طريقة عمل اصابع البطاطس الهندية المقرمشة

طريقة عمل اصابع البطاطس الهندية المقرمشة

البطاطس الهندية المقرمشة اكلة من عالم تاني، كل اللي جربوها قالو عليها انها فعلا مش اكلة بطاطس عادية بالعكس دي وصفة خاصة للبطاطس مختلفة جدا عن اي طريقة بطاطس اكلناها قبل كده، والسر في طعمها الغريب الجميل ده هو اننا هنستخدم بهارات مجموعة مختلفة من البهارات اللي هتعطي للبطاطس دي طعم جميل ونكهة مختلفة.

والجميل في الاكلة دي انها سهلة جدا وسريعة التحضير ومش مكلفة ابدا، بالعكس مكونات الاكلة دي متواجدة دايما في كل بيت وممكن اي حد يعملها بكل سهولة، عشان منطولش عليكو يلا بينا نتعرف علي خطوات عمل البطاطس الهندي المقرمشة ومقاديرها ومكوناتها:

مكونات وبهارات البطاطس الهندية:

ü      نصف كيلو بطاطس.

ü      كوبايتين دقيق سميد خام ( من عند العطار).

ü      نص كوباية مية.

ü      معلقتين زيت كبار.

ü      البهارات:

·         معلقة ملح صغيرة مليانة.

·         نصف معلقة صغيرة بصل بودرة.

·         نصف معلقة صغيرة ثوم بودرة.

·         نصف معلقة صغيرة كركم.

·         نصف معلقة صغيرة كاري.

·         نصف معلقة صغيرة بابريكا.

خطوات تحضير البطاطس الهندي المقرمشة:

اكلة البطاطس الهندية خطوات عملها وتحضيرها سهل جدا جدا، المهم بس اننا ناخد بالنا كويس جدا من كميات البهارات اللي هنحطها في البطاطس عشان متبوظش مننا، وكمان لازم نخلي بالنا كويس جدا من الخطوة الاخيرة واحنا بنقليها في الزيت علي النار عشان متتحرقش او تطلع نص سوا، وان شاء الله لو ركزتو كويس في المقادير اللي ذكرناها فوق دي👆👆 والخطوات اللي هنوضحها تحت دي👇👇، هتطلع معاكم وصفة البطاطس الهندي جميلة جدا جدا ومظبوطة تمام.

1.      اول خطوة هنعملها اننا هنسلق البطاطس كويس جدا، بس واحنا بنسلقها يفضل اننا نسلقها بقشرها عشان البطاطس متشربش مية وتضايقنا بعد كده واحنا بنعمل الخطوات الجاية.
2.  بعد ما نسلق البطاطيس نطلعها من المية وننشفها ونسيبها تبرد شوية وبعدين نبدأ نقشرها ونحطها فطبق لواحدها.
3.      بعد كده هنبدأ نهرس البطاطس كويس جدا، ونضيف عليها البهارات اللي ذكرناها فوق👆، ونستمر في التقليب وهرس البطاطس والبهارات مع بعض لحاد ما تختلط البهارات والبطاطس مع بعض ويبقي ملمس البطاطس ناعم، ولونها يتحول للون الذهبي.
4.      في الخطوة دي هنجهز عجينة دقيق السميد، هنجيب طاسة واسعة شوية او حلة ونحطها علي نار هادية، وبعد كده هنحط فيها معلقتين الزيت الكبار وبعد كده ننزل عليهم بكوبايتين دقيق السميد ونقلب فيهم كويس جدا لحاد ما الزيت والدقيق يختلطوا ببعض كويس بس، ونشوحهم مع بعض شوية علي النار الهادية بس من غير ما ياخدو لون ابدا.
5.      يادوب اول ما ريحتهم تبدأ تطلع ننزل عليهم بنص كوباية الماية ونستمر في التقليب كويس جدا، واي كتل تتجمع مع بعضها في الدقيق نكسرها ونحاول نحافظ عليه متفتت واحنا بنقلبه.
6.      اول ما نحس ان الدقيق فرول وبدأ يعمل تكتلات صغيرة مع بعضه نشيلة بسرعة من علي النار، وبكده هيكون دقيق السميد جاهز.
7.      بعد كده هناخد الدقيق اللي جهزناه وهنحطه علي البطاطس اللي هرسناها مع البهارات ونبدأ نخلطهم ونقلبهم مع بعض بأدينا او بالمعلقة، يفضل بأدينا طبعا بس خلوبالكم لازم ايدينا تكون نضيفة ومغسولة كويس.
8.      بعد ما قلبناهم كويس مع بعض وعجناهم في بعض لو لقينا العجينة مشققة ممكن نضيفلها ربع كوباية مية وااحنا بنعجنها، وبعد كده نبدأ نشكلها ونعملها علي شكل صوابع رفيعة زي اللي موجودة في الصور كده👆👇، ونحط الصوابع دي مع بعض في طبق او صينية خارجية.
9.      بعد ما صبعنا العجينة كلها هنحط طاسة فيها زيت علي النار ونسيبه لحاد ما يسخن اوي، عشان لو حطينا العجينة في الزيت وهو بارد ممكن تفك مننا، وبعد كده هنبدأ ننزل الصوابع اللي عملناها في الزيت واحد واحد ونقلبهم كويس لحاد ما تاخد لونها وتحمر كويس وبعد كده نطلعها وبكده هتكون البطاطس الهندية جاهزة للتقديم.

طبعا اكلة زي دي مفيش اسهل منها، ولما تدوقوها بأذن الله مش هتلاقو اطعم من كده، ولا ريحتها بأه تجنن، اكلة البطاطس الهندية ممكن تتقدم جنب اي اكلة في وجبة الغدا، لانها بتعتبر في الهند من اجمل المقبلات، ده غير اننا ممكن نعملها ونتسلا بيها بالليل بدل وجبة العشا وهتكون وجبة خفيفة جدا، نتمنا ان كل زوار موقع اطعم اكلات يجربوها، ولو عندكو اي استفسارات او اي حاجة مش واضحة سيبوهالنا تحت في التعليقات👇👇، ولو في اي اكلة عاوزين تعرفوا خطواتها او مكوناتها سيبولنا اسمها في التعليقات تحت واحنا هنعملهالكو في مقالة جديدة بأذن الله، جربو اكلاتنا بالف هنا، شكرا لاهتمامكم ودمتم في صحة💪💪.

اكلات ممكن تعجبك:

• طريقة عمل الكيكة بالشوكلاته.
• طريقة عمل الفراخ على الطريقة الصينية.
• طريقة عمل الفراخ ستربس.
• طريقة عمل البوتين الكندي.
• طريقة القرنبيط بالبشاميل بسهولة جدا.
• أسهل طريقة لعمل كريب شاورما فراخ في البيت.

وتقدري بردو تشتري أفضل أدوات المطبخ اللي هتساعدك وتوفر ليكي كتير وكمان بأسعار ممتازة من هنا