طريقة عمل الكنافة النابلسية على أصولها

طريقة عمل الكنافة النابلسية على أصولها

الكنافة النابلسية بالجبنة الموتزاريلا والجبنة العكاوي اجمل حاجة ممكن تحلي بيها، يا سلام باه علي الكنافة وهي سايحة كده وسخنة والجبنة بتشد فيها، ولا ريحيتها باه اللي بتدوخ من جمالها وطعامتها، ناس كتير بيطلغبطو لما بيجو يعملو الكنافة النابلسي وكتير من الناس برضو بتبوظ منهم وفي ناس كتير بردو ميعرفوش أصلا الكنافة النابلسي ولا يعرفو هي بتتعمل ازاي.

عشان كده قررنا نقدمهالكم في المقالة دي ونوضحلكو كل مكوناتها ومقاديرها، وكمان هنوضحلكم خطوات طريقة عمل الكنافة النابلسية، عشان تقدروا تعملوها في البيت بكل سهولة، والحلو اللي فيها انكو مش هتعملوها بتكاليف عالية ولا حاجة بالعكس الكنافة النابلسية مكوناتها رخيصة جدا ومش عالية ومتوفرة في كل بيت، يلا بينا نتعرف علي المكونات👏.

مقادير ومكونات الكنافة النابلسية:

·         نصف كيلو كنافة بايتة في الفريزر.

·         ربع كيلو جبنة عكاوي بايتة في المية لمدة 8 ساعات.

·         ربع كيلو جبنة موتزاريلا.

·         كوباية زبدة  او  كوباية سمنة بلدي.

·         ربع كوباية سكر باودر.

·         نصف معلقة صغيرة لون للكنافة (بودرة الزعفران).

مكونات الشربات:

·         كوباية سكر.

·         كوباية مية.

خطوات طريقة عمل الكنافة النابلسية:

اول حاجة لازم ناخد بالنا منها ان الكنافة تكون بايتة في الفريزر لمدة يوم او يومين على الأقل عشان نعرف نفتتها ونقطعها ومتلزقش مننا، ولازم ناخد بالنا بردو ان الجبنة العكاوي لازم تكون بايتة في شوية مية لمدة متقلش عن 8 ساعات وكل ساعتين او 3 ساعات نغير المية بتاعتها، بعد كده خلو بالكم معانا كويس في الخطوات اللي هنقول عليها دي عشان نعمل صينية كنافة نابلسية تعجب كل اللي يدوق منها.

1. هنبدأ خطوات طريقة عمل الكنافة النابلسية باننا هانجيب الجبنة العكاوي من المية وهنبدأ نقطعها شرايح.

2. بعد كده هنطلع الكنافة من الفريزر ونبدأ نقطعها كويس جدا بادينا او بالمخرطة او بالسكينة.

3. بعد كده هنحط نص كوباية من السمنة البلدي على الكنافة ونقلبهم كويس مع بعض بادينا او بالمعلقة لحاد ما الكنافة تشرب السمنة كلها.

4. بعد كده هنحط ربع كوباية السكر الباودر على الكنافة ونقلبهم بردو كويس جدا مع بعض.

5. ودلوقتي بأه هنجيب الصينية اللي هنحضر فيها الكنافة النابلسية وهنحط فيها ربع كوباية من السمنة البلدي وهنفرد السمنة كويس في الصينية.

6. بعد كده هننزل في الصينية بنصف كمية الكونافة اللي جهزناها، وبعدين نوزع الكونافا كويس في الصينية ونضغط عليها بأدينا بالراحة واحنا بنوزعها في الصينية، ويفضل اننا نعلي الكنافة من الطروف عشان الجبنة لما تسيح متلزقش في الصينية.

7. هنبدأ دلوقتي نحط طبقة من شرائح الجبنة النابلسية ونوزعها كويس فوق طبقة الكنافة.

8. بعد كده هنعمل بردو طبقة من الجبنة الموتواريلا ونوزعها كويس جدا بردو.

9. بعد ما وزعنا طبقتين الجبنة هننزل بباقي كمية الكنافة فوق الجبنة ونبدأ نوزعها بأدينا كويس جدا بحيث نغطي كل طبقة الجبنة وبردو نضغط عليها بالراحة بادينا عشان نكبسها كويس.

10. بعد كده باقي كوباية السمنة هنوزعها على وش الكونافة من فوق، وعلى طول نروح نشغل الفرن.

11. هنبدأ دلوقتي نسوي الكنافة النابلسية، كل اللي هنعمله اننا هنحطها في الفرن من تحت ونشغل النار من تحت بس لحاد ما نلاحظ ان لون جناب الكنافة بدأ ياخد لون، في اللحظة دي هنطفي الفرن من تحت.

12. بعد كده هنشغل الفرن من فوق (شواية الفرن) وهنطلع الكنافة في رف الفرن اللي فوق ونسيبها شوية لحاد ما تاخد لون من فوق وبعد كده نطلعها.

13. هنسيب الكونافة تاخد لون ونروح نحضر الشربات، كل اللي هنعمله اننا هنحط كوباية المية وكوباية السكر مع بعض وهنسيبهم علي النار يغلوا لمدة خمس دقايق.

14. بعد ما الكنافة تاخد لون نطلعها من الفرن وننزل عليها بالشربات ويفضل اننا نجهز الشربات من بدري شوية عشان لما نيجي نحطه علي الكنافة يكون بارد شوية.

15. بعد كده هنقلب الكنافة ونحط عليها شربات بردو من النحية التانية، وبعد كده نقطعها ونقدمها، وممكن نرش علي وشها شوية مكسرات لو متوفر وممكن بردو نحط علي وشها شوية صوص شوكولاتة.

بكده نكون وضحنالكم طريقه عمل الكنافه النابلسيه بكل مقاديرها وخطواتها، نتمنا انكو تعملوها بطريقتنا وتعجبكم بأذن الله، وصفة الكنافة النابلسية سهلة جدا مش هتكلفكم حاجة ومش هناخد أي وقت ولا مجهود، باذن الله هتعجب كل افراد الاسرة الصغير والكبير وكمان هتطلع معاكم احلي من بتاعة المحلات.

ومتنسوش لو في أي حاجة مش واضحة او لو في عندكم أي استفسارات يا ريت تسيبوهالنا تحت في التعليقات 👇👇 واحنا هنرد عليكم في اسرع وقت، بنفكركم بردو لو في عندكم أي اكلات او حلويات جديدة ومش عارفين تعملوها سيبولنا اسمها تحت في التعليقات واحنا هنعملهلكم في مقالات جديدة، يا ريت تجربو الكنافة النابلسية بطريقتنا بألف هنا وشفا، ودمتم في صحة💪💪.

اكلات ممكن تعجبك:

• طريقة عمل الفراخ الصينى.
• طريقة عمل فراخ ستربس.
• طريقة عمل الكنافة النابلسية.
• طريقة عمل العجة التركية.
• طريقة عمل البان كيك | البان كيك الأصلي.
• اصابع البطاطس الهندية المقلية المقرمشة.

وتقدري بردو تشتري أفضل أدوات المطبخ اللي هتساعدك وتوفر ليكي كتير وكمان بأسعار ممتازة من هنا