أفضل وأسهل مشروبات تخسيس البطن والجسم كله

أفضل وأسهل مشروبات تخسيس البطن والجسم كله

ناس كتير بعتتلنا في الرسايل وطلبت مننا نقدم مشروبات تخسيس البطن، وبصراحة احنا لقيناها فكرة كويسة جدا اننا نعمل مقالة توضح مشروبات تخسيس لان طبعا زي ما بنهتم بعرض الاكلات لازم كمان نهتم بصحتنا وبرشاقتنا لان صحتنا وصحة أولادنا تاج فوق رؤوسنا كلنا، وفي المقالة دي بأذن الله هنقدملكم أكبر مجموعة من مشروبات التخسيس اللي هتساعدكم على رفع معدل حرق الدهون في الجسم بشكل كبير، وكمان هنوضح ازاي نقدر نحضر المشروبات دي في البيت بكل سهولة وأمتي نشرب المشروبات دي.

القهوة العربي:

اول مشروبات التخسيس معانا هي القهوة العربي، ايوة القهوة العربي علي طريقة اخواتنا السعوديين، القهوة دي من اقوي مشروبات تخسيس الدهون، والسبب انها بيدخل فيها مجموعة من الأعشاب المفيدة جدا جدا، والاعشاب دي بتساعد على تخسيس البطن وتخسيس الارداف كمان.

لو جينا نبص أساسا علي القهوة بشكل عام هنلاقي ان القهوة لواحدها من اقوي مشروبات التخسيس لانها بتحتوي عل الكافيين اللي بينشط الدورة الدموية وكمان بينشط خلايا المخ، وده بيساعد علي انتاج طاقة كبيرة في الجسم من خلال حرق نسبة كبيرة من الدهون عشان كده لما بنشرب قهوة بنحس بنشاط وتركيز كبير، ما بالك باه لو شربنا القهوة مع مجموعة من الأعشاب الختلفة اللي هنذكرها دلوقتي👇، ركزوا معانا كويس:

ادوات ومكونات القهوة العربي:

•  بن فاتح
• هيل مطحون او حب (حبهان)
• زنجبيل مطحون
• قرنفل مطحون
• زعفران

 طريقة عمل القهوة العربي:

1. اول حاجة هنعملها هنجيب كنكة ونحط فيها لتر مية، بعد كده هنحط فيها معلقتين كبار من البن الفاتح، ونقلب المية والبن كويس بعد كده هنحطهم على نار هادية لحاد ما المية تبدأ تغلي.

2. اول ما المية تبدأ تغلي هنشيل الكنكة من عالنار ونهدي النار على الآخر ونرجع نحط الكنكة تاني على النار، ونخلي بالنا منها كويس جدا كل ما القهوة تيجي تفور نشيلها من عالنمار ونرجعها تاني لما تهدي، وهنفضل نعمل كده ونغلي في القهوة لمدة 20 دقيقة.

3. بعد مرور ال 20 دقيقة هنطفي النار خالص، بعد كده هنحط باقي المكونات والاعشاب على القهوة، هنحط الأول معلقة صغيرة من الهيل، بعد كده هنضيف ربع معلقة من القرنفل المطحون وربع معلقة من الزنجبيل المطحون، ورشة صغيرة من الزعفران، ونقلبهم مع بعض ونسيب القهوة تهدي شوية.

وبكده نكون عملنا مشروب تخسيس من أقوى مشروبات تخسيس البطن وجهزناه للتقديم، وعلى فكرة أحسن وقت ممكن تشرب فيه القهوة العربي هو الصبح على الريق، وممكن تاخد فنجان الصبح وفنجان فنص اليوم، ويفضل أنك متشربش قهوة بالليل خالص عشان متعملكش ارق.

مشروبات للتخسيس بالزنجبيل:

الزنجبيل يا جماعة!!!! الزنجبيل ده من اكتر الأعشاب اللي بتساعد على حرق الدهون، والمعروف عن الزنجبيل انه بيدخل كتير في تكوين مشروبات للتخسيس وكمان ادوية للتخسيس سواء كان بيدخل في المشروبات والأدوية دي بطريقة مباشرة او غير مباشرة، عشان كده كان لازم تكون مشروبات التخسيس بالزنجبيل موجودة معانا بشكل أساسي في المقالة دي، يلا بينا نتعرف على المشروبات دي:

1.مشروب الزنجبيل بالشاي الأخضر:

كل اللي هنعمله اننا هنحط نص معلقة صغيرة من الزنجبيل المطحون على معلقة صغيرة من الشاي الأخضر في الكوباية ونحط عليهم كوباية مية بتغلي، ونسيبهم شوية لما المية تبرد ونشربهم، يفضل طبعا نشرب المشروب ده من غير سكر، وممكن بردو نضيف عليهم معلقة عسل ابيض عشان يكون طعم المشروب ده مقبول شوية.

هنشرب الزنجبيل بالشاي الأخضر مرتين او 3 مرات في اليوم عشان نحصل على نتيجة ممتازة في حرق الدهون خلال شهر واحد بس، بنحب نفكركم بان المشروب ده معروف بقدرته الكبيرة على تخسيس الكرش.

2.مشروب الزنجبيل والليمون:

نفس اللي عملناه في المشروب اللي فات هنجيب كوباية ونحط فيها نص معلقة صغيرة زنجبيل ونعصر عليها ليمونة كاملة، بعد كده هنسخن المية ونحطها في الكوباية ونقلب المية والزنجبيل والليمون ونسيبها لما تبرد ونشرها، وبردو ممنوع نحلي المشروب ده بالسكر ابدا لو عاوزين نحليه هنحليه بمعلقة عسل صغيرة فقط، ويفضل بردو اننا نشرب المشروب ده مرتين او 3 مرات في اليوم عشان نقدر نحصل على نتيجة كويسة في أسرع وقت.

3.مشروب الزنجبيل والكركم:

مشروب الزنجبيل والكركم ده باه مش بس من احسن وافضل مشروبات التخسيس، لا ده كمان بيعالج  وبيحافظ علي الجسم من امراض كتير، علماء كتير بيقولوا علي الكركم انه صيدلية متكاملة لانه ليه قدرة كبيرة جدا علي تخسيس البطن وتخسيس الارداف رفع المناعة وقتل الخلايا السرطانية اللي ممكن تنشط وتأذي الجسم في المستقبل، المشروب ده جميل جدا ومفيد جدا جدا كل اللي هنعملله اننا هنجيب كنكة ونحط فيها كوباية مية كبيرة.

بعد كده هنحط معلقة زنجبيل صغيرة ومعلقة كركم صغيرة ونقلب المية مع الزنجبيل والكركم ونحطهم علي النار شوية ونسيبهم لحاد ما يغلوا، بعد كده هنطفي النار عليهم ونصفي المية في كوباية بكده يكون المشروب جاهز للتقديم، ممكن نحلي المشروب ده بمعلقة عسل بس، وبنكررتاني ممنوع استخدام السكر في أي مشروب للتخسيس.

مشروبات للتخسيس بالقرفة:

المعروف عن القرفة انها من النباتات المفيدة جدا، بسبب فوايد القرفة وطعمها الجميل بتستخدم في اكلات كتير وكمان بتستخدم في تكوين مشروبات تخسيس كتيرة معروفة بقدرتها على تفتيت الدهون ورفع معدل حرق الدهون في جسم الانسان، ومن الاكلات الجميلة اللي بنستخدم فيها القرفة بشكل أساس اكلة السينابون، ولان القرفة بينصح بيها أطباء واصائيين تغذية كتير، قررنا اننا نذكر بعض مشروبات التخسيس بالقرفة:

1.اللبن بالقرفة:

مشروب اللبن بالقرفة مشروب مفيد جدا وغني بالعناصر الغذائية زي البروتين والالياف والدهون الصحية، ده طبعا غير قدرته الفتاكة تخسيس البطن وتخسيس الارداف، ويعتبر مشروب اللبن بالقرفة مشروب تخسيس قوي جدا لو شربناه كل يوم الصبح قبل الفطار، كل اللي هنعمله اننا هنحط معلقة اللبن في كنكة كبيرة ونحط عليه معلقة قرفة صغيرة ونسيبه على النار لحاد ما يغلي.

بعد كده هنصفي اللبن بالقرفة في كوباية ونسيبه لما يبرد ونشربه وممكن نحليه بمعلقة عسل صغيرة، والجميل جدا في مشروب اللبن بالقرفة ان طعمه حلو اوي، وهتحبوه بأذن الله.

2.القرفة والزنجبيل:

مشروب القرفة والزنجبيل يعتبر مشروب تخسيس قاسي جدا على الدهون وبيعتبره علماء كتير من اقوي مشرويات تخسيس البطن وتخسيس الارداف، بيرفع مستوي حرق الدهون في الجسم بسرعة جدا، ويعتبر من أسهل مشروبات التخسيس من حيث التحضير، كل اللي هنعمله هنغلي شوية مية في البراد، ونحط نص معلقة صغيرة قرفة ونص معلقة صغيرة زنجبيل في الكوباية او الفنجان.

ومعاهم معلقة صغيرة عسل ابيض، ولما المية تغلي هنضيفها على القرفة والزنجبيل في الكوباية ونقلبهم مع بعض، ونسيبهم شوية لما يبردوا وبعدين نشربهم، ويفضل طبعا اننا نكرر المشروب ده مرتين او 3 مرات في اليوم عشان يساعدنا على تخسيس البطن.

وبكده نكون وضحنالكم أكبر مجموعة مشروبات للتخسيس ممكن تعتمدوا عليها بشكل أساسي عشان تقللوا دهون جسمكم وكمان ترفعوا معدل حرق الدهون، وبأذن الله في مقالات تانية كتير هنوضحلكم فيها وصفات اكلات هتساعدكم كتير جدا على فقدان الوزن، وبنفكركم لو محتاجين وتعرفو وصفة أي اكلة سيبولنا اسمها تحت في التعليقات ولو في أي حاجة مش واضحة او لو عندكم أي استفسارات سيبوهالنا بردو تحت في التعليقات، ودمتم في صحة 💪💪.

اكلات ممكن تعجبك:

• اسرار طريقة عمل الكيكة بالشوكولاته.
• طريقة عمل المكرونة بالبشاميل.
• اهم اسرار طريقة الكنافة النابلسيةبالتفصيل.
• طريقة عمل اكلة المانتي التركي | اكلات تركية.
• طريقة عمل كريب شاورما الفراخ بكل سهولة.
• طريقة عمل اجنحة الدجاج.