طريقة عمل البيتي فور
وطريقة عمل الغريبة | حلويات العيد
جبنا لكم المرة دي طريقة
عمل الغريبة وطريقة عمل البيتي فور زي ما وعدناكم اننا هنكمل لكم سلسلة حلويات
وبسكوتات العيد، وزي ما وضحنا لكم قبل كده طريقة عمل كحك العيد، وطريقة عمل بسكويت العيد، المرادي بأذن الله هنوضحلكم كل تفاصيل طريقة عمل البيتي فور
وطريقة عمل الغريبة عشان نكون داخلين العيد وعاملين كل حلويات العيد بأدينا.
طريقة عمل البيتي فور
وطريقة عمل الغريبة سهلة جدا ويعتبروا أسهل بكتير من طريقة عمل كحك العيد وطريقة
عمل بسكويت العيد، وكمان المكونات والمقادير اللي هنستخدمها في طريقة عمل البيتي فور وطريقة عمل الغريبة بتكون اقل
بكتير، ودلوقتي يلا بينا نشوف المكونات والمقادير اللي هنستخدمها وكمان هنشوف مع
بعض الخطوات بالتفصيل واحدة بواحدة.
أولا: البيتيفور.
مكونات ومقادير البيتي فور:
- كبايتين دقيق كبار.
- كباية سمنة كبيرة.
- نصف كباية سكر بودرة.
- صفار بيضة واحدة.
- ربع معلقة صغيرة ملح.
- معلقة كاكاو خام كبيرة.
- معلقة فانيليا صغيرة.
خطوات طريقة عمل البيتي فور:
1.
في الأول هنجيب بولة او
أي وعاء غويط ونحط فيه نصف كباية سكر البودرة وكمان هنحط عليهم كباية السمنة
الكبيرة، ويفضل ان السمنة تكون سايحة بس مش سخنة يعني في درجة حرارة الغرفة.
2.
بعد كده هنجيب المضرب
اليدوي او المضرب الكهربي ونبدأ نضرب السمنة مع السكر البدرة بمدة متقلش عن 10
دقايق لحاد ما يتحول لون الخليط من اللون الأصفر الى اللون الأبيض المسفر ويتحول
قوام الخليط الى قوام كريمي.
3.
بعد كده هضيف على الخليط
صفار البيضة وكمان معلقة الفانيليا الصغيرة ونكمل ضرب بالمضرب ونخلطهم كويس جدا مع
بعض.
4.
بعد كده هنضيف الدقيق
بالراحة خالص على 4 مرات، وكمان هنضيف ربع معلقة الملح الصغيرة، واحنا طبعا مستمرين
في التقليب بالمضرب، هنستمر في التقليب كويس جدا لحاد ما خليط المكونات يتجانس
كويس جدا مع بعضه، ويتكون عجينة متجانسة.
5.
بعد ما العجينة تتكون
معانا وتكون ناعمة ومتجانسة، هنحط العجينة في التلاجة لمدة نصف ساعة.
6.
بعد كده هنجيب عجينة
البيتيفور من التلاجة ونقسمها على مقدارين، المقدار الأول هنسيبه زي ما هو،
والمقدار الثاني هيكون أصغر شوية وهنضيف عليه معلقة كاكاو خام كبيرة، ونقلبهم كويس جدال مع بعض
بالمضرب.
7.
بعد كده هنبدأ نشكل
عجينة البيتيفور السادة واللي بالكاكاو بمكنة البيتيفور او بقمع البيتي فور، وطبعا
هنرصص قطع البيتي فور في الصواني او الصيجان اللي هتخش الفرن.
8.
قبل ما نحط البيتي فور
في الفرن، هنشغل الفرن على درجة حرارة 180 درجة لمدة 10 دقائق، وبعد كده ندخل
صواني البيتي فور في الفرن، ويفضل اننا نحطهم في الرف الوسطاني، وهنسيب البيتيفور
في الفرن لمدة تتراوح بين 15 : 20 دقيقة بالضبط.
ثانيا: الغريبة
مكونات ومقادير الغريبة:
- كبايتين دقيق.
- كباية سمنة باردة.
- نصف كباية سكر بودرة.
- ربع معلقة فانيليا صغيرة.
- ربع معلقة ملح صغيرة.
خطوات طريقة عمل العريبة:
1.
هنجيب بولة او طبق كبير
وغويط وهنبدأ نحط فيه كباية السمنة، (ويفضل تكون كباية السمنة خارجة من التلاجة)،
وبعد كده هنبدأ نفتت السمنة لقطع صغيرة بالمعلقة.
2.
بعد كده هنضيف نصف كباية
من السكر البودرة المنخول على السمنة، وبعد كده نقلبهم مع بعض شوية ونهرس قطع
السمنة بالمعلقة كويس.
3.
دلوقتي هنستخدم مضرب
البيض اليدوي او العجان الكهربائي او المضرب الكهربائي عشان نقلب السمنة كويس جدا
مع السكر، وهنستمر في الضرب والتقليب لحاد ما يتحول قوام السمنة والسكر مع بعض الى
قوام كريمي ويتحول لون الخليط من الأصفر الى الأبيض.
4.
بعد كده هنضيف الدقيق
على خليص السمنة والسكر لكن لازم ننخله كويس بالمصفة قبل متا نضيفه وبع الدقيق
هنضيف ربع معلقة صغيرة فانيليا، وكمان هنضيف معاهم ربع معلقة صغيرة ملح.
5.
بعد كده هنبدأ نقلب كل
المكونات اللي ضيفناها دي مع خليط السمنة والسكر ونعجنهم كويس جدا بأدينا، وطبعا هنستمر
شوية في العجن والتقليب بأدينا لحاد ما قوام العجينة يتماسك ويبقى متجانس والعجينة
تبقى متماسكة وناعمة.
6.
هنغطي عجينة الغريبة بأي
كيس وهنخلها التلاجة لمدة متقلش عن 15 دقيقة.
7.
بعد ما نطلع عجينة الغريبة
من التلاجة هنبدأ نقلب العجينة شوية صغيرين بأدينا عشان تفك شوية، وبعد كده هنبدأ
نشكل العجينة بأدينا على شكل كور صغيرة او نصف كرة صغيرة.
8.
وطبعا هنبدأ نرصصها في الصوانى اللي هتدخل الفرن
وكمان ممكن نشكلها بالفول السودانى والمكسرات وأي شوكولاتات للزينة (من عند أي حد
متخصص في بيع مستلزمات الحلويات).
9.
تسوية الغريبة في الفرن
لازم تكون النار فيها هادية عشان الغريبة لازم تاخد وقتها في الفرن، ولازم طبعا
نكون عارفين ان الغريبة لونها مينفعش يتغير في الفرن.
10.
هنظبط الفرن على درجة
حرارة 150 درجة فقط، وهنسيبها براحتها خالص لحاد ما تستوي وأرضية الغريبة تبدأ
تحمر بس.
وبكده نكون وضحنا لكم كل
تفاصيل طريقة عمل البيتي فور وطريقة عمل الغريبة، نتمنى
تجربوهم وتقولولنا على آرائكم في التعليقات، وبأذن الله بعد ما تعملوا طريقة عمل البيتي فور وطريقة عمل الغريبة في البيت
مش هتحتاجو تشتروها من برة ابدا بعد كده.
طبعا لو في عندكم أي استفسارات
او أي أسئلة او أي ملاحظات، وطبعا لو في عندكم أي اكلات عاوزين تعرفوا طريقتها
متترددوش ابدا، واكتبولنا كل آرائكم واستفساراتكم تحت في التعليقات أو ممكن
تبعتوهالنا في رسائل على صفحتنا في الفيس بوك، جربوا طريقة عمل
البيتي فور وطريقة عمل الغريبة بتوعنا، بالف هنا وشفا، ودمتم في صحة💪💪.
اكلات سريعة ممكن
تعجبك:
- اسرار طريقةعمل الكيكة بالشوكولاته.
- طريقة عمل المكرونة بالبشاميل.
- اهم اسرار طريقة الكنافة النابلسية بالتفصيل.
- طريقة عمل اكلة المانتي التركي | اكلات تركية.
- طريقة عمل كريب شاورما الفراخ بكل سهولة.
- طريقة عمل اجنحة الدجاج.
- طريقة عمل البان كيك الاصلي | وصفة البان كيك الأصلية.