الفراخ على الطريقة الصينية

الفراخ على الطريقة الصينية

اكلة الفراخ على الطريقة الصينية دي باه حاجة كده متتوصفش، بجد اكلة الفراخ على الطريقة الصينية لازم كلنا نجربها لان طعمها جميل جدا وميلانة بروتين وعناصر غذائية كتير جدا، والميزة هنا باه اننا هنغير روتين الاكل وهنعمل اكلة جديدة خالص والبيت كله هيحبها.

الاكلة دي بردو بتتميز بأنها قليلة بالسعرات الحرارية وخفيفة على المعدة جدا وسريعة الهضم، يعني لو كنت عامل دايت او بتعاني من مشاكل في الهضم مش هتلاقي وجبة أخف من كده ولا هتلاقي اكلة صحية أحسن من كده، وفي المقالة دي بأذن الله هنوضحلكو طريقة عمل اكلة الفراخ علي الطريقة الصينية بكل تفاصيلها وبخطوات سهلة جدا وبسيطة.

مقادير ومكونات الفراخ الصيني:

• بيضة
• معلقة نشا كبيرة
• نصف معلقة ملح صغيرة
• نصف كيلو صدور فراخ مخلية
• كوباية زيت سمسم
• بصلة متوسطة مبشورة
• 1 فلفل اصفر + 1 فلفل احمر متقطعبن شرائح
• 3 مكعبات مرقة دجاج
• 3 ملاعق كبار صويا صوص (صلصة الصويا)
•  معلقتين كبار بصل أخضر مبشور او متقطع ناعم.
• 4 معالق كبيرة كاجو مقلي أو مشوي
• ملح
• فلفل أبيض
• كوباية ارز مطبوخ.

خطوات عمل الفراخ الصيني بالكاجو:

اكلة الفراخ بالكاجو على الطريقة الصينية بتتحضر بسهولة جدا وأي حد يقدر يعملها لو اتبع الخطوات دي

 كويس.

1. هنضرب البيضة كويس في طبق غويط كبير.
2. نحط معلقة النشا الكبيرة ونصف معلقة الملح الصغيرة على البيضة ونقلب كويس.
3. بعد كده هنقطع صدور الفراخ على شكل مكعبات ونحطهم في خلطة البيض والنشا اللي عملناهم ونقلبهم كويس جدا في بعض شوية.
4. هنحط كوباية زيت السمسم في طاسة ونحطهم على النار شوية، وبعدين نحط الفراخ في الزيت ونقلبها لحاد ما تستوي ونطلعها.
5. بعد كده هنحط البصلة المبشورة فنفس الزيت ونقلبها وبعد كده نضيف حلقات الفلفل الأحمر والاصفر في الزيت مع البصل ونقلبهم شوية مع بعض.
6.  هنضيف بعد كده الفراخ للبصل والفلفل والزيت ونقلبهم مع بعض شوية وبعدين نبدأ نحط مكعبات مرقة الدجاج واحنا بنتقلب.
7. بعد كده هنضيف 3 معالق صلصة الصويا ونقلب كويس بردو.
8. بعد كده هنضيف الكاجو والبصل الأخضر المبشور ونضيف معلقة ملح صغيرة ونصف معلقة فلفل ابيض ونقلب تاني شوية كده وبعدين نشيل الفراخ من عالنار ونقدمها.

بكده تكون اكلة الفراخ الصيني جاهزة للتقديم ويفضل انها تتقدم مع كمية ارز صغيرة فحجم كوباية كده، ومن المميز جدا في الاكلة دي ان كل مكوناتها متوفرة وسهلة التحضير جدا ومش محتاجة مجهود، جربوا الكلة دي في البيت ودوَقوها لحبايبكم واصحابكم ونوعدكم انها هتعجبهم جدا، ولو في اي حاجة مش واضحة اوي عندكو اي استفسارات ممكن تسيبوهالنا تحت في التعليقات واحنا هنرد عليكم، ودمتم في صحة💪💪 .

اكلات ممكن تعجبك:

• طريقة عمل الكيكة بالشوكلاته.
• طريقة عمل الفراخ على الطريقة الصينية.
• طريقة عمل الفراخ ستربس.
• طريقة عمل البوتين الكندي.
• طريقة القرنبيط بالبشاميل بسهولة جدا.
• أسهل طريقة لعمل كريب شاورما فراخ في البيت.

وتقدري بردو تشتري أفضل أدوات المطبخ اللي هتساعدك وتوفر ليكي كتير وكمان بأسعار ممتازة من هنا