حلويات رمضان | طريقة عمل عجينة القطايف وطريقة تحضيرها في البيت

مين فينا مش بيحب حلويات رمضان 🌙، طبعا كلنا بنستنا المدفع يضرب بفارغ الصبر عشان نبدأ نأكل في حلويات رمضان وخصوصا القطايف🥟 والكنافة🥮، عشان كده حبينا نوضح لكم المرة دي طريقة عمل عجينة القطايف وطريقة تحضيرها في البيت عشان نعملها في البيت بكل سهولة ونوفر على نفسنا فلوس كتير وكمان عشان حلويات رمضان السنة دي تكون مضمونة وكمان طعمها أحلي بكتير، ودلوقتي يلا بينا نشوف طريقة عمل عجينة القطايف ومكوناتها، وبعد كده نشوف طريقة عمل عجينة الكنافة وكمان مكوناتها.

مكونات عجينة القطايف

كوبين دقيق.
كوبين أو كوبين الا ربع مية دافية.
معلقة صغيرة لبن بودرة.
معلقة صغيرة سكر.
معلقة صغيرة خميرة فورية.

خطوات طريقة عمل عجينة القطايف:

قبل ما ندخل في خطوات طريقة عمل عجينة القطايف، لازم نعرف انها خطوات سهلة جدا وممكن أي حد يعملها لانها خطوات واضحة وبسيطة.

1. اول خطوة هنجيب كل المكونات اللي ذكرناها فوق دي 👆👆، وهنبدأ نضربهم في الخلاط كويس جدا مع بعض عشان الدقيق ميكلكعش في العجينة.

2. بعد ما نضرب كل مكونات عجينة القطايف في الخلاط، هنغطي عليها ونسيبها على جنب شوية لمدة منقلش عن 30 دقيقة عشان ترتاح شوية وكمان تخمر.

3. بعد مرور 30 دقيقة هنبدأ نجيب عجينة القطايف اللي جهزناها ونحطها في شفشق ولازم الشفسق يكون ليه بوز عشان ساعدنا واحنا بنجهز القطايف على النار.

4. بعد كده هنجيب طاسة تيفال او طاس جرانيت او أي طاسة مصنوعة من مواد غير لاصقة عشان عجينة القطايف متلزقش فيها.

5. هنحط الطاسة على نار متوسطة، وكمان هندهنها بنقطة زيت واحدة قبل ما ننزل فيها العجينة، وبعد كده هنبدأ ننزل العجينة في الطاسة بالراحة، ونعملها بالحجم اللي احنا محتاجينه.

6. بعد ما نحط عجينة القطايف في الطاسة ونسيبها شوية هنلاحظ ان وش العجينة بدأ يتكون عليه فقاعات، اول ما الفقاعات تملا كل سطح العجينة يكون كده عجينة القطايف جهزت، هنسيلها من على النار ونحطها في صينية خارجية لحاد ما نيجي نحشيها او نستعملها.

خطوات طريقة حشو وتجهيز الطايف للأكل:

في طرق كتيرة جدا لحشو القطايف وتجهيزها، لان في ناس بتعمل قطايف كبيرة وفي ناس بتحب تعملها صغيرة، وبالنسبة للحشو، فالقطايف بتتحشا حاجات كثير جدا زي الفول السوداني وجوز الهند والزبيب، وفي ناس بتحب تحط في القطايف مكسرات، وناس تانيين بيحبوا يحطوا فيها جبنة موتزاريلا بيكون طعمها جميل جدا، وممكن كمان نحشيها قشطة وتمر طري.

1. كل اللي هنعمله اننا هنحط الحشو فوق عجينة القطايف ونبدأ نقفلها بالراحة بالشكل ده 👇👇، ولازم نخلي بالنا واحنا بنحشي القطايف منكترش الحشو عشان نقدر نقفل القطايف ومتتفتحش مننا واحنا بنقليها وتطلع الحشو.

2. بعد ما حشينا عجينة هنبدأ نقلي القطايف، كل اللي هنعمله اننا هنحط الزيت على النار عشان يسخن، وبعد ما يسخن هننزل فيه القطايف واحدة واحدة بالراحة ونقلب القطايف على الوشين عشان تستوي من كل ناحية،وأول ما تستوي هنطلعها، ونسيبها على نب شوية لحاد ما تبرد

3. بعد كده هنكون مجهزين شربات القطايف، وأول ما القطايف تبرد شوية هنبدأ ننزلها في الشربات عشان نشرب الشربات وتبقى مسكرة، وبكده تكون القطايف جاهزة للتقديم.

وبكده نكون وضحنا لكم طريقة عمل عجينة القطايف وكمان وضحنا لكم طريقة تحضيرها وتجهيزها وحشوها، نتمنى انكم تجربوا طريقة عمل القطايف بتاعتنا وبأذن الله هتعجبكم جدا وهتعجب اولادكم وكل افراد الاسرة وكل سنة وأنتم طيبين وانتظرونا قريب مع حلويات رمضانية جديدة.

وطبعا لو في عندكم أي استفسارات او أي حاجة مش واضحة في طريقة عمل عجينة القطايف او طريقة حشوها، وكمان لو في عندكم وصفات اكل عاوزكين تعرفوا طريقتها متترددوش ابدأ وابعتولنا استفساراتكم وأسماء الاكلات اللي عاوزين تعرفوها في رسالة على صفحة الفيس بوك او ممكن تسيبولنا استفساراتكم تحت في التعليقات، جربوا القطابف هتعجبكم جدا بألف هنا وشفا ودمتم في صحة 💪💪.

أكلات جديدة ممكن تعجبكم:

طريقة عملفراخ ستربس مقرمشة.

طريقة عمل البان كيك الأصلي/ وصفة البان كيك الأصلية.

طريقة عمل العجةالتركية.

طريقة عمل الكنافةالنابلسية.

طريقة عملالكيكة بالشوكولاته.

طريقه عملالمانتيالتركي.