طريقة عمل بسكويت العيد
بالنشادر وريحة البرتقال بكل سهولة
زي ما وعدناكم هنكمل مع
بعض وصفات حلويات العيد وزي ما عملنا لكم طريقة عمل كحك العيد الناعم، هنوضح لكم كمان المرة دي طريقة عمل بسكويت العيد بالنشادر، ولان
كحك العيد مينفعش من غير بسكويت وبيتي فور وكمان الغريبة، باذن الله الوصفة الجاية
هتكون عن طريقة عمل البيتي فور والغريبة عشان نكمل حلويات العيد ونعملها كلها في
البيت.
الجميل في عمل حلويات العيد
في البيت انها هتوفر معانا كتير جدا وكمان هتكون مضمونة من حيث الجودة والنظافة،
ده غير ان طعمها في البيت بتبقى أحلي بكتير لانها بتكون خالية من أي مواد حافظة أو
أي مكسبات للطعم او الرائحة، يلا بينا نتعرف مع بعض على كل مكونات ومقادير وكمان
خطوات طريقة عمل بسكويت العيد بالنشادر.
مكونات ومقادير بسكويت العيد:
- كيلو دقيق فاخر للكحك والبسكويت.
- كبايتين ونصف + معلقة كبيرة من السكر البودرة (3 كبايات الا تلت).
- كبايتين وتلت سمنة او زبدة (يفضل تكون باردة بدرجة حرارة الثلاجة).
- معلقة كبيرة بكينج باودر.
- 8 معالق كبيرة لبن حليب دافي.
- معلقة كبيرة نشادر.
- 4 بيضات.
- معلقة صغيرة فانيليا.
- معلقتين ونصف من بودرة البرتقال أو عصير البرتقال البودرة (تانج).
- معلقة كبيرة من اسانس أو ريحة أو نكهة البرتقال (من عند
العطار).
خطوات طريقة عمل بسكويت العيد بالنشادر وريحة البرتقال:
قبل ما نبدأ في خطوات طريقة عمل بسكويت العيد بالنشادر
وريحة البرتقال، لازم نعرف ان خطوات طريقة عمل بسكوت العيد سهلة جدا لكن
محتاجة مننا بس شوية تركيز عشان تطلع معانا بالنتيجة اللي احنا محتاجنها والطعم
والريحة المظبوطة.
1.
اول خطوة هنعملها هي
اننا هنخلط معلقة النشادر الكبيرة مع ال8 معالق الكبيرة من الحليب الدافي، هنقلبهم
مع بعض شوية بالمعلقة وبعد كده هنسيبهم شوية على جنب.
2.
بعد كده هنضيف معلقة
كبيرة من البيكينج باودر على كيلو الدقيق وهنقلبهم كويس جدا مع بعض لحاد ما الدقيق
يختلط كويس بالبكينج باودر، وبردو هنسيبهم شوية على جنب.
3.
دلوقتي هنعجن كبايتين
وتلت من السمنة الباردة مع 3 كبايات الا ربع من السكر البودرة، هنقلبهم مويس جدا
مع بعض باستخدام العجانة او المضرب الكهربي او المضرب اليدوي، ولازم طبعا نفضل
نقلب فيهم مدة كبيرة جدا متقلش عن تلت ساعة لحاد ما يتحول قوام السمنة والسكر مع
بعض لقوام كريمي ناعم جدا.
4.
بعد كده هنبدأ نضيف
معلقة صغيرة من الفانيليا، وكمان هنبدأ نضيف البيض واحدة واحدة، يعني هنضيف بيضة واحدة
وبعد كده نقلب كويس لحاد ما تختفي، وبعد كده نضيف بيضة تانية ونقلب لحاد ما تختفي
وهكذا مع ال4 بيضات، ويفضل ان البيض تكون درجة حرارته دافية، ميكونش بارد ولسة
خارج من التلاجة.
5.
بعد كده هنضيف معلقتين ونصف من بودرة البرتقال أو عصير
البرتقال البودرة (تانج)، وكمان هنضيف معلقة كبيرة من اسانس أو ريحة أو نكهة البرتقال، ونستمر في التقليب كويس جدا.
6.
دلوقتي هنجيب خليط
الحليب والنشادر اللي جهزناه في اول خطوة، وهنبدأ نضيفة واحدة واحدة بالتدريج واحنا
مستمرين في التقليب كويس جدا لحاد ما نحس ان كل المكونات اللي ضفناها وقلبناها مع
بعضها امتزجت جدا مع بعضها، واختلطوا بشكل كويس جدا.
7.
بعد كده هنبدأ نضيف خليط
الدقيق مع البيكينج باودر اللي جهزناه من شوية، وهنستمر في التقليب والعجن كويس
جدا، وكمان في الخطوة دي ممكن نعجن بأدينا، وطبعا هنستمر في العجن لحاد ما نحصل
على قوام عجينة بسكويت العيد الناعم بالشكل ده 👇👇، وبكده تكون عجينة بسكويت العيد جاهزة
معانا.
8.
بعد كده هنبدأ نشكل في
البسكوت باستخدام مكنة تشكيل البسكوت، او فرامة اللحمة اللي ممكن نركبلها قالب
تشكيل البسكوت، وكمان ممكن نشكل البسكوت بأدينا او باستخدام أي أدوات عادية تقليدية.
9.
وبعد كده طبعا هنرصص
البسكوت في الصواني او الصيجان اللي هندخلها الفرن، وطبعا يفضل اننا نشغل الفرن
قبل ما ندخل فيه البسكوت بمدة متقلش عن 10 دقايق.
10.
دلوقتي هندخل البسكوت في
الفرن عشان يتخبز على درجة حرارة 160 درجة، وطبعا يفضل اننا نحط البسكوت في الرف
الوسطاني في الفرن، واهم حاجة في خطوة خبز بسكويت العيد هي متابعته باستمرار داخل
الفرن.
11.
طبعا هنسيبه في الفرن فترة
تتراوح ما بين 15 : 20 دقيقة، وطبعا لو حسينا ان البسكويت محتاج لون من فوق هنشغل
شواية الفرن شوية صغيرين عشان ياخد اللون، وبكده يكون بسكويت العيد جاهز معانا.
ملحوظة مهمة: في طريقة عمل بسكويت العيد بالنشادر ممكن نستغني تماما عن عصير البرتقال البودرة ونكهة البرتقال، طبعا لو احنا مش عاوزين طعم البسكوت يكون فيه نكهة البرتقال، وكمان ممكن نعمل شوية بنكة البرتقال وشوية من غيرها.
وبكده نكون وضحنا لكم كل
تفاصيل طريقة عمل بسكويت العيد بالنشادر وريحة البرتقال، وكل عام وأنتم بخير،
ونتمنى ان طريقة عمل بسكويت العيد بالنشادر وريحة البرتقال بتاعتنا تكون عجبتكم،
وطبعا ياريت تجربوها في البيت وتقولولنا على آرائكم تحت في التعليقات👇👇.
طبعا انتظرونا باذن الله
الوصفة الجاية زي ما وعدناكم هنوضحلكم طريقة عمل البيتي فور والغريبة عشان نكون
مجهزين كل حلويات العيد في البيت ونضايف بيها كل حبايبنا.
وبنفكركم لو في عندكم أي
استفسار او أي ملاحظات، متترددوش ابدا وابعتولنا كل استفساراتكم وملاحظاتكم وآرائكم
في رسايل على صفحتنا في الفيسبوك، او ممكن تسيبوهالنا تحت في التعليقات، وكمان لو في عندكم أي وصفات او
اكلات جديدة عاوزين تعرفوا طريقتها ابعتوهالنا بردو في رسايل على صفحتنا في الفييس
بوك او سيبوهالنا تحت في التعليقات، واحنا هنرد عليكم في اسرع وقت، كل سنة وانتم
طيبين، جربوا طريقة عمل بسكويت العيد بالنشادر بتاعنا، بالف هنا وشفا، ودمتم في
صحة 💪💪.
اكلات جديدة ممكن تعجبك:
- طريقة عمل الفراخ الصينى.
- طريقة عمل فراخ ستربس.
- طريقة عمل الكنافة النابلسية.
- طريقة عمل العجة التركية.
- طريقةعمل البان كيك الاصلي | وصفة البان كيك الأصلية.
- اسرار طريقة عمل الكيكة بالشوكولاته.
- اصابع البطاطس الهندية المقلية المقرمشة.