أسرار طريقة عمل الكيكة بالشوكولاته في البيت بطعم
أجمل من المحلات
لان الكيكة بالشوكولاتة هي اكتر حلو بيفضله
أولادنا وبيحبوه جدا، قررنا نحضر لكم طريقة عمل
الكيكة الاسفنجية
بالشوكولاتة، عشان تكون أجمل بكتير من كيكة المحلات وكمان عشان نعملها في رمضان
ونحلى بيها بعد الفطار، لأننا كلنا عارفين طبعا ان كيكة الشوكولاتة بتكون خفيفة
جدا وسريعة الهضم، وزي ما عملنا لكم حلويات كتير سهلة وجميلة زي طريقة عملالكنافة النابلسية، وطريقة عملالبسبوسة، هنوضحلكم المرة دي طريقة عمل
الكيكة الاسفنجية
بالشوكولاتة.
طبعا طريقة عمل الكيكة بالشوكولاته، سهلة جدا ومش
هنحتاج فيها أدوات كتير خالص ولا مكونات كتير كل اللي هنحتاجه فعلا في طريقة عمل
الكيكة بالشوكولاته شوية صبر لأننا لازم نضرب البيض فترة كبيرة عشان يكون جاهز،
وكمان لازم ننخل الدقيق كتير عشان يدخل فيه هوا، وطبعا كل ده بيخلى قوام الكيكة
اسفنجي، وكمان بيخلي طعمها جميلا جدا، ودلوقتي يلا بينا نشوف المقادير والمكونات
اللي هنستخدمها في طريقة عمل الكيكة بالشوكولاته.
مكونات الكيكة الاسفنجية بالشوكولاتة:
- 6 بياض بيض.
- 6 صفار بيض.
- كباية ونصف دقيق ابيض.
- معلقة كبيرة / كيس بكينج باودر.
- معلقتين كبار كاكاو خام.
- معلقة صغيرة فانيليا.
- كباية كبيرة سكر.
- ربع كباية مية.
خطوات طريقة عمل الكيكة بالشوكولاته:
قبل ما نبدأ في خطوات طريقة
عمل الكيكة الاسفنجية
بالشوكولاتة، لازم نخلي بالنا ان الاواني اللي هنجهز فيها الكيكة لازم تكون نظيفة
جدا ومفيش فيها أي نقطة مية، وكمان لازم ننخل الدقيق كتير جدا عشان الهوا يدخل
جواه ويعطي للكيكة قوام اسفنجي جميل جدا.
1. في
الأول هنجيب كباية ونصف من الدقيق ونحطهم في طبق، وهنضيف عليهم معلقة كبيرة من
البكينج باودر وكمان هنضيف عليهم معلقتين كبار من الكاكاو الخام، ونقلبهم كويس جدا
مع بعض بالمعلقة لحاد ما يختلطوا كويس جدا مع بعض، وهنسيب الخليط ده على جنب
دلوقتي.
2. بعد
كده هنجيب 6بياض بيض صافي ونحطه في بولة ونبدأ نقلبه كويس ونضربه بالمضرب لمدة
دقيقتين.
3. بعد
كده هنضيف على بياض البيض نصف كمية السكر اللي جهزناها (نصف كباية سكر)، وبعد كده
هنستمر في ضرب بياض البيض مع السكر لحاد ما بياض البيض ينفش ويتحول لونه للون
الأبيض وكمان يبقى تقيل وحجمه يتضاعف ويكون شبه رغوة الصابون الثقيلة، والخطوة دي
ممكن تاخد 15 دقيقة.
4. بعد ما
نجهز بياض البيض هنسيبه شوية على جنب، وهنعمل نفس الخطوة دي مع صفار البيض، لكن
قبل ما نبدأ في ضرب صفار البيض هنضيف عليه معلقة صغيرة من الفانيليا، وبعد كده
هنبدأ في ضرب صفار البيض بالمضرب لمدة دقيقتين.
5. بعد
الدقيقتين هنضيف كمية السكر الباقية على صفار البيض (نصف كباية سكر) وكمان هنضيف ربع كباية من
المية، وبعد كده
هنستمر في ضرب صفار البيض لمدة لا تقل عن 15 دقيقة بحيث يتضاعف حجم صفار البيض ويتحول
لونه الى اللون الأبيض المسفر، ويبقى شبه رغوة الصابون الثقيلة جدا.
6. وبكده
نكون جهزنا بياض البيض وصفار البيض، ودلوقتي هنضيف صفار البيض على بياض البيض
ونقلبهم مع بعض بالمعلقة بالراحة خالص عشان الهوا ميخرجش خالص من البياض والصفار،
ولازم ناخد بالنا اننا نقلب الصفار مع البياض من تخت لفوق.
7. بعد ما
نقلب الصفار مع البياض ويمتزجوا كويس جدا مع بعضهم، هنبدأ نضيف عليهم خلطة الدقيق
والكاكاو البكينج باودر اللي جهزناها في أول خطوة، بس مينفعش نضيف كل كمية الدقيق
مرة واحدة على البيض عشان نعرف نقلبهم كويس مع بعض.
8. هنقسم
مقدار الدقيق والكاكاو والبكينج باودر على 3 مرات، وقبل ما نضيف الدقيق في كل مرة
هننخله بالمنخول او بالمصفة عشان يدخل جواه هوا، وبعد كده هنبدأ نقلب الدقيق مع
البيض بالمعلقة بالراحة خالص لحد ما مقدار الدقيق اللي اضفناه يمتزج كويس جدا مع البيض
وميكونش مكلكع.
9. هنكرر
الخطوة دي مع ال 3 مقادير الدقيق ولازم نخلي بالنا كويس جدا لازم نقلب الدقيق كويس
جدا مع البيض عشان ميكلكعش.
10. بعد
كده هنجيب الصينية اللي هنسوي فيها الكيكة في الفرن ويفضل اننا ندها في الأول بطبقة
من الزيت، وكمان يفضل اننا نغلف الصينية من جوة بورق الزبدة او الورق الحراري،
عشان بعد ما نسوى الكيكة في الفرن نقدر نخرجها من الصينية بسهولة ومتلزقش في
الصينية.
11. بعد ما
نغلف الصينية هنبدأ ننزل فيها كل كمية الكيكة بالشوكولاتة بتاعتنا، وبعد كده هنبدأ
نساوي وش الصينية بالسكينة عشان ميكنش في جزء اعلى من جزء وكمان عشان الحرارة
تتوزع على صينية الكيكة بالتساوي.
12. هنكون
مشغلين الفرن قبل ما ندخل فيه كيكة الشوكولاتة بفترة متقلش عن 10 دقايق، ودلوقتي
هندخل صينية الكيكة بالشوكولاتة في الفرن على درجة حرارة 180 (درجة حرارة اعلى من
المتوسطة بشوية) وهنسيبعا لفترة تتراوح بين 30 و45 دقيقة.
ملحوظة مهمة جدا: يفضل اننا منفتحش الفرن على الكيكة ابدا الابعد ما يعدي على الكيكة في الفرن مدة متقلش عن 30 دقيقة، يعني بعد ما يمر نص ساعة بالضبط هنبدأ نفتح الفرن على الكيكة عشان نشوفها استوت ولا لسة محتاجة اتها تستنى شوية في الفرن.
وبكده
نكون وضحنا لكم كل اسرار طريقة عمل الكيكة بالشوكولاته، وطبعا بعد ما نخلص كل
خطوات طريقة عمل الكيكة بالشكولاته لازم نزين الكيكة بأي زينة يكون شكلها جميل
وكان طعمها جميل زي صوصات
الحلويات (صوص الكراميل والحليب المكثف وصوص الشوكولاتة) وكمان ممكن نزينها
بالسكر البودرة أو قطع الشوكولاتة او أي حاجة يفضلها ويحبها افراد الاسرة.
نتمنا تجربوا طريقة عمل الكيكة بالشوكولاته بتاعتنا،
وطبعا لو في عندكم أي استفسار او أي ملحووظة او أي حاجة مش واضحة في وصفة طريقة
عمل الكيكة بالشوكولاته متترددوش ابدًا، انكم تبعتولنا كل استفساراتكم في الرسايل على
صفحتنا في الفيس بوك او في صفحة اتصل بنا او ممكن تسيبولنا كل استفساراتكم تحت في
التعليقات 👇👇 واحنا هنرد
عليكم في أسرع وقت، جربوا طريقة عمل الكيك بالشوكولاتة بألف هنا وشفا، ودمتم في صحة 💪💪.
اكلات ممكن تعجبكم:
- طريقه البان كيك الأصلي / وصفة البان كيك الأصلية.
- طريقة عمل العجة التركية.
- اصابع البطاطس الهندية المقلية.
- طريقة عمل كريب شاورما الفراخ.
- طريقة عمل البوتين الكندي (اكلة بوتين الكندية).