طريقة عمل الفسيخ وطريقة عمل الرنجة | اكلات مصرية لشم النسيم
طريقة عمل الفسيخ وطريقة
عمل الرنجة في البيت سهلة جدا جدا، وفي نفس الوقت بتوفر علينا فلوس كتير، وكمان
لما بنعمل الفسيخ او الرنجة او السردين او أي نوع سمك مملح في البيت ده بيخلي
الاكلات دي نظيفة جدا ومضمونة كتير عن اكل المحلات، وصدقونا لما نقولكم ان الطعم بيكون
اجمال بكتير جدا، وبما ان شم النسيم قرب، قررنا نوضح لكم طريقة عمل الفسيخ وطريقة
عمل الرنجة وطريقة تمليحهم كويس جدا في البيت، زي ما وضحنا لكم طريقة عمل الفطير المشلتت.
طبعا شم النسيم ميكملش
ولا يكون ليه طعم من غير رنجة او فسيخ، وطبعا كلنا عارفين ان الرنجة والفسيخ اكلات
مصرية اصيلة ونسبة كبيرة جدا من المصريين وغير المصريين بيعشقوها، عشان كده
هنعرفكم في المقالة دي طريقة عمل الفسيخ وطريقة عمل الرنجة بالضبط زي المحلات بس
على انظف، عشان محدش يحس بقرف من اكل الفسيخ والرنجة، وباذن الله كل افراد الاسرة
هيحبوه وهياكلوا منه، يلا بينا نشوف مكونات وخطوات طريقة عمل الفسيخ وطريقة عمل
الرنجة.
أولا: طريقة عمل الفسيخ وتمليحه.
المكونات:
- سمك بوري (الكمية حسب الرغبة).
- ملح خشن.
بهارات اختيارية ( بتنضاف على الملح):
- شطة.
- بابريكا.
- كركم.
خطوات طريقة عمل الفسيخ
في الأول لازم نعرف اننا
لازم نستخدم سمك بوري مضمون جدا ونضيف، وكمان لازم يكون سمك البوري طازة مش مجمد
عشان مينشفش مننا واحنا بنعمله فسيخ.
1.
بعد ما نجيب سمك البوري
هنبدأ ننضفه كويس جدا تحت المية ولازم كمان نغسله كويس من الخياشيم بتاعته ومن كل
فتحانه.
2.
بعد كده هنجيب قماشة قطن
نضيفة ونبدأ نمسح بيها المية من على الفسيخ بحيث يكون جاف جدا من برة وميكونش عليه
أي نقطة مية، وممكن بردو نسيبه ساعتين او 3 ساعات في مصفة لحاد ما كل المية تروح
من عليه.
3.
في الخطوة دي بعد ما
نشفناه هنبدأ نملح الفسيخ، كل اللي هنعمله اننا هنمسك السمكة ونبدأ نحط الملح
الخشن في خياشيمها من الناحيتين،
وهنعمل الخطوة دي مع كل كمية السمك اللي معانا.
4.
بعد كده هنجيب العلبة او
الجردل اللي هنحط فيها الفسيخ وطبعا لازم تكون نضيفة جدا، هنفرش الجردل أو العلبة
بكيسبلاستيك نضيف، وبعد كده هنحط في أرضية العلبة او الجردل شوية ملح خشن.
5.
بعد كده هنبدأ نرصص السمك
اللي حدقناه في أرضية العلبة فوق طبقة الملح، هنعمل طبقة من الفسيخ جنب بعضه وبعد
كده هنحط فوق طبقة الفسيخ طبقة تانية من الملح الخشن.
6.
طبعا لو فاضل معانا لسة
كمية من الفسيخ هنحطها فوق طبقة الملح وهنرصصهم جنب بعض لكن بعكس اتجاه رصة السمك الأولى،
يعني هنخلي الرأس مكان الذيل والذيل مكان الراس، وبعد كده هنحط فوقيهم بردك طبقة
من الملح الخشن.
7.
بعد كده هنقفل الكيس
والعلبة على الفسيخ ونسيبهم فترة يتملحوا، لحاد معاد الالكل.
ملحوظة مهمة جدا عن مدة التمليح: مدة التمليح بتكون على حسب حجم السمك البوري اللي احنا مملحينه، يعني لو كان حجم السمكة البوري كبيرة، اذا لازم مدة التمليح بتاعتها تكون طويلة شوية، يعني مينفعش تكون اقل من شهر، ولو كان حجم السمك متوسط هتكون مدة تمليحه من 15 : 20 يوم، ولو كان حجم السمك صغير فمدة التمليح بتكون 10 أيام.
- سمك حجمه كبير : 30 يوم.
- سمك حجم متوسط : من 15 : 20 يوم.
- سمك حجم صغير : 10 أيام.
ملحوظة كمان:
وبكده نكون ملحنا الفسيخ وجهزناه ليوم شم النسيم اللي بنستناه من السنة للسنة، لكن باذن الله المردة دي هيكون أحلى بكتير من كل مرة وكمان ريحته أجمل وطعمه أحلي بكتير.
ثانيا: طريقة عمل الرنجة.
المكونات:
- سمك سردين (سردين الرنجة).
- ملح خشن.
خطوات طريقة عمل الرنجة:
1.
في الأول هنبدأ بغسل سمك
سردين اللانجو كويس جدا وبردو هنغسله كويس من الخياشيم.
2.
بعد كده هنبدأ ننشف سمك الرنجة
كويس جدا بقماشة قطن نضيفة او نسيبه ساعتين او 3 ساعات في مصفة لحاد ما ينزل كل
المية اللي فيه.
3.
بعد كده هنجيب الرنجة
ونبدأ نحط الملح الخشن في خياشمها عشان الرنجة تتملح كويس.
4.
بعد كده هنشف المصفة
كويس جدا من المية اللي فيها، وهنعمل في ارضيتها طبقة من الملح الخشن.
5.
بعد كده هنبدأ نرصص سمك
الرنجة على طبقة الملح جنب بعضه ولازم سمك الرنجة يكون عليه ملح من الذيل لحاد
الراس.
6.
بعد كده هنغطي سمك
الرنجة بطبقة ثانية من الملح الخشن، زي ما عملنا في الفسيخ بالضبط 👆.
7.
هنحط تحن المصفة أي حلة
او وعاء عشان المية اللي تنزل من الرنجة تنزل في الوعاء ده ومتبوظش الدنيا.
8.
هنسيب الرنجة في الملح
لمدة 24 ساعة أو اكتر، وبعد كده هنغسلها كويس من الملح تحت الحنفية، وبعد كده
ننشفها كويس بردوا من المية، وبكده تكون الرنجة جاهزة للتدخين.
خطوات تدخين الرنجة:
1.
هنجيب سيخ شواية الفرن
ونعلق عليه سمك الرنجة من راسه، ونركب السيخ في فرن البوتاجاز، وبعد كده هنولع قطعتين
او 3 قطه فحم صغيرين.
2.
بعد كده هنجيب طبق معدني
قديم صغير، وهنحط فيه قطع الفحم الوالع، ونحطهم في الفرن تحت سمك الرنة المتعلق.
3.
بعد كده هنولع فرن البوتاجاز
على درجة حرارة هادية جدا (أقل درجة حرارة في الفرن)، وفي نفس الوقت هنجيب شوية
نشارة خشب صغيرين جدا ونحطهم مع الفحم عشان يعملوا دخان.
4.
اول ما الدخان يطلع من
النشارة هنقفل باب الفرن على الرنجة ونسيب الفرن شغال على الرنجة ومعاه الفحم لمدة
30 دقيقة ونقوم قافلين النار على الرنجة.
5.
هنسيب الرنجة شوية في
الدخان في فرن البوتاجاز، لحاد ما الدخان يقل خالص، وبكده تكون الرنجة جاهزة.
وبكده نكون وضحنا لكم
طريقة عمل الرنجة وطريقة عمل الفسيخ طبعا عشان نعملهم في شم النسيم ويكونوا
مضمونين وكمان عشان تكون ريحتهم كويسة، وبأذن الله هتجربوا السمك الممل من ايديكم
وهيكون أحلي بكتير من بتاع المحلات، نتمنى انكم تجربوا طريقة عمل الرنجة وطريقة
عمل الفسيخ بتاعتنا وتقولولنا على رأيكم في التعليقات.
طبعا لو في عندكم أي استفسارات
او لو في أي حاجة مش واضحة في طريقة عمل الرنجة او في طريقة عمل الفسيخ متترددوش
ابدا انكم تكتبوا تعليقاتكم او ملاحظاتكم في التعليقات او حتى ممكن تبعتوها لنا
على صفحتنا في الفيس بوك، احنا بأذن الله هنرد على كل استفساراتكم في أسرع وقت،
وبأذن الله نوعدكم اننا هنعملكم اكلاتمصرية جديدة وجميلة قريب بأذن الله، جربوا
الفسيخ والرنجة بألف هنا وشفا، ودمتم في صحة.
اكلات ممكن تعجبكم:
وتقدري بردو تشتري أفضل أدوات المطبخ اللي هتساعدك وتوفر ليكي كتير وكمان بأسعار ممتازة من هنا