احلي كريب شاورما فراخ يستاهل بؤك

احلي كريب شاورما فراخ يستاهل بؤك

كريب شاورما الفراخ، وسع وسع يا عم الحاج خلاص وصل الراعي الرسمي للكرش المصري، المرة دي جايبين لكم اكلة الكل بيحبها وعاوزينها وناس كتير جدا بيتمنوا انهم يجربوا يعملوها في البيت، عشان يعملوها على مزاجهم ويضيفوا لكريب شاورما الفراخ كل اللي هما عاوزينه وعلى مزاجهم، عشان كده قررنا اننا نساعد كل الناس دي ونجيبلكم طريقة عمل الشاورما، وكمان طريقة عمل عجينة الكريب.
عشان نعمل مع بعض احلي كريب شاورما فراخ في العالم، وعشان في ناس كتير شايفة ان الاكلة دي صعبة وبتخاف انها تعملها في البيت قررنا اننا نقسملكم الاكلة لوصفتين عشان منتلبخش واحنا بنعملها، الوصفة الاولي هتكون عن طريقة عمل عجينة الكريب وعيش الصاج بحيث نجهزه في الأول علما نعمل الفراخ شاورما، والوصفة التانية هتكون عن طريقة عمل الشاورما، وبعد كده هنوضحلكو ازاي نحط شاورما الفراخ في العيش اللي هنعمله من عجينة الكريب وازاي نلف كريب شاورما الفراخ ونجهزه، يلا بينا نشوف مكونات وطريقة عمل كريب شاورما الفراخ.

مكونات ومقادير عجينة الكريب (عيش الصاج):

·         نصف كيلو دقيق ابيض.

·         نصف معلقة ملح صغيرة.

·         كوبايتين مية كبار.

·         بيضة.

·         معلقة لبن بودرة.

·         4 معالق زيت.

طريقة عمل عجينة الكريب:

خلو بالكم معانا كويس جدا في طريقة عمل عجينة الكريب عشان دي من اكتر الحاجات اللي بتخلي الكريب طعمه جميل جدا، وكمان احنا ممكن نستخدم العيش ده في عمل سندوتشات شاورما سوري.

1. اول خطوة هنعملها اننا هنجيب أي حلة او إناء غويط ونحط فيه نصف كيلو دقيق ابيض.

2. بعد كده هنحط نص معلقة الملح الصغيرة على الدقيق ونقلبهم شوية مع بعض بالمعلقة، بعد كده هنضيف عليهم البيضة و معلقة اللبن البودرة و4 معالق الزيت ونقلبهم شوية صغيرين مع بعض.

3. هنبدأ نضيف الكوباية المية الاولي على الدقيق ونقلب بالمعلقة او بادينا او بالمضرب اليدوي.

4. واحنا بنقلب العجينة الكريب هنلاحظ انها تقيلة هنقوم ضايفين كوباية الماية التانية ونستمر في التقليب كويس جدا لحاد ما الدقيق والماية يختلطو ببعض بشكل كامل.

5. لازم قوام عجينة الكريب يكون خفيف شوية يعني أخف من قوام عجينة الكيك بحاجة بسيطة.

6. بعد ما نخلص العجينة هنسيبها ترتاح خمس دقايق ونروح نحضر صنية تحضير عيش الصاج، ممكن نستعمل طاسة او صنية تيفال هتساعدنا جدا ولو مفيش صنية تيفال عادي جدا هنستخدم أي صنية عندنا.

7. هندهن الصنية كلها من جوة بالزيت، بعد كده هنحط الصنية على نار هادية وبعدين هناخد مقدار كوباية متوسطة من عجينة الكريب اللي جهزناها ونبدأ ننزلها في الصينية ونفردها ونوزعها كويس في الصينية.

8. بعد كده هنلاحظ ان أطراف عجينة الكريب لونها بيبدأ يتغير، في اللحظة دي هنحرك الأطراف دي بطرف المعلقة عشان متلزقش في الصنية.

9. بعد شوية هنلاحظ ان عجينة الكريب كلها لونا اتغير من اللون الأبيض الي اللون الصفر او الأبيض المسفر، ده معناه اننا نقدر نحرك العجينة بأدينا ونشوفها من تحت إذا كانت اتحمرت ولا لسة.

10.  بعد ما وش العجينة التحتاني يتحمر نبدأ نقلب العجينة علي الو شالتاني بادينا او بالمعلقة او باستخدام أي حاجة، ونسيبه بردو لما يتحمر ونشيله وبكده يكون عيش الكريب جاهز.

11.  نكرر الخطوات اللي فاتت دي مع العجينة كلها او علي حسب المقدار اللي احنا عاوزينه، والعيش اللي يجهز نرتبه فوق بعضه في طبق خارجي.

بعد ما خلصنا عجينة الجريب وسويناها وعملنا منها العيش بتاع الكريب اللي هو عيش الصاج، هنتعرف دلوقتي على طريقة عمل الشاورما، وعلى فكرة شاورما الفراخ سهلة جدا وأي حد ممكن يعملها، هي محتاجة بس شوية تركيز في التتبيلة عشان طعمها ميبوظش مننا، فاحنا لازم نركز كويس جدا في مكونات وبهارات الشاورمة وطريقة عمل الشاورما اللي هنقولهالكم دلوقتي👇👇.

مكونات وبهارات شاورما الفراخ:

·         علبة زبادي.

·         3 صدور فراخ.

·          لمونة معصورة.

·         معلقتين خل كبار.

·         نصف معلقة ثوم مفروم.

·         بصلاية صغيرة متقطعة انصاص حلقات.

·         قرن فلفل رومي صغير متقطع.

·         طماطماية صغيرة جامدة متقطعة ومخلية من البزر.

البهارات:

·         معلقة بابريكا صغيرة.

·         معلقة ثوم بودر صغيرة..

·         معلقة بصل بودر صغيرة.

·         معلقة كبيرة بهارات فراخ.

·         معلقة صغيرة فلفل اسمر.

·         ربع معلقة حبهان مطحون صغيرة.

·         نصف معلقة ملح صغيرة.

طريقة عمل الشاورما وخطوت تحضيرها:

1.  في الأول لازم نخلي صدور الفراخ من العضم وننضفها كويس جدا وبعدين نقطعها قطع صغيرة عشان تبقي جاهزة للشاورما.

2. بعد ما ننضف الفراخ كويس ونقطعها هنحطها في إناء حجمه مناسب وبعد كده هنحط عليها الزبادي والخل والليمون والثوم والبهارات اللي ذكرناها فوق دي 👆👆.

3. بعد كده هنقلب الفراخ بالمكونات دي كلها كويس جدا بحيث ان التتبيلة تتوزع كويس على كل قطع الفراخ، ونسيب الفراخ تتبل لمدة ساعة.

4. بعد ما الساعة خلصت والفراخ اخدت التتبيلة بتاعتها، هنجيب طاسة ونحطفيها معلقتين زيت كبار ونحطها على نار متوسطة ونستنا الزيت لما يسخن.

5. بعد كده هننزل بالفراخ في الزيت السخن بالراحة خالص ونسيب الفراخ على النار شوية لحاد ما نحس انها بدأت تنشف بعد كده هنبدأ نقلبها في الزيت لحاد ما تاخد اللون الذهبي، ونفضل نقلب فيها باستمرار لحاد ما تستوي.

6. اول ما نحس ان الفراخ استوت كويس هنضيف عليها البصلاية المتقطعة وهنفضل نقلبهم مع بعض لمدة دقيقتين لحاد ما البصلاية تبقي مستوية نص تسوية كدة.

7. بعد كده هنضيف الفلفل المتقطع ونقلب شوية وفي الاخر هنضيف الطماطم ونقلب شوية صغيرين وبعد كده نطفي النار عليها، وبكده تكون شاورما الفراخ جاهزة.

لفة الكريب وتحضيره للتقديم:

بعد ما جهزنا شاورما الفراخ وعجينة الكريب، دلوقتي باه هنلف الكريب ونحط فيه الحشو بحيث يكون جاهز للتقديم، ولازم ناخد بالنا من ان حشو الكريب اللي بيتحط مع الشاورما بيختلف حسب ذوق اللي بيعمله وعلي حسب الطلب بردو، ركزو معانا في الخطوات دي👇👇:
1. اول حاجة هنجيب العيس اللي عملناه ونتنيه نصين بالشكل ده👇👇.

2.      بعد كده هنحط شاورما الفراخ اللي جهزناها، وهنحط الحشو بردو ممكن نحط شوية شرايح زيتون مخلي، وممكن نحط شوية جبنة موتزاريلا او شيدر، وممكن نحط شزية مايونيز او مستردة او كاتشب، وممكن نحط الحاجات دي كلها مع بعض علي حسب الطعم اللي انت عاوزه.
3. يفضل اننا نحط الحشو وشاورما الفراخ على شكل مثلث في وسط العيش.
4. بعد كده هنقفل الكريب عن طريق اننا هنجيب اطرافه ونلمها علي الحشو عشان يبقي في الآخر علي شكل مثلث.
5. بهد كده هنحمر الكريب شوية علي النار من الوشين ، في طاسة فيها معلقة زيت كبير، وبعد كده نطلع الكريب وبكده يكون الكريب جاهز للتقديم.

نتمنا اننا نكون وضحنالكم كل التفاصيل اللي محتاجينها عن شاورما الفراخ وعن طريقة عمل عجينة الكريب، ولو في عندكو أي استفسارات او أي حاجة مش واضحة في الوصفة يا ريت متترددوش وسيبوهالنا تحت في التعليقات واحنا بأذن الله هنرد عليكم في اسرع وقت ممكن، ولو في بردو أي اكلة عاوزين تجربوها وطريقتها مش واضحالكم سيبولنا اسمها في التعليقات واحنا هنجيبهالكم ونوضحهالكم في مقالة تانية، جربو كريب شاورما الفراخ علي طريقتنا هتدعولنا، بالهنا والشفا ودمتم في صحة 💪💪.

اكلات ممكن تعجبك:

• اسرار طريقة عمل الكيكة بالشوكولاته.
• طريقة عمل المكرونة بالبشاميل.
• اهم اسرار طريقة الكنافة النابلسية بالتفصيل.
• طريقة عمل اكلة المانتي التركي | اكلات تركية.
• طريقة عمل كريب شاورما الفراخ بكل سهولة.
• طريقة عمل اجنحة الدجاج.

وتقدري بردو تشتري أفضل أدوات المطبخ اللي هتساعدك وتوفر ليكي كتير وكمان بأسعار ممتازة من هنا