طريقة عمل الفطير المشلتت الفلاحي | أكلات مصرية لشم النسيم
طبعا كل الناس بتحب الفطير المشلتت، بس للأسف مش
كل الناس بتعرف طريقة عمل الفطير المشلتت الفلاحي الأصلي، وبما ان شم النسيم خلاص
قرب قررنا موضح لكم طريقة الفطير المشلتت الفلاحي على اصوله، عشان نعمله في البيت
بخيره ويكون مضمون وكمان طعمه يكون فلاحي جدا وبلدي وأجمل من فطير الافران اللي
بنشتريه من برة.
الجميل في طريقة عمل الفطير المشلتت انها مش
بتحتاج مكونات كتير خالص بالعكس مكونات طريقة الفطير المشلتت الفلاحي بتكون بسيطة
جدا وموجودة على طول في البيت، وبأذن الله في المقالة دي هنبسط لكم كل خطوات طريقة
عمل الفطير المشلتت وطوات عمل عجينة الفطير المشلتت، عشان كلنا نعمله في البيت بكل
سهولة، وكمان عشان لو جالنا ضيوف في شم النسيم نرفع راسنا قدامهم ونفتخر اننا
عاملين الفطير المشلتت الفلاجي الجميل ده في البيت بأدينا، يلا بينا دلوقتي نشوف
المكونات اللي هنستخدمها في طريقة الفطير المشلتت 👇👇.
مكونات ومقادير الفطير المشلتت:
·
كيلو ونصف دقيق ابيض.
·
2 لتر ماء.
·
ملعقة كبيرة ملح.
·
نصف كباية زيت.
·
كباية كبيرة زبدة سايحة.
خطوات طريقة عمل الفطير المشلتت:
ملحوظة مهمة جدا: يا جماعة الدقيق اللي هنستخدمه في طريقة الفطير المشلتت لازم يكون دقيق نضيف جدا ومن مكان كويس جدا ومعتمد لان نسبة كبيرة من نجاح الفطير المشلتت بيكون متوقفة على جودة الدقيق، عشان كده لازم يكون الدقيق كويس جدا وفي ناس فعلا مجرباه في الفطير المشلتت وظبط معاها.
عجينة الفطير المشلتت:
1.
اول حاجة هنجيب الدقيق ونحطه في بولة او حلة
كبيرة ونضيف عليه معلقة الملح الكبيرة، وبعد كده نقلب الدقيق والملح مع بعض كويس
جدا عشان الدقيق والملح يختلطوا ببعضهم كويس.
2.
بعد كده هنبدأ نضيف المية على الدقيق شوية بشوية،
وكل ما نضيف شوية مية نقلب الدقيق والمية مع بعض بأدينا ونعجن كويس جدا.
3.
نستمر في إضافة المية وتقليب الدقيق مع المية
لحاد ما كمية المية اللي معانا تخلص ونلاقي ان الدقيق والمية بدأوا يكونوا لنا
العجينة بشكل كويس.
4.
هنستمر شوية في العجن لمدة متقلش عن 10 دقايق
عشان العجينة تكون كويسة معانا وكمان ناعمة.
5. بعد ما
عجنا عجينة الفطير المشلتت هنسيبها لمدة عشر دقايق على جنب عشان ترتاح شوية.
تجهيز الفطير المشلتت:
6.
بعد ما العجينة خلصت وبقت جاهزة، هنجيب صينية
واسعة ونحط فيها شوية زيت، ونبدأ نقطع العجينة على شكل كرات صغيرة في حجم التفاحة
زي الشكل اللي فالصورة ده 👇👇، الا آخر قطعتين هيكونوا كبار شوية، يعني في
حجم البرتقالة الكبيرة.
7.
بعد ما نقسم كل كمية العجين، هنبدأ ندهن كل قطعة من
اللعملناها (كل كورة عجين) باللزيت عشان العجين يبقى ناعم اكتر، بعد كده هنغطي كل
كمية العجين في الصينية بأي كيس بلاستيك نظيف ونسيبهم شوية لمدة 20 دقيقة.
8.
بعد مرور ال 20 دقيقة هنجيب الزبدة السايحة وناخد
بالنا كويس متكونش سخنة ابدًا، وهنضيف عليها نصف كباية الزيت وهنبدأ نستخدم الزبدة
واحنا بنفرد العجين.
9.
هنجيب صينية كبيرة وواسعة (أو صاج واسع)، هنحط
على الصينية معلقة من الزبدة، وبعد كده هنبدأ نفرد عليها كور العجين، ممكن نفرد
العجين بالنشابة وممكن كمان نفرده بأدينا، وكمان هنلاحظ ان العجينة صارت طرية جدا
وناعمة وبتتفرد معانا كويس وبسهولة.
10.
بعد ما نفرد قطعة العجينة كويس هنبدأ نطبقها من كل ناحية زي المنديل بالشكل ده 👇👇، وبكده نكون عملنا الطبقة الأولى من الفطيرة.
11.
هنفرد القطعة الثانية من العجين وبردوا هنرش
معلقة زبدة واحنا بنفردها عشان تتفرد معانا بسهولة، بعد ما نفرد الطبقة الثانية هنحط
عليها الطبقة الأولى اللي جهزناها قبل كده، وهنبدأ نطبق الطبقة الثانية على الطبقة
الأولى، زي الشكل اللي موجود في الصورة كده.
12.
هنكرر الخطوة اللي فاتت دي مع عدد القطع اللي هتكونلنا
حجم الفطيرة اللي محتاجينها، بمعنى اننا لو
هنعمل كل كمية العجين اللي معانا على فطيرتين كبار بنفس الحجم، ده هيخلينا ننعمل
الخطوة اللي فاتت مع نصف عدد قطع العجين ونفردهم كلهم ونطبقهم جوا بعض، وآخر قطعة
هنفردها هتكون واحدة من القطعتين الكبار اللي جهزناهم، عشان حجمها لما تتفرد يكون
كبير شوية ويستوعب كل الكمية اللي جهزناها قبل كده.
13.
بعد ما جهزنا الفطير وعملنا العجين جوة بعضه على
شكل طبقات، دلوقتي هنلاقي قدامنا قطعة عجينة كبيرة مكونة من مجموعة من طبقات
العجين وكمان فيها هوا، هنسيب قطعة العجين دي شوية لمدة ساعة الا ربع ترتاح.
14. هنجيب
الصينية الكبيرة اللي هتدخل الفرن، وهنحط فيها معلقتين زبدة وهندهن الصينية دي
بالزبدة، وبعد كده هنحط فيها قطعة العجين الكبيرة دي، وهنبدأ نفرد قطعة العجينة دي
بأدينا في كل الصينية وبكده تكون صينية الفطير المشلتت جاهزة عشان تدخل الفرن.
تسوية الفطير المشلتت في الفرن:
15.
قبل ما ندخل الفطير المشلتت في الفرن، هنشغل
الفرن شوية لمدة 10 دقايق على اعلى درجة، بعد كده هندخل الفطير في الفرن ونسيب نار
الفرن عالية.
16. بعد 15
دقيقة هنشغل شواية الفرن شوية ونتابع الفطير كويس لحاد ما سيتوي، وأول ما وش
الفطيرة يحمر ويبقى جاهز هنطفي عليه الفرن ونطلعه.
ملحوظة حلوة: لو انت حابب تحط أي حشو في الفطير يفضل ان الحشو ده يكون في او ل طبقة سواء كان جبنة او لحمة او فراخ او سكر او مربى أو شوكولاتة او أي حاجة.
وبكده نكون وضحنا لكم طريقة عمل الفطير المشلتت
الفلاحي الجميل عشان تعملوه في البيت ويكون مضمون ونضيف جدا وبأذن الله هيعحبكم
وكمان طعمه هيكون جميل جدا جدا وكل اللي هيدوقه هيعجبه وهيشكر فيه، وزي ما
قولنالكم طريقة الفطير المشلتت سهلة جدا ومش متعبة خالص، لو ركزتم كويس في خطوات
طريقة عمل الفطير المشلتت بتاعتنا دي كويس بأذن الله هيطلع معاكم كويس جدا.
طبعا
متنسوش لو في عندكم أي استفسارات او أي ملاحظات يا ريت تسيبوهالنا في التعليقات او
تبعتوهالنا في الرسايل، وكمان لو في عندكم أي اكلات عاوزين تعرفوا طريقتها سواء
اكلات مصرية او اكلات دايت او اكلات جديدة، سيبولنا ااسمها في التعليقات او ابعتوهالنا في رسايل
واحنا هنعملكم طريقتها في أسرع وقت، نتمنا انكوا تجربوا طريقة عمل الفطير المشلتت
بتاعتنا، ألف هنا وشفا، ودمتم في صحة 💪💪.
اكلات
قد تعجبك: