتي التركي

1. بعد ما جهزنا العجينة وحطيناها نص ساعة في التلاجة هنبدأ دلوقتي نفردها ونشكلها.
2. هنجيب قطعة من التلاتة ونحط شوية دقيق علي المكان اللي هنفرد فيه العجينة ونبدأ نفرد العجينة كويس جدا بادينا او باستخدام النشابة، ولازم نخلي بالنا منخليش العجينة رقيقة اوي، ونخليها سميكة شوية زي اللي فالصورة كدة.
3. بعد ما نفرد عجينة المانتي التركي هنبدأ نقطعها بالسكينة مكعبات صغيرة، بس في الأول لازم نكون حاطين تحت العجينة شوية دقيق عشان لما نقطعها متلزقش.

رابعا: خطوات حشو المانتي

1. هنبدأ نحط قطع اللحمة على مربعات عجينة المانتي الصغيرة زي ماحنا عاملين في الصورة كده 👇.

2. بعد كده هنبدأ نقفل قطع العجين على اللحمة على الشكل والحجم اللي احنا عاوزينه، وعلى فكرة شكل المانتي التركي بيكون مقفول على شكل ماسة بالضبط زي الشكل اللي فالصورة 👇

3. بعد ما نخلص كل الكمية اللي معانا هنبدأ نعمل نفس الخطوات مع باقي قطع العجينت وباقي كمية اللحمة.

4. بعد كده هناخد كل كمية المانتي اللي عملناها وهنحطها في صينية وندخلها الفرن لمدة 10 دقائق فقط عشان تحمص شوية والعجين واللحمة يمسكوا نفسهم شوية.

ملحوظة مهمة: اكلة المانتي التركي عشان هي اكلة شعبية بتتعمل في المناسبات التركية بيتشارك في عملها معظم افراد الاسرة لانها بتاخد وقت ومجهود كبير في الحشو والتقفيل، بالضبط زي اكلة المحشي عندنا في مصر 😂😂، وكمان لو اخدنا بالنا هنلاقي ان كمية المكونات دي هتنتج معانا كمية كبيرة من المانتي، عشان كده المانتي بيكون جميل جدا في العزومات وموفر جدا.

والمميز في اكلة المانتي التركي اه ممكن يتخزن في الفريزر بعد ما نحمصة في الفرن ونستخدمه بعد كده في مناسبات تانية.

خامسا: خطوات تجهيز صوصات المانتي التركي

1. اول حاجة هنجهز صوص اللبن: هنفرم راس الثوم كويس جدا ونخليها ناعمة خالص، بعد كده هنحطها على اللبن الرايب ومعاها معلقة الملح الصغيرة وههنقلبهم كويس جدا مع بعض بالمعلقة او بالمضرب وبكده يكون صوصو اللبن جاهز 👍👌.
2. بعد كده هنجهز الصوص الأحمر: هنحط 3 معالق الزبدة في طاسة على نار هادية ونسيبها لحاد ما تسيح وتسخن شوية بعد كده هنضيف على الزبدة معلقة الصلصة المعلبة بعد كده هنضيف عليهم معلقة الشطة الجمرة الصغيرة وكمان معلقة النعناع الناشف.
3. هنقلب كل المكونات دي مع بعض على النار لمدة 5 دقائق لحاد ما يختلطوا كويس جدا مع بعض وبكده يكون الصوص الأحمر جاهز.

سادسا وأخيرا: خطوات تحضير وتقديم المانتي التركي

1. هنجيب حلة متوسطة الحجم ونحط فيها مية لحاد نصها ونحط فيها معلقة ملح كبيرة، ونسيبها على النار شوية لحاد ما المية تسخن وتغلي.
2. بعد كده هنحط المانتي في المية وهي بتغلي عشان نسلقة بالضبط زي المكرونة لمدة 10 دقائق فقط.
3. بعد كده هنطلع المانتي ونحطه في اطباق التقديم ونحط عليه صوص اللبن والصوص الأحمر زي الشكل اللي فالصورة بالضبط 👇👇.

وبكده نكون جهزنا واحدة من أجمل الاكلات التركية، نتمنا انها تكون عجبتكم وتكون سهلة عليكم وتجربوها في المناسبات والعزومات هتوفر كتير جدا وهتعجب كل افراد الاسرة، وبأذن الله في الأيام اللي جاية هنقدملكم اكلات جديدة من الاكل التركي الجميل ده وكمان اكلات تانية من دول مختلفة.

طبعا متنسوش لو في عندكم أي ملاحظات او أي استفسارات اكتبوهالنا تحت في التعليقات ولو في عندكم أي اكلات عاوزين تعرفوا طريقتها سيبولنا اسماءها تحت في التعليقات واحنا هنجهزلكم طريقتها ونقدمهالكم في اسرع وقت، جربوا المانتي التركي بالف هنا وشفا، ودمتم في صحة 💪💪.

اكلات ممكن تعجبك:

• طريقة عمل الكيكة بالشوكلاته.
• طريقة عمل الفراخ على الطريقة الصينية.
• طريقة عمل الفراخ ستربس.
• طريقة عمل البوتين الكندي.
• طريقةالقرنبيط بالبشاميل بسهولة جدا.
• أسهل طريقة لعمل كريب شاورما فراخ في البيت.

وتقدري بردو تشتري أفضل أدوات المطبخ اللي هتساعدك وتوفر ليكي كتير وكمان بأسعار ممتازة من هنا