اعملي فاهيتا الفراخ في البيت ب 7 خطوات بس

اعملي فاهيتا الفراخ في البيت ب 7 خطوات بس

طبعا فاهيتا الفراخ واحدة من الاكلات اللي كل الناس بتحبها وبالذات الشباب والأطفال كمان، عشان كده بيكون نفسنا نتعلمها عشان نعملها لهم في البيت عشان يكون مصدر اكلهم تحت عنينا ويكون كمان اكلهم نضيف ومضمون، عشان كده قررنا نعلمكم طريقة عمل فاهيتا الفراخ في البيت بوصفة اجمل بكتير من وصفة المطاعم وصدقونا الفاهيتا بتاعة البيت هيكون طعمها اجمل بكتير.

المميز في فاهيتا الفراخ انها من اكلات المطبخ المكسيكي المعروف باكلاته الفخمة الجميلة، وبصراحة فاهيتا الفراخ من اجمل اكلات المطبخ المكسيكي وناس كتير جدا بيطلبوها مننا وعشان كده بنقولكم تحت امركم ومن عنينا، طلباتكم أوامر، وفي المقاله دي هنوضح لكم طريقه تحضير الفاهيتا دجاج احلي من المطاعم وباسهل الوصفة ❤.

   
 يلا بينا نبدأ 💪

   مقادير فاهيتا الفراخ:

• 8 قطع صدور فراخ
• 3 حبات بصل.
• 1 قرن فلفل اخضر حلو.
• 1 قرن فلفل احمر حلو.
• 1 قرن فلفل اصفر.
• ربع معلقة صغيرة شطة حمرة حارة.
• فصين ثوم.
• زيت.
• لمونتين كبار معصورين.
• معلقة صغيرة سكر.
• نصف معلقة صغيرة ملح.
• نصف معلقة صغيرة فلفل اسود.

      طريقة تحضير فاهيتا الفراخ أحسن من المطاعم

1. اول حاجة هنجيب قطع صدور الفراخ وننضفها كويس جدا ونخليها كويس جدا من العضم وبعدين نقطعها شرايح، وبردو نقطع البصل شرايح بس نحطه في طبق تاني.
2. هنفرم فصين الثوم وبعد كده هنقطع 3 حبات الفلفل الملونين شرايح او مكعبات.
3. هنجيب أي طبق غويط ومتوسط الحجم ونبدأ نحط فيه شرائح البصل والثوم المفروم والفلفل الملون بعد ما قطعناه مع معلقة السكر الصغيرة، بعد كده هنضيف عليهم الليمونتين المعصورين ونص معلقة الملح، وربع معلقة صغيرة من الشطة الحمرة الحارة م نصف معلقة صغيرة فلفل أسود.
4. بعد ما جهزنا كل المكونات دي وحطيناها في الطبق هنبدأ نضيف عليهم قطع صدور الدجاج المقطع شرائح، بعد كده هنبدأ نخلط المكونات مع بعضها كويس جدا ونقلبهم مع بعض عشان المكونات والفراخ يختلطو كويس جدا، وبعدين نغطي الوعاء وندخله التلاجة ونسيبه لمدة متقلش عن ساعتين.
5. بعد ما نخلص الساعتين هنطلع الفراخ من التلاجة ونحط الزيت في طاسة غويطة شوية على النار ونسيبه شوية يسخن، بعد ما نسخن الزيت هنحط خليط فاهيتا الفراخ في الزيت وبعد كده نقلب الخليط في الزيت لحاد ماالمكونات لونها يبدأ يتغير.
6. هنسيب فاهيتا الفراخ على النار شوية لحاد ما تستوي كويس جدا وبردو كل شوية نقلب المكونات عشان متتحرقش، وبعد ما نحس ان الفاهيتا استوت كويس هنقفل النار ونطلعها في طبق خارجي.
7. بعد كده هنوزع الفاهيتا في الطبق ونقدمها وهي سخنة.

وبكد تكون خلصت معانا الفاهيتا الفراخ بااسهل طريقه زي المطاعم بظبط واحلي كمان وانتو اللي هتجربوا وتحكموا،وبأذن الله هتعجب كل افراد الاسرة وهيحبها الأطفال والكبار نتمنا تجربوها ، اكلة فاهيتا الفراخ هتغير روتين الاكل وممكن نعملها علي الغدا او العشا لانها اكلة خفيفة جدا وفي نفس الوقت صحية جدا ومليانة عناصر غذائية، وان شاء الله تجربوها وتعجبكم ... وطبعا لو في أي حاجة مش واضحة في المقالة او لو كان عنكم أي استفسارات سيبوهالنا تحت في التنعليقات 👇👇 واحنا هنرد عليكم في اسرع وقت ويا ريت تقولولنا فى التعليقات بردوعن أي اكله انتوا عاوزن تعرفو خطواتها، بالهنا والشفا ودمتم في صحة   .💪💪

اكلات ممكن تعجبك:

• طريقة عمل الفراخ الصينى.
• طريقةعمل فراخ ستربس.
• طريقة عمل الكنافة النابلسية.
• طريقة عمل العجة التركية.
• طريقة عمل البان كيك | البان كيك الأصلي.
• اصابع البطاطس الهندية المقلية المقرمشة.