طريقة عمل المكرونة بالبشاميل في 5 خطوات سهلة جدا

طريقة عمل المكرونة بالبشاميل في 5 خطوات سهلة جدا

خدوا مننا طريقة عمل المكرونة بالبشاميل على أصولها باه، زي ما عملنا لكم اكلات كتير بالبشاميل زي النجرسكو وأكلة الكوسة بالبشاميل قررنا المرادي نعملكم وحش البشاميل عشان نعرفكم علي احلي طريقةممكن تعملوها طريقة عمل مكرونة بشاميل، علي فكرة الطريقة مش صعبة ووصفة المكرونة البشاميل مش معقدة ابدا.

كل الحكاية ان المكرونة البشاميل محتاجة شوية صبر وشوية تركيز بس مش اكتر، وبأذن الله لو ركزتو معانا في مكونات ومقادير المكرونة البشاميل وفي خطوات طريقة عمل المكرونة بالبشاميل كويس، بأذن الله هتطلع معاكم احلي واطعم صينية مكرونة بالبشاميل في العالم، وباذن الله هتعجبكم وهتعجب كل افراد الاسرة ولو عملتوها في عزومة باذن الله مش هتخزلكم ابدا.

مكونات ومقادير المكرونة البشاميل:

1. نصف كيلو مكرونة أقلام.

2. جبنة موتزاريلا (اختياري)

3. مكونات البشاميل:

• معلقتين ونص كبار من الدقيق.
• لتر لبن.
• معلقتين كبار سمنة او زبدة.
• كوباية شوربة كبيرة.
• معلقة كبيرة جبنة كريمي او معلقة كبيرة كريمة طبخ.
• ربع معلقة صغيرة جوز الطيب.
• معلقة صغيرة ملح.
• مكعب مرقة دجاج.
• معلقة صغيرة فلفل اسود.

4. مكونات التعصيجة للحمة المفرومة:

• معلقتين كبار سمنة.
• نصف كيلو لحمة مفرومة.
• بصلة مفرومة ناعمة.
• ملعقة صغيرة ملح.
• فص ثوم مفروم ناعم.
• ملعقة صغيرة فلفل أسود.
• ملعقة صغيرة بهارات لحمة.

خطوات طريقة عمل المكرونة بالبشاميل:

بعد ما حضرنا وجهزنا كل المكونات اللي هنستخدمها واحنا بنعمل المكرونة البشاميل، دلوقتي نخش في خطوات طريقة عمل المكرونة البشاميل ولازم نركز كويس جدا واحنا بنجهدها عشان مفيش حاجة تبوظ مننا ولا أي حاجة تتهدر وتترمي، واحنا بأذن الله هنقسم خطواتنا على قد ما نقدر عشان مفيش أي حاجة تبوظ مننا.

اول حاجة هنعملها هنبدأ في تجهيز المكرونة وسلقها، كل اللي هنعمله اننا هنحط حلة متوسطة الحجم على النار ونحط فيها كمية مية لحاد نصها، وهنضيف في المية معلقة ملح كبيرة وبعد كده نضيف نصف كيلو المكرونة الأقلام اللي جهزناها ونقلبها شوية عشان الملح يدوب في المية، وناخد بالنا كويس جدا منخليش المكرونة تتسلق وتستوي عالآخر، هنسلقها نص سلقة بس.

تاني حاجة هنعملها هي البشاميل، وطبعا لازم ناخد بالنا كويس جدا واحنا بنحضر البشاميل لان هو اللي بيعطي للاكلة كلها طعم، وياريت نمشي مع بعض خطوة بخطوة عشان البشاميل ميكلكعش منكم ولا يعجن.

1. هنجيب حلة غويطة ونحطها على نار هادية، ونحط فيها معلقتين السمنة او الزبدة ونسيبهم لحاد ما يسيحوا خالص.

2. بعد ما سيحنا السمنة هنبدأ نضيف معلقتين ونص من الدقيق ونقلب كويس جدا، هنلاحظ ان الدقيق هيشرب السمنة ويكلكع معانا، كل ده عادي جدا هنستمر في التقليب عادي خالص لحاد ما الدقيق يبدأ لونه يحمر عشان الدقيق يفقد طعمه بشكل نهائي.

3. اول ما ريحة الدقيق والسمنة تطلع واحنا بنقلب هننزل على طول بلتر اللبن بالراحة شوية بشوية وياريت يكون اللبن بارد، وطبعا كل ده واحنا بنقلب باستمرار، بعد ما نضيف كل كمية اللبن اللي معانا هنلاحظ ان الكتل كلها بدأت تفك وقوام البشاميل بدأ ينعم معانا، عشان كده لازم نستمر في التقليب.

4. بعد كده هنفتت مكعب مرقة الدجاج ونضيفه على البشاميل ونضيف كمان معلقة كريمة الطبخ او معلقة من الجبنة الكريمي طبعا حسب المتوفر في البيت في الوقت ده، ونقلب بشكل مستمر عشان كل المكونات تختلط ببعضها.

5. وبعد كده هنبدأ نضيف كوباية الشوربة الكبيرة ونضيف معاها كل البهارات البشاميل اللي معانا اللي هي معلقة فلفل اسود صغيرة مع معلقة ملح صغيرة ورشة جوزة الطيب، وطبعا عنفضل نقلب في البشاميل على النار لحاد ما البشاميل يبدأ يمسك نفسه وميبقاش تقيل، هنطفي عليه النار وبكده هيكون البشاميل جاهز.

تالت حاجة هنجهزها في المكرونة البشاميل هي اللحمة المفرومة، وطبعا لاوم نعملها تعصيجة حلوة عشان تعطي للمكرونة البشاميل طعم جميل.

1.هنجيب الأول طاسة نضيفة ونحطها على نار هادية ونحط فيها معلقتين السمنة الكبار ونسيبهم لحاد ما يسيحو خالص، وكمان السمنة تبدأ تسخن.

2. اول ما السمنة تسخن هنبدأ ننزل فيها البصلة المفروم وفص الثوم المفروم ونقلبهم شوية مع بعض لحاد ما ريحتهم تطلع ويدبلوا في السمنة.

3. بعد كده هنضيف نصف كيلو اللحمة المفرومة، ونعلي النار شوية ونبدأ نضيف عليها بهارات التعصيجة اللي هي ملعقة صغيرة ملح وملعقة صغيرة فلفل أسود وملعقة صغيرة بهارات لحمة، نقلب اللحمة كويس جدا ونغطيها.

4. بعد كده هنهدي النار شوية ونسيب اللحمة على النار الهادية لحاد ما يتغير لونها، وبكده تكون اللحمة المفرومة جاهزة.

رابع حاجة هنبدأ نجهز صينية المكرونة البشاميل، بعد ما جهزنا كل مكونات المكرونة البشاميل دلوقتي هنبدأ نرص المكونات دي في الصينية وندخلها الفرن عشان تكون جاهزة للتقديم.

1. هنجيب صينية بحجم مناسب وندهنها كويس بمعلقتين زيت، بعد كده هنضيف طبقة من البشاميل ونوزعها كويس في الصينية كلها.

2. بعد كده هنضيف نصف كمية المكرونة المسلوقة ونفردها كويس في الصينية على طبقة البشاميل اللي حطيناها في الخطوة اللي فاتت، وبعد ما حطينا طبقة المكرونة هننزل عليها بطبقة تانية من البشاميل ونغرقها كويس جدا بالبشاميل.

3. ودلوقتي هنضيف كل كمية اللحمة المفرومة ونفردها كويس جدا على المكرونة والبشاميل، وبعد ما نفردها هنحط عليها طبقة من الجبنة الموتزاريلا (وطبعا لو مش بنحبو الجبنة الموتزاريلا في المكرونة البشاميل مش لازم تضيفوها).

4. بعد كده هنحط فوق طبقة اللحمة والجبنة طبقة تانية من البشاميل ونفردها كويس فوق اللحمة، وبعدها على طول هنضيف باقي كمية المكرونة ونفردها فوق طبقة البشاميل.

5. آخر خطوة هنضيف فيها باقي كمية البشاميل اللي معانا ونفردها كويس على طبقة المكرونة، وبعد كده هنضيف طبقة جبنة موتزاريلا فوق البشاميل (لو حابين)، وبكده تكون صينية المكرونة البشاميل جاهزة تدخل الفرن.

خامس حاجة هنعملها هنشغل الفرن شوية وبعدين هندخل صينية المكرونة البشاميل في الفرن، ونسيبها في الفرن لمدة نصف ساعة على درجة حرارة 200، ويفضل طبعا اننا مندخلهاش الفرن الا إذا كان الفرن سخن، ويفضل بردو اننا ندخلها الفرن قبل التقديم بنص ساعة عشان لما نطلعها من الفرن ونيجي نقدمها تكون سخنة وسايحة وطعمها جميل.

وبكده نكون وضحنالكم طريقة عمل مكرونة بشاميل جميلة جدا، وان شاء الله هتعجب الكبار والصغيرين، طريقة عمل المكرونة بالبشاميل بتاعتنا احلي طريقة ممكن تعملو بيها المكرونة البشاميل، لانها سهلة وبسيطة وكل مكوناتها متوفرة على طول في كل بيت، ولو في أي حاجة مش واضحة في طريقة عمل المكرونة بالبشاميل متترددوش ابدا وسيبولنا استفساراتكم واسالتكم تحت في التعليقات 👇👇.

ولو في عندكم أي اكلة غريبة ومش عارفين تعملوها ونفسكو تغرفو بتتعمل ازاي سيوبلنا اسمها تحت في التعليقات واحنا هنعرفكم طريقتها في أسرع وقت، جربوا المكرونة البشاميل بتاعتنا باذن الله هتعجبكم بالهنا والشفا، ودمتم في صحة💪💪.

اكلات ممكن تعجبك:

• طريقة عمل الكيكة بالشوكلاته.
• طريقة عمل الفراخ على الطريقة الصينية.
• طريقة عمل الفراخ ستربس.
• طريقة عمل البوتين الكندي.
• طريقة تحضير القرنبيط بالبشاميل بسهولة جدا.
• أسهل طريقة لعمل كريب شاورما فراخ في البيت.