كحك العيد | أسرار طريقة عمل الكحك الناعم بالتفصيل
قربت ليالي رمضان 🌙🌙 تنتهي، وبعد رمضان هينورنا
العيد بفرحته🙌😍 واغانيه واكلاته وحلوياته الجميلة وعشان نكون جاهزين لاستقبال
العيد، قررنا في موقع أطعم اكلات اننا نوضحلكم طريقة عمل كحك العيد 🍪🍪 الناعم الجميل،
طبعا عشان نتعلم مع بعض طريقة عمل الكحك الناعم في البيت ومنلجأش لكحك المحلات
اللي بيكون غالي جدا في موسم الأعياد، وكمان طعمه مش بيكون زي ماحنا عاوزين.
ولأن كحك العيد من اهم الحلويات والاكلات اللي بنحب
نحافظ على وجودها في البيت عشان نستقبل بيها العيد، قررنا نبسط لكم طريقة عمل
الكحك الناعم ونوضحها لكم بكل تفاصيلها بمنتهى السهولة والبساطة، يلا بينا دلوقتي
نخش نتعرف على المكونات والمقادير اللي هنستخدمها في طريقة عمل كحك العيد، وبعدها
نخش على خطوات طريقة عمل الكحك الناعم بالتفصيل.
مكونات ومقادير كحك العيد:
- كيلو دقيق (دقيق الكحك والبسكوت).
- كبايتين ونصف سمنة (سائلة).
- معلقة صغيرة ريحة الكحك (بودرة).
- 3 معالق كبار لبن بودرة.
- 3 معالق كبار سمسم (محمص).
- معلقة كبيرة سكر.
- معلقة كبيرة خميرة.
- معلقة كبيرة بيكينج باودر.
- نصف معلقة صغيرة ملح.
- نصف كباية كبيرة لبن أو نصف كباية مية (اختياري).
خطوات طريقة عمل الكحك الناعم:
1.
في الأول وقبل ما نبدأ في أي حاجة هنجيب ربع
كباية مية كبيرة، وهنحط فيها معلقة كبيرة سكر ومعلقة كبيرة خميرة،ونقلب
السكر والخميرة في المية ونسيبهم شوية على جنب، والخطوة دي طبعا عشان نختبر بيها
الخميرة ونشوفها شغالة ولا مش شغالة.
2.
بعد كده هنجيب بولة كبيرة او أي وعاء او
بلاستيكاية كبيرة وغويطة عشان نجهز فيها عجينة كحك العيد، هنحط في البةولة او
البلاستيكاية دي كل المكونات الجافة اللي معانا، اللي هي (1
كيلو دقيق، معلقة صغيرة ريحة الكحك، 3 معالق كبار سمسم (محمص)، معلقة
كبيرة بيكينج باودر، ونصف معلقة صغيرة ملح).
3.
هنقلب كل المكونات الجافة دي👆
مع بعضها كويس جدا بالمعلقة، وبعد ما نقلبهم كويس جدا هنبدأ نضيف عليهم كبايتين
ونصف سمنة (سائلة)، وطبعا لازم تكون السمنة سائلة، وفي نفس الوقت مش سخنة ابدًا،
يعني تكون السمنة في درجة حرارة الغرفة.
4.
بعد كده هنبدأ في عجن و(بس) عجينة الكحك، هنستمر
في تقليب وعجن و(بس) عجينة الكحك كويس جدا بأدينا لحاد ما الدقيق والسمنة يختلطوا
كويس جدا ببعض وكمان الدقيق يبدأ يتشرب السمنة كويس جدا.
5. بعد ما
اتأكدنا ان الدقيق امتزج كويس جدا بالسمنة، والعجينة صارت ناعمة جدا معانا، هنضيف
الخميرة على العجينة وهنستمر في العجن والتقليب كويس جدا.
ملحوظة مهمة: لما نرجع لاختبار الخميرة عشان نشوف الخميرة كويسة ولا مش كويسة، لو لقينا الخميرة عليت وعملت رغوة كبيرة يبقى كده الخميرة جاهزة، انما لو لقيناها زي ما هي، يبقى نوعية الخميرة مش كويسة ومش هينفع نستخدمها.
6.
بعد كده هنضيف على العجينة نصف كباية كبيرة لبن
أو نصف كباية مية، وبعد كده هنستمر في التقليب والعجن كويس جدا لحاد ما كل
المكونات تختلط ببعضها والعجينة تكون جاهزة معانا.
7. هنغطي
عجينة الكحك بكيس بلاستيك ونسيبها على جنب لمدة ساعة عشان تخمر، وعلما تخمر عجينة
الكحك هنجهز حشو الكحك، اللي هو الملبن والعجوة.
مكونات ملبن كحك العيد:
- نصف كيلو ملبن سادة خام.
- معلقة كبيرة سمنة.
- معلقة كبيرة روح الموز (اختياري).
- معلقة كبيرة سمسم (محمص).
خطوات طريقة عمل ملبن كحك العيد:
هجيب طبق غويط وكبير شوية ونحط فيه كل المكونات
اللي جهزناها اللي هي نصف كيلو ملبن سادة خام، معلقة كبيرة
سمنة، معلقة كبيرة روح الموز، ومعلقة كبيرة سمسم (محمص)، وهنبدأ نعجن كل المكونات
دي وهنخلطها ببعضها كويس جدا جدا، وبكده يكون الملبن جاهز، ويفضل اننا نجهزة على
شكل كور صغيرة، زي اللي فالصورة دي 👇 عشان لما نيجي نحشي الكحك يكون الحشو سهل.
مكونات عجوة (بلح) كحك العيد:
- ربع كيلو عجوة.
- معلقة كبيرة سمنة.
- نصف معلقة صغيرة ريحة الكحك (اختياري).
طريقة عمل عجوة (بلح) كحك العيد:
نفس الخطوات اللي عملناها في تجهيز الملبن، هنجيب
طبق ونحط فيه كل المكونات اللي جهزناها واللي هي ربع
كيلو عجوة، معلقة كبيرة سمنة، ونصف معلقة صغيرة ريحة الكحك، هنعجن كل المكونات دي
وهنقلبهم مع بعض كويس جدا، وبكده تكون عجوة كحك العيد جاهزة معانا، وبعد كده
نجهزها للحشو على شكل كور صغيرة.
خطوات طريقة تجهيز كحك العيد (الحشو والتسوية):
1.
بعد ما سيبنا عجينة كحك العيد لمدة ساعة عشان
تخمر، وبعد ما جهزنا حشو الكحك (العجوة والملبن)، دلوقتي هنبدأ نحشي كحك العيد، كل
اللي هنعمله، اننا هناخد قطعة من العجينة بحجم مناسب ونحط جواها قطعة من الحشو
اللي أحنا مجهزينه، ونقفل العجينة كويس من كل الجهات، وبعد كده هنشكل العجينة
وجواها الحشو بالشكل اللي احنا عاوزينه.
2.
هنكرر الخطوة دي مع كل كمية العجين والحشو اللي
احنا جهزناه وبعد كده هنرص الكحك بتاعنا في الصواني او الصيجان اللي هتخش الفرن
بالشكل ده👇 وبكده
يكون الكحك بتاعنا جاهز للتسوية.
3.
بعد ما جهزنا الكحك للتسوية هنشغل الفرن لمدة 10
دقائق او ربع ساعة على درجة حرارة 180 درجة قبل ما ندخل الكحك في الفرن عشان الفرن
يسخن كويس.
4. بعد
كده هنبدأ ندخل صواني الكحك في الفرن، هنحط صينية الكحك على الشبكة اللي في نص
الفرن، وطبعا الكحك هياخج معانا بالضبط فترة تتراوح ما بين 15 : 20 دقيقة فقط.
ملحوظة مهمة: طبعا كل المكونات والمقادير اللي استخدمناها في طريقة عمل كحك العيد موجودة عند أي عطار او أي حد بيبيع مستلزمات الحلويات.
وبكده نكون وضحنا لكم طريقة عمل الكحك الناعم
المظبوط عشان العيد، نتمنى أن طريقة عمل كحك العيد بتاعتنا تكون عجبتكم، ونتمنى
طبعا تجربوها وتقولولنا على آرائكم تحت في التعليقات👇، وانتظرونا طبعا في خلال يومين هنجهز لكم
باقى وصفات حلويات العيد، زي بسكويت العيد والغريبة والبيتي فور.
طبعا لو في عندكم أي استفسارات او أي حاجة مش
واضحة في طريقة عمل الكحك الناعم او في أي وصفة تانية، أو لو عندكم اكلات جديدة
عاوزين تعرفوا طريقتها، متترددوش ابدا وابعتولنا كل آرائكم واسئلتكم واستفساراتكم
في رسائل على صفحتنا في الفيس بوك او ممكن تسيبولنا استفساراتكم في التعليقات تحت👇
واحنا هنرد عليكم في أسرع وقت، جربوا طريقة عمل كحك العيد بتاعنا، بألف هنا وشفا،
ودمتم في صحة💪💪.
اكلات جديدة ممكن تعجبك:
- طريقة عمل الفراخ الصينى.
- طريقة عمل فراخ ستربس.
- طريقةعمل الكنافة النابلسية.
- طريقة عمل العجة التركية.
- طريقة عمل البان كيك الاصلي | وصفة البان كيك الأصلية.
- اسرار طريقة عمل الكيكة بالشوكولاته.
- اصابع البطاطسالهندية المقلية المقرمشة.