صوصات الحلويات | طريقة عمل صوص الشوكولاتة وصوص الكراميل واللبن المكثف في البيت
طريقة عمل اللبن المكثف وطريقة عمل صوص الشوكولاتة وطريقة
عمل الكراميل، من اكتر الوصفات اللي بتطلب مننا، عشان كده قررنا نعملكم وصفات
صوصات الحلويات كلها في مقالة واحدة عشان متدوخوش عليها كتير، بأذن الله في المقالة
دي هنوضحلكم بالتفصيل طريقة عمل صوص الشوكولاتة وطريقة عمل الكراميل وطريقة عمل اللبن المكثف.
ان شاء الله هنعملكم في مقالات تانية طرق عمل صوصات
الفواكه زي صوص الفراولة وصوص المانجو، وكمان بأذن الله هنعملكم مقالة كاملة عن الصوصات
المالحة زي الكاتشب والمستردة والمايونيز، ودلوقتي يلا بينا نتعرف على طريقة عمل الكراميل
وطريقة عمل صوص الشوكولاتة 👇👇.
 |
أولا: طريقة عمل
صوص الشوكولاتة.
v
مكونات ومقادير
صوص الشوكولاتة:
·
كباية سكر بودرة ناعم.
·
كباية لبن.
·
كباية زيت نباتي خفيف (زيت ذرة او عباد الشمس).
·
4 معالق كبار كاكاو خام.
·
معلقتين كبار كريم شانتيه.
·
معلقة صغيرة فانيليا، او ظرف فانيليا صغير.
v خطوات طريقة عمل صوص الشوكولاتة:
1.
هنجيب بولة او طبق كبير غويط ونحط فيه كباية سكر
البودرة بعد كده هنضيف عليهم 4 معالق كبار من الكاكاو الخام.
2.
هنضيف عليهم كباية اللبن ومعلقتين الكريم شانتيه
الكبار ومعلقة الفانيليا الصغيرة.
3.
هنبدأ نقلب كل مكونات صوص الشوكولاتة اللي حطناها
مع بعضها كويس جدا بالمعلقة لمدة 3 دقائق.
4.
بعد كده هبدأ نقلب كل المكونات دي بالمضرب (او
ممكن نضربها في الخلاط) كويس جدا لحاد ما تمتزج كل المكونات مع بعضها وميكونش في أي
كتل، عشان كده مدة التقليب بالمضرب او بالخلاط مش هتقل عن 10 دقائق عشان نتأكد ان
كل مكونات صوص الشوكولاتة اختلطت ببعضها.
5.
واحنا بنقلب هنبدأ نضيف آخر مكون معانا وهو كباية
الزيت النباتي، ولازم نخلي بالنا هنضيف الزيت النباتي بالتدريج مش مرة وااحدة
ونستمر في التقليب شوية.
6.
بعد ما نقلب كل مكونات صوص الشوكولاتة لمدة 10
دقائق، وتكون كل المكونات اختلطت ببعضها هنحط صوص الشوكولاتة في التلاجة شوية عشان
قوامه يتقل شوية، وبعدها يكون جاهز للاستخدام.
وبكده نكون وصحنا كل تفاصيل طريقة عمل صوص
الشوكولاتة💪💪.
ثانيا: طريقة عمل الكراميل
v
مكونات ومقادير
صوص الكراميل:
·
كباية ونص لبن.
·
معلقة ونصف كريم شانتيه كبيرة.
·
معلقة ونصف نشا كبيرة.
·
معلقة صغيرة فانيليا، أو ظرف فانيليا صغير.
·
كباية ونصف سكر.
·
معلقة كبيرة زبدة او سمنة.
v
خطوات طريقة
عمل صوص الكراميل:
1.
هنجيب بولة او أي طبق غويط ونحط فيه كباية ونص
لبن، وهنضيف عليها معلقة ونصف كريم شانتيه كبيرة، وكمان هنضيف عليهم معلقة ونصف كبيرة
نشا، وهنضيف عليهم كمان معلقة الفانيليا الصغيرة.
2.
هنبدأ نقلب كل المكونات دي بالمعلقة او بالمضرب
اليدوي، عشان تختلط ببعضها كويس لمدة 3 دقائق.
3.
في الخطوة دي هنجيب حلة صغيرة ونحطها على نار
هادية جدا ونحط فيها كباية ونصف سكر، وهنسيب السك شوية لحاد ما يبدأ ياخد لون ذهبي
من تحت.
4.
اول ما السكر يبدأ ياخد لون ذهبي من تحت، هنبدأ
نقلب فيه بالمعلقة من كل الاتجاهات لحاد ما السكر يسيح ويذوب معانا، ولازم نخلي
بالنا لازم النار تفضل هادية جدا عشان الكراميل ميتلسعش مننا ويبقي غامق.
5.
هنستمر في التقليب شوية لحاد ما السكر كله يسيح
معانا، بعد ما كل السكر يذوب هنضيف عليه خليط اللبن والنشا اللي عملناه في الخطوة
(1) و(2).
6.
بعد ما نضيف خليط اللبن على السكر السايح هنسمر
في التقليب كويس جدا على نار هادية، حتى لو السكر جمد مننا مرة تانية هنفضل نقلب
كويس لحاد ما السكر اللي جمد مننا يسيح تاني.
7.
اول ما السكر يذوب تاني ويسيح في خليط اللبن ويبدأوا
يختلطوا ببعض هنضيف معلقة الزبدة او السمنة على صوص الكراميل وهنستمر في التقليب
شوية لحاد ما معلقة السمنة تسيح خالص وتختلط بصوص الكراميل، وبعد كده نطفي النار على
صوص الكراميل ونفضيه من الحلة.
وبكده نكون وضحنا كل تفاصيل طريقة عمل الكراميل،
انشاء الله تجربوها وهتعجبكم 👍👍.
ثالثا: طريقة عمل اللبن المكثف.
v
مكونات ومقادير اللبن المكثف.
·
نصف كباية لبن بودرة.
·
نصف كباية سكر بودرة.
·
معلقتين كبار كريم
شانتيه.
·
نص كباية لبن.
·
معلقة صغيرة فانيليا، أو ظرف فانيليا صغير.
·
نص كباية زيت نباتي خفيف (زيت ذرة او عباد الشمس).
v
خطوات طريقة
عمل اللبن المكثف:
1.
اول خطوة في طريقة عمل اللبن المكثف هنجيب بولة
او طبق غويط ونحط فيه نصف كباية اللبن، ونضيف عليها كل المكونات الجافة اللي جهزناها،
اللي هي نصف كباية لبن البودرة ونصف كباية سكر البودرة ومعلقتين كبار كريم شانتيه
ومعلقة صغيرة فانيليا.
2.
هنقلب كل المكونات دي مع بعضها بالمعلقة لمدة 3
دقائق، بعد كده هنشيل المعلقة ونبدأ نقلب بالمضرب او الخلاط.
3.
واحنا بنقلب باللبن المكثف بالمضرب او الخلاط
هنبدأ نضيف نص كباية الزيت تدريجيا مع استمرار التقليب.
4.
هنستمر في التقليب لحاد ما نحصل على القوام التقيل
الناعم المناسب، وكمان تكون كل المكونات ذابت في الخليط ومفيش حاجة مكلكعة.
وبكده نكون وضحنالكم طريقة عمل اللبن المكثف،
وكمان وضحنالكم طريقة عمل الكراميل (صوص الكراميل) وكمان طريقة عمل صوص الشوكولاتة،
نتمنا اننا نكون وضحنالكم كل التفاصيل اللي انتوا عاوزينا وان شاء الله تجربوا كل
الصوصات دي وبأذن الله هتعجبكم، الجميل في الصوصات دي انها بتساعد جدا في تقديم
وتزيين الكيكات والحلويات سواء كانت الكيكة
الاسفنجية او كيكة البرتقال او كيكة الشوكوللاتة او
البان كيك او حتى الكنافة.
وزي ما وعدناكم بأذن الله هنحضرلم قريب جدا
الصوصات المالحة وكمان صوصات الفواكه، وطبعا متنسوش لو في عندكم أي استفسار او أي حاجة
مش واضحة يا ريت تسيبولنا كل اسئلتكم واستفساراتكم تحت في التعليقات👇👇، ولو في عندكم أي اكلة عاوزين تعرفوا طريقتها متترددوش ابدا وسيبولنا
اسمها في التعليقات تحت واحنا هنوضهالكم بالتفصيل في مقالات جديدة، جربوا طريقتنا
في صوصات الحلويات، بالهنا والشفا، ودمتم في صحة💪💪.
اكلات ممكن تعجبك:
وتقدري بردو تشتري أفضل أدوات المطبخ اللي هتساعدك وتوفر ليكي كتير وكمان بأسعار ممتازة من هنا