أكلات جديدة | ما هي طريقة عمل كفتة داود باشا؟

أكلات جديدة | ما هي طريقة عمل كفتة داود باشا؟

وعدناكم ان أجمل أكلات جديدة هتلاقوها عندنا وبس، عشان كده جبنا لكم المرة دي طريقة عمل كفتة داود باشا الخطيرة، واحدة من أكلات جديدة كتير حضرناها لكم، كفتة داود باشا كل المصريين بيعشقوها وبيعملوها دايما من غير حتى ما يعرفوا ان اسمها كده (كفتة داود باشا)، وكمان من غير ما يعرفوا مين هو داود باشا ده أصلا، قصة الاكلة دي طويلة جدا بس باختصار كده هي اكلة تركية وصلت مصر مع داود باشا حاكم مصر العثماني سنة 1538م.

كفتة داود باشا اتسمت بالاسم ده لأن داودباشا كان بيحبها جدا وكان بياكلها كل يوم لدرجة انه كان بيعاقب الطباخين عقاب شديد جدا لو حد منهم غلط في أي جزء بسيط في وصفة الكفتة دي، ولان كفتة داود باشا بصراحة جميلة جدا وطعمها روعة وكمان ريحتها تجنن، قررنا في المقالة دي نوضحلكم بالتفصيل طريقة عمل كفتة داود باشا الاصلية، وبأذن الله هتعجبكم جدا، يلا بينا نشوف المكونات والمقادير.

مكونات كفتة داود باشا:

• نصف كيلو لحمة.
• بصلة متوسطة.
• معلقتين كبار دقيق ابيض.
• معلقة صغيرة ملح.
• معلقة صغيرة فلفل اسمر.
• معلقة صغيرة بابريكا.
• معلقة صغيرة بيكينج باودر.
• معلقة صغيرة ثوم مفروم.

مقادير صلصة الكفتة:

• بصلة متوسطة مبشورة.
• معلقة صغيرة ثوم.
• نصف كيلو طماطم.
• نصف معلقة صغيرة سكر.
• معلقة كبيرة ملح.
• معلقة صغيرة فلفل اسمر.

خطوات طريقة عمل كفتة داود باشا:

قبل ما نبدأ في الخطوات لازم نعرف بعض الملاحظات اللي هتخلي طريقة كفتة داود باشا طعمها جميل جدا ومظبوطة، ولان الاكلة دي من ضمن أكلات جديدة كتير هنتعلمها بأذن الله مع بعض على موقع أطعم اكلات، لازم تكون مظبوطة 100%، اولًا كده لازم اللحمة تتفرم كويس جدا مش أقل من فرمتين، ثانيا لازم نقلب كل المكونات مع بعضها كويس جدا عشان الطعم يبقى مظبوط، ويلا بينا نشوق الخطوات 👇👇.

1. اول حاجة هنجيب بولة او حلة غويطة متوسطة ونحط فيها نصف كيلو اللحمة، وهنضيف على اللحمة البصلة بعد ما نبشرها كويس جدا بالمبشرة أو الكابة.
2. بعد كده هنضيف عليهم البهارات اللي جهزناها، اللي هي معلقة صغيرة ملح ومعلقة صغيرة فلفل اسمر ومعلقة صغيرة بابريكا ومعلقة صغيرة بيكينج باودر ومعلقة صغيرة ثوم مفروم.
3. هنبدأ نخلط كل المكونات دي مع بعضها كويس جدا ونعجن كل مكونات الكفتة مع بعضها بأدينا لمدة متقلش عن 5 دقائق عشان العجينة تكون متماسكة مع بعضها.
4. بعد كده هنبدأ نصبعها ونكورها بالحجم اللي احنا عاوزينه،بعد ما نصبع كل الكمية هنجيب طبق ونحط فيه معلقتين الدقيق الكبار، ونبدأ نغطس كل صوابع الكفتة فيه بحيث أن كل صوابع الكفتة تدهن دقيق.
5. بعد كده هنبدأ في خطوة قلي كفتة داود باشا، كل اللي هنعمله اننا هنجيب طاسة واسعة ونحط فيها 5 معالق زيت كبار ونسيب الطاسة والزيت شوية على نار متوسطة لحاد ما الزيت يسخن خالص.
6. أول ما الزيت يسخن هننزل فيه صوابع الكفتة ومنقلبهاش الا لما تتحمر كويس جدا من تحت عشان متتفرفتش مننا واحن بنقلبها.

تحضير صلصة الكفتة:

1. هننضف نصف كيلو الطماطم كويس جدا ونقطعهم ونضربهم في الخلاط كويس مع شوية مية صغيرين ونسيبهم على جنب عشان هنستخدمهم دلوقتي.
2. بعد ما نطلع الكفتة من الطاسة هنسيبها على النار وهننزل فيها بالبصلة المبشورة ونقلبها شوية على النار لحاد ما لون قطع البصل يبدأ يتغير، للون الذهبي.
3. بعد ما البصلة تتشوح كويس ولونها يتحول للون الذهبي هننزل عليها بمعلقة صغيرة ثوم مفروم، ونشوح فيهم مع بعض شوية لمدة متزيدش عن دقيقة عشان عشان الثوم ميتحرقش وطعمه يمرر.
4. اول ما الثوم ريحته تبدأ تظهر هننزل عليه في الطاسة بالطماطم اللي جهزناها في الخطوة الأولى، وهنقلبهم مع بعض كويس جد، بعد كده هنسيبهم شوية على نار متوسطة مع بعض عشان يتسبكوا ونغطي عليهم بأي غطا موجود عندنا في المطبخ.
5. بعد ما الصلصة تتسبك كويس هنبدأ نحط فيها شوية التوابل بتاعتها اللي هي معلقة صغيرة سكر، معلقة كبيرة ملح، ومعلقة صغيرة فلفل اسمر وهنقلبهم كويس جدا مع بعض.

الخطوة الأخيرة:بعد ما جهزنا صوابع الكفتة وكمان جهزنا صلصة الكفتة، هنبدأ نضيف صوابع الكوفتة على الصلصة في الطاسة ونقلبهم مع بعض شوية لحاد ما كل صوابع الكفتة تتغرق بالصلصة، بعد كده هنضيف عليهم ربع كباية مية ونغطي الطاسة والكفتة ونسيبهم يستووا مع بعض للآخر لمدة 5 دقايق.

وبكدة تكون كفتة داود باشا جاهزة معانا وكمان جاهزة للتقديم، وعشان الاكلة دي تكون كاملة ممكن نقدم جمها شوية رز حلوين، كده نكون وضحنا لكم طريقة عمل كفتة داود باشا بكل تفاصيلها نتمنى انكم تجربوها، وبأذن الله هتعجب كل افراد الاسرة، وزي ما وعدناكم بأذن الله هنعملكم دايما أكلات جديدة وأكلات سريعة ان شاء الله هتعجبكم بالظبط زي الاكلات اللي عملناها لكم قبل كده زي كفتة الفراخ وطريقة شوربة الماشروم وغيرهم وغيرهم.

طبعا متنسوش تقولوا لنا رأيكم في طريقة كفتة داود باشا بتاعتنا في التعليقات او في صفحاتنا على مواقع التواصل الاجتماعي، وطبعا لو في عندم أي أسالة او استفسارات سيبوها لنا تحت في التعليقات 👇👇 واحنا هنرد عليكم في أسرع وقت، ولو في عندكم أي أكلة عاوزين تعرفوا طريقتها قولوا لنا على اسمها في التعليقات واحنا هنعملها لكم في مقالة جديدة، جربوا طريقة كفتة داود باشا بتاعتنا، بالف هنا وشفا، ودمتم في صحة 💪💪.

اكلات ممكن تعجبك:

• اسرار طريقة عمل الكيكة بالشوكولاته.
• طريقة عمل المكرونة بالبشاميل.
• اهم اسرار طريقة الكنافة النابلسية بالتفصيل.
• طريقة عمل اكلة المانتي التركي | اكلات تركية.
• طريقة عمل كريب شاورما الفراخ بكل سهولة.
• طريقة عمل اجنحة الدجاج.

وتقدري بردو تشتري أفضل أدوات المطبخ اللي هتساعدك وتوفر ليكي كتير وكمان بأسعار ممتازة من هنا