حلويات رمضان | أسرار طريقة عمل بلح الشام الاصلية
يا جماعة حلويات رمضان 🌙🌙 لا يعلى عليها ابدًا، طبعا كلنا نفسنا نعرف طريقة عمل بلح الشام 🥖، لان حلويات رمضان دي
بالذات كلنا بنعشقها وبنفضل انها تتعمل في البيت عشان تكون مضمونة ونضيفة ونعرف
نأكل منها براحتنا، عشان كدة قررنا نعملكم كل حلويات رمضان على مدار الشهر الكريم
وبأذن الله في كل مقالة في شهر رمضان هنعمل لكم اكلة من اكلات رمضان او حلويات
رمضان.
وفي المقالة دي هنحاول
نوضح لكم كل تفاصيل وأسرار طريقة عمل بلح الشام لان في ناس كتير جدا سألتنا على
الحلويات دي وكانوا عاوزين والصفة والمقادير بتاعة بلح الشام بالتفصيل، يلا بينا
دلوقتي نخش على طول في مقادير وخطوات طريقة عمل بلح الشام وكمان هنوضحلكم طريقة
عمل شربات (سيرب) حلويات رمضان، اللي ممكن نستخدمه في بلح الشام والزلابيا والقطايف🥟.
مقادير ومكونات بلح الشام:
- كباية دقيق.
- معلقة كبيرة دقيق سميد.
- كباية مية.
- ربع كباية زيت.
- بيضتين.
- ربع معلقة صغيرة ملح.
خطوات طريقة عمل بلح الشام:
الجميل في حلويات رمضان
عموما سواء كانت في طريقة عمل القطايف او طريقة عمل بلح الشام ، انها بتكون سهلة
جدا جدا جدا، الحلويات دي بتبقى بسيطة خالص ومش محتاجة أي مجهود او تكاليف لان كل
مكوناتها وأدوات عملها موجودة على طول في البيت.
1.
اول خطوة هنعملها اننا
هنجيب كل المكونات الجافة (ربع معلقة الملح – كباية الدقيق – معلقة كبيرة دقيق
سميد) هنخلطهم كويس جدا مع بعض.
2.
بعد كدة هنحط كباية
المية على النار ونحط عليها ربع كباية الزيتونسيبهم على النار شوية عشان يسخنوا
والمية والزيت يغلوا على النار.
3.
اول ما المية والزيت
يبدأوا في الغليان هنبدأ نضيف عليهم خليط المكونات الجافة اللي عملناه في الخطوة
الأولى (معلقة النشا – ربع معلقة الملح – كباية الدقيق).
4.
بعد ما نضيف خلطة الدقيق
للمية هنبدأ نقلب الدقيق مع المية باستمرار لحاد ما المية والدقيق يمتزجوا مع بعض
ويكونوا عجينة.
5.
هنقفل النار على طول
ونقلب العجينة شوية عشان تكون متجانسة ومتماسكة، وبعد كده هنسيب العجينة شوية على
جنب عشان تبرد.
6.
اول ما العجينة تبرد
هنبدأ نضيف عليها البيضة الأولى، وهنبدأ نقلب كويس جدا في العجينة والبيضة مع بعض
بالمعلقة، لحاد ما يختلطوا كويس جدا مع بعض.
7.
بعد كده هنضيف البيضة
التانية ونستمر في التقليب كويس جدا لحاد ما العجينة تبقى ناعمة ومتماسكة ومش مكلعة
خالص، وبكدة تكون عجينة بلح الشام جاهزة.
8.
ودلوقتي هنحط الزيت على
النار عشان يسخن، وبعد ما يسخمن هنحط عجينة بلح الشام في قمع بلح الشام ونبدأ ننزل
صوابع بلح الشام في الزيت بالطول اللي محتاجينه.
9.
لازم ناخد بالنا كويس
واحنا بنزل صوابع بلح الشام في الزيت ان الصوابع تكون بعيدة عن بعضها عشان متلزقش
فبعض.
10.
كمان لازم نقلب صوابع
بلح الشام في الزيت عشان تستوي من كل الجوانب ويفضل اننا نكتر الزيت في طاسة القلي،
وياريت نصبر شوية على بلح الشام في الزيت لحاد ما ياخد اللون الذهبي المحمر، وبعد
كده نطلعه ونحطه في الشربات، ونقلبه شوية في الشربات وبعد كده نطلعه ونحطه في طبق
التقديم.
مكونات شربات (سيرب) بلح الشام والزلابيا:
- كبايتين سكر أو نصف كيلو سكر (نصف كيس).
- كباية مية كبيرة.
- نصف ليمونة.
طريقة عمل شربات (سيرب) بلح الشام والزلابية:
1.
في الأول هنحط كباية
المية في حلة معدن صغيرة، وبعد كده هنضيف عليها مبايتين السكر.
2.
هنولع البوتاجاز على نار
متوسطة، وبعد كده هنحط الحلة على النار ونسيبها سوية لحاد ما المية تبدأ تغلي،
وطبعا في الخطوة دي يفضل اننا منقليش السكر والمية، ولو هنقلب نقلب بالراحة خالص.
3.
اول ما المية تبدأ في
الغليان هنبدأ نقلب المية مع السكر بالراحة عشان الشربات (السيرب) ميسكرش مننا.
4.
اول ما السكر يذوب في
المية بالكامل ويتحول لشربات والمية تاخد اللون الذهبي، هنضيف عليه عصره نصف
الليمونة وبعد كده نقلبهم مع بعض وبكدة يكون الشربات او (السيرب) جاهز لبلح الشام
أو الزلابيا.
ملحوظة مهمة:1. لو حبينا نعمل كمية أكبر ممكن نضاعف المقادير اللي استخدمناها في الوصفة دي عشان كل حاجة تطلع مظبوطة معانا. 2. ممكن قبل ما نقدم بلح الشام ناخد شوية منه على جنب ونفتحهم من النصف بالسكينة، وبعد كده نضيف جواهم قشطة الحلويات او كريم شانتيه، وكمان ممكن نضيف عليه شوية مكسرات وفول سوداني.
نتمنى نكون وضحنا لكم
طريقة عمل بلح الشام بكل التفاصيل اللي محتاجينها، وبأذن الله تعملوا وصفة بلح
الشام بتاعتنا وتعجبكم وترفع رأسكم في عزومات رمضان.
طبعا لو في عندكم أي استفسار
او أي حاجة مش واضحة ولو في عندكم أي اكلات عاوزين تعرفوا طريقتها متترددوش ابدًا،
وابعتولنا استفساراتكم في رسايل على صفحة الفيسبوك بتاعتنا، او ممكن تسيبولنا اسألتكم تحت في التعليقات 👇👇 واحنا هنرد
عليكم في أسرع وقت، جربوا طريقة عمل بلح الشام بتاعتنا، بالف هنا وشفا، ودمتم في صحة
💪💪.
اكلات جديدة ممكن تعجبك:
- طريقة عمل الفراخ الصينى.
- طريقة عمل فراخ ستربس.
- طريقة عمل الكنافة النابلسية.
- طريقة عمل العجة التركية.
- طريقة عمل البان كيك | البان كيك الأصلي.
- طريقة عمل الكيكة بالشوكلاته.