اتعلمي طريقة عمل احلي صينية نجرسكو بأسهل وصفة

اتعلمي طريقة عمل احلي صينية نجرسكو بأسهل وصفة  

النجرسكو يا جماعة!! يعني اللي عايزة تفرح جوزها واولادها لازم تعملهم الاكلة دي، لان الاكلة دي بصراحة ليها مكان خاص في قلوب الناس كلها، كل الاكيلة بيحبو النجرسكو، وعشان النجرسكو ناس كتير بتعتبرها اكلة صعبة شويتين وبيخافو يعملوها عشان متبوظش، قررنا احنا في موقع اطعم اكلات اننا نعملهالكو ونوضحهالكو بالتفصيل الممل بكل خطوات تحضيرها وكل المقادير اللي محتاجاها اكلة النجرسكو.

وقبل ما نخش فخطوات التحضير لازم كلنا نكون عارفين ان النجرسكو هي عبارة عن مكارونة بالبشاميل بس بدل ما نحط لحمة مفرومة بنحط قطع فراخ، يعني الالكلة دي بتتكون من مكرونة وبشاميل وفراخ اللي هما الحاجات اللي مجرد ما بنسمع اسمهم بنكون بنفرح لواحدنا!! ما بالك باه لو اكلنا كل الحاجات دي كلها مع بعض 💖😍، صدقوني النجرسكو ليها تأثير جميل جدا علي الكرش وعلي المزاج  😅😂.

 مكونات وبهارات بشاميل النجرسكو:

• معلقتين سمنة كبار.
• معلقتين ونص دقيق كبار.
•  1 لتر لبن.
• مكعب مرقة دجاج.
• معلقة كبيرة كريمة طبخ او معلقة كبيرة جبنة كريمي.
• كوباية كبيرة شوربة.
• معلقة ملح صغيرة.
• معلقة فلفل اسود صغيرة.
• رشة جوز الطيب.

مكونات وبهارات حشو النجرسكو و(تتبيلة الفراخ):

• بصلة حجمها متوسط.
• قرن فلفل اخضر رومي.
• معلقتين زيت.
• 3 فصوص ثوم متقطعين شرائح.
• صدر فرخة كبير كامل مسلوق.
• نصف كوباية زيتون مخلي ومتقطع شرائح.
• كيس مكرونة كامل.
• جبنة موتزاريلا.
• معلقة ملح صغيرة + معلقة فلفل صغيرة + معلقة بابريكا صغيرة.

طريقة عمل النجرسكو وخطوات تحضيره :

طريقة عمل النجرسكو مشكلتها هي ان خطواتها ومكوناتها كتير، لكن لو جينا نبص علي تحضيرها فهو سهل جدا ،بس طبعا اكلة جميلة زي النجرسكو لازم تتعمل بتركيز كبير جدا عشان تطلع زي ما احنا عاوزينها وكمان عشان منهدرش منها حاجة، فياريت نركز كويس جدا مع بعض في الخطوات اللي هنقول عليها دي 👇👇.

v      اول حاجة هنبدأ بيها اننا هنجهز المكرونة وهنسلقها، وعلي فكرة احنا ممكن نستخدم اي نوع مكرونة، يعني في ناس بتحب تستخدم المكرونة الاقلام، وفي ناس تانية بتحب تستخدم الاسباجيتي، وطبعا انتو وراحتكو.

v      تاني حاجة هنعملها البشاميل، وده لازم نركز فيه جدا جدا لان البشاميل يعتبر هو نكهة اكلة النجرسكو اصلا، وهنبدأ في تجهيزه بالخطوات دي 👇👇:

1. هنحط حلة على النار ونحط فيها معلقتين السمنة الكبار ونسيبها لحاد ما تسيح.

2. اول ما السمنة تسيح هنحط عليها معلقتين ونص دقيق ابيض كبار ونقلبهم مع بعض.

3. واحنا بنقلب ننزل عليهم بلتر اللبن بالراحة ويفضل ان اللبن يكون بارد، وطبعا نستمر في التقليب.

4. بعد كده هنضيف مكعب مرقة الدجاج ومعلقة كبيرة كريمة طبخ او (معلقة كبيرة جبنة كريمي) حسب المتوفر في البيت وقتها،

ونقلب باستمرار كويس جدا.

5. بعد كده هنضيف كوباية الشوربة الكبيرة ونضيق معاها معلقة ملح صغيرة ومعلقة فلفل اسود صغيرة مع رشة جوز الطيب، ونفضل نقلب نقلب باستمرار لحاد ما يبدأ البشاميل يمسك فنفسه ويعمل قوام متماسك شوية، وبكده يكون الشاميل خلص.

v      تالت حاجة هنبدأ في تحضير الحشو بتاع النجرسكو:
1. هنقطع البصلة وقرن الفلفل قطع صغيرة خالص، وممكن بردو نبشرهم بالمبشرة.
2. هنحط طاسة او حلة على النار ونحط فيها معلقتين كبار زيت، وبعد كده ننزل البصل والفلفل في الزيت ونقلبه شوية (نشوحهم على خفيف).
3. اول ما البصل والفلفل يبدأوا يتشوحو ننزل عليهم ب 3 فصوص ثوم متقطعين شرائح، (وعلى فكرة واحنا بنعمل الخطوة دي ممكن نضيف شوية ماشروم لو متوفر في البيت في الوقت ده والكمية اللي هنستخدمها مش هتكون اكتر من كوباية ماشروم متقطع شرايح، في ناس طبعا مش بتحب تضيف ماشروم، ليكم طبعا حرية الاختيار في الخطوة دي، عشان كده مكتبناش الماشروم في المكونات).
4. بعد كده هنكون مجهزين صدور الفراخ وسالقينها ومنضفينها وخاليينها من اي عضم، وهنقطعها ونفتلها قطع صغيرة وبعدين نضيفها مع في الطاسة مع البصل والفلفل والثوم، كل ده طبعا واحنا بنقلب باستمرار.
5. وبعدين هنضيف للتتبيلة دي نصف كوب الزيتون المخلي (وممكن في الخطوة دي نستخدم زيتون اسمر او زيتون اخضر اهم حاجة انه يكون مخلي ومتقطع شرائح) والبهارات اللي هي معلقة ملح صغيرة ومعلقة فلفل اسود صغيرة ومعلقة بابريكا، ونقلبهم شوية على النار لمدة 3 دقائق وبكدة يكون حشو النجرسكو جاهز.

وبكده تكون كل مكونات النجرسكو جاهزة ودلوقتي هنبدأ نجهز صينية النجرسكو:

v      رابع حاجة هنجيب الصينية اللي هنسوي فيه النجرسكو (يفضل تكون صينية غويطة)، وهنبدأ نعمل في الخطوات دي 👇👇:
1.  هندهن الصينية زيت وبعدين نبدأ نحط طبقة بشاميل كبيرة ونوزعا كويس في الصينية.
2. وبعد كده نحط طبقة مكرونة مسلوقة وفي الخطوة دي هنحط نصف كمية المكرونة اللي معانا.
3. وبعد كده هنغرق المكرونة بطبقة بشاميل تانية، وبعد كده هنحط خلطة الحشو اللي احنا جهزناها ونفردها نوزعها كويس فوق المكرونة والبشاميل.
4. بعد كده هنحط طبقة جبنة موتزاريلا فوق خلطة الحشو وبردو نفردها كويس.
5. بعدها نحط طبقة بشاميل تاني فوق الجبنة، وفوق البشاميل على طول نحط باقي كمية المكرونة.
6. آخر حاجة هنحط باقي كمية البشاميل اللي معانا ونفردها كويس على المكرونة، وبعدين نحط على البشاميل طبقة جبنة موتزاريلا وبكده تكون صينية النجرسكو جاهزة.
7. بعد كده قبل ما نيجي نقدم النجرسكو بنصف ساحة ندخلها الفرن ويفضل يكون سخن، ونسيبها في الفرن لمدة نصف ساعة على درجة حرارة 200، وبعد كده نطلعها ونقطعها ونقدمها وهي سخنة وبالهنا والشفا.

وبكده نكون عملنا معاكم الصح ووضحنالكم كل اسرار النجرسكو، وكل تفاصيل الاكلة وخطوات تحضيرها، نتمنا من ربنا انها تعجبكو، وياريت تجربوها وتعملوها بالوصفة بتاعتنا دي، هتعجبكم جدا، وياسلام بأه وانتو بتقطعوها وبتقدموها هتلاقوها سايحة خالص وشكلها يفتح النفس، جربوها ومش هتندمو ابدا، اكلة النجرسكو المميز فيها ان الكل بيحبها سواء كبار او صغيرين، ده غير انها مفيدة جدا ومليانة عناصر غذائية كتير خد عندك فيتامينات متعددة وكربوهيدرات وطبعا نسبة بروتين عالية في صدور الفراخ وطبعا لو في عندكو اي استفسارات او اي حاجة مش واضحة سيبوهالنا تحت في التعليقات وطبعا لوفي أي ملاحظات أو اي اكلة محتاجين تعرفوها سيبولنا اسمها في التعليقات واحنا هنشرحهالكم بالتفصيل في مقالة جديدة علي الموقع، شكرًا لاهتمامكم ودمتم في صحة💪💪.

اكلات ممكن تعجبك:

• طريقة عمل الفراخ الصينى.
• طريقة عمل فراخ ستربس.
• طريقة عمل الكنافة النابلسية.
• طريقة عمل العجة التركية.
• طريقة عمل البان كيك | البان كيك الأصلي.
• اصابع البطاطس الهندية المقلية المقرمشة.

وتقدري بردو تشتري أفضل أدوات المطبخ اللي هتساعدك وتوفر ليكي كتير وكمان بأسعار ممتازة من هنا