طريقة عمل الترمس والحمص والحلبة | تسالي شم النسيم
بما اننا عملنا لكم قبل كده كريقة عمل الفسيخ وطريقة
عمل الرنجة وكمان طريقة عمل الفطير المشلتت عشان شم النسيم، قررنا المرة دي نعملكم
تسالي شم النسيم عشان يومنا يكمل واجازتنا تكون جميلة، هنوضحلكم في المقالة دي طريقة
عمل الترمس وطريقة عمل الحمص، وكمان طريقة عمل الحلبة، ولازم نعرف كلنا ان طريقة عمل
كل التسالي دي سهلة جدا وبسيطة خالص ومش هتاخد مننا أي مجهود.
عشان منتلغبطش ومنلبخش نفسنا، هنقسم طريقة عمل
الترمس وطريقة عمل الحمص وطريقة عمل الحلبة وهنعمل كل واحدة منهم لواحدها في خطوة،
يلا بينا دلوقتي نشوف المكونات والخطوات بتاعتنا 👇👇.
أولا: طريقة عمل الترمس
هنستخدم:
- كيلو ترمس.
- 4 ملاعق ملح كبار.
- معلقة كبيرة كمون. (اختياري)
خطوات طريقة عمل الترمس:
1.
في الأول هنجيب كيلو الترمس ونبدأ ننقيه وننضفه
من كل الشوائب اللي بتكون فيه.
2.
بعد كده هنبدأ ننقع الترمس في شوية مية لمدة يوم
كامل (24 ساعة) عشان المرارة تروح منه ويكون جاهز للتمليح.
3.
بعد ما نقعنا الترمس لمدة يوم كامل، هنبدأ نصفي
الترمس من المية اللي اتنقع فيها، وكمان هنغسله كويس تحت الحنفية.
4.
بعد كده هنحط على الترمس شوية مية كويسين ونحطهم
في حلة ونحطهم على النار عشان نسلق الترمس، وهنسيب الترمس على النار لمدة 20 : 30
دقيقة.
5.
بعد ما الترمس يتسلق، نضيف عليه 4 ملاعق ملح كبار
وكمان معلقة كمون كبيرة ونقلبهم كويس جدا مع بعض عشان الملح يذوب كويس في المية.
6. بعد كده
هنسيب الترمس شوية (لمدة متقلش عن 4 ساعات) لحاد ما طعم الترمس يبدأ يتحول من مر
لمالح ويكون كده جاهز للتقديم.
ملحوظة مهمة: لو الترمس طلع مالح زيادة، ممكن نصفيه من المية الي هو فيها ونحطه في مية مفيش فيها ملح ونسيبه شوية هنلاقي ان طعمه اتظبط.
ثانيا: طريقة عمل الحلبة
هنستخدم:
- كباية كبيرة حلبة حصا.
خطوات طريقة عمل الحلبة:
1.
اول حاجة هنجيب الحلبة وننضفها وننقيها عشان تكون
جاهزة.
2.
بعد كده هنحط الحلبة في أي وعاء ونحط عليها شوية
مية وننقعها في المية لمدة يوم كامل (24 ساعة).
3.
بعد ما ننقع الحلبة مدة متقلش عن 24 ساعة، هنبدأ
نصفي الحلبة من المية وبعد كده هنبدأ نفرك الحلبة شوية بالراحة
بين أيدينا.
4.
بعد كده هنجيب مصفة كبيرة ونحط تحتها واي طبق كبير،
وبعدين نفرد كل حبات الحلبة على المصفة.
5.
بعد كده هنجيب أي شاشة او فوطة نضيفة ونبلها مية
ونحطها على الحلبة، وهنسيب الحلبة لمدة متقلش عن 3 أيام عشان تنبت وتبقى جاهزة.
6. خلال ال
3 أيام كل شوية نبص الحلبة ولو لقينا الفوطة نشفت من المية نرش عليها شوية مية
قليلين عشان تتبل ومتبقاش ناشفة، وبكده نكون جهزنا الحلبة لشم النسيم.
ثالثا: طريقة عمل الحمص.
هنستخدم:
- نصف كيلو حمص.
خطوات طريقة عمل الحمص:
1.
هنبدأ بردو بتنضيف الحمص كويس جدا، وبعد كده
ننقعه في المية لمدة متقلش عن يوم كامل (24 ساعة).
2.
بعد ما ننقع الترمس لمدة متقلش عن (24 ساعة)،
هنبدأ ننضفه تحت الحنفية كويس جدا من المية اللي اتنقع فيها، لان المية دي بتكون شايلة
مرارة الحمص.
3.
بعد كده هنحط الحمص في حلة ونحط عليه شوية مية
ونبدأ نغليه مع المية لمدة 20 : 30 دقيقة، (على حسب ما يكون الحمص استوا).
4. بعد ما
الحمص يستوي هنحطه مع الترمس في المية المالحة عشان يتملح معاه، وبعد مدة متقلش عن
4 ساعات هنلاقي ان الحمص والترمس اتملحوا كويس جدا وطعمهم كمان بقي جمييل جدا.
وبكده نكون وضحنا لكم طريقة عمل الترمس وطريقة
عمل الحمص وطريقة عمل الحلبة عشان نسلي نفسنا في يوم شم النسيم، هنقدم الحمص
والحلبة والترمس مع بعض في طبق واحد وممكن كمان نعصر عليهم لمونة ونحط عليهم رشة
شطة في وقت التقديم.
نتمنى نكون وضحنا لكم كل اللي محتاجينه عن طريقة
عمل الترمس وطريقة عمل الحمص وطريقة عمل الحلبة، ونتمنى بردو انكم تجربوا طريقتنا
دي وتقولولنا على آراءكم تحت في التعليقات 👇👇، وطبعا لو
في عندكم أي اكلات جديدة او لو في عندكم أي استفسارات ممكن تسيبولنا استفساراتكم
في التعليقات او ممكن تبعتولنا استفساراتكم في رسالة على صفحتنافي الفيس بوك، وبأذن الله هنرد عليكم في اسرع وقت، كل سنة وانتم طيبين ويوم شم
النسيم سعيد عليكم، ودمتم في صحة 💪💪.
اكلات ممكن تعجبك:
- طريقة عمل الفطير المشلتت.
- طريقة عمل الفسيخ والرنجة.
- طريقة عمل كيكة الشوكولاته.
- طريقة عمل الكنافة النابلسية.
- طريقة عمل الفراخ ستربس.
وتقدري بردو تشتري أفضل أدوات المطبخ اللي هتساعدك وتوفر ليكي كتير وكمان بأسعار ممتازة من هنا