طريقه عمل المكرونه بالوايت صوص عندنا وبس

طريقه عمل المكرونه بالوايت صوص عندنا وبس

المرادي هنقدملكوا أجمل وأطعم وصفه، طريقه عمل المكرونه بالوايت صوص في الفرن، حاجة كده لكل عشاق الاكل والكل بيحبها وخصوصا الأطفال والشباب يعني الاكلة دي جاية علي هواهم جدا، وكمان هتبقا احلي لو قدمناها في عزومة باه صدقونا الاكلة دي مش هتخذلكم ابدا، ويا سلام باه لو قدمنا جمبها شوية شوربة ماشروم هتبقي وجبة خطيرة جدا وهتعجب الكبير والصغير وفي المقالة دي باه هنقولكم علي اسهل طريقة تعملوا بيها طاجن مكرونة بالوايت صوص.

يلا بينا نعمل الطاجن المكرونة بالوايت صوص في الفرن واحده واحده.

مقادير ومكونات المكرونة بالوايت صوص:

• 2 شريحة من صدور الفراخ مخلية.
• ربع كيلو مكرونة.
• 1 حبة بصل مقطعة إلي أجزاء صغيرة.
• 1 فص ثوم مفروم.
• 2 كوب جبن شيدر مقطع إلي شرائح.
• 1 كوب جبن موزيلا مبشوره.

مقادير الصوص الأبيض ( الوايت صوص ):

• 3 ملعقة صغيرة زبد.
• 3 ملعقة صغيرة دقيق أبيض.
• كوبايتين لبن.
• 1 كوب جبن شيدر مقطع إلى شرائح.

خطوات طريقه عمل المكرونه بالوايت صوص:

طريقه عمل الفراخ:

1. هنجيب طاسه وتكون تيفال عشان ميلز قش فيها أي حاجه ونحط ملعقة الزبدة ونسيبها على نار هاديه لحد لما تسيح.

2. نضيف صدور الدجاج في الطاسة، ونقلبها في الزبد لحد لما تتشوح ويتحول لونها للون البني.

3. بعد كده هنجيب وعاء كبير او حلة كبيرة ونضيف فيه المكرونة ونغطيها بالمية ونضيف عليها القليل من الملح، ونسيبها على النار لحد ما تتسلق نص سالقة وياريت منسيبهاش وقت كبير عشان متستويش اوى.

4. بعد ما تتسلق نرفع المكرونة من على النار ونغسلها بالمايه البارده ونسيبها في مصفاة لحد لما تتصفى كويس.

5. بعد كده هنجيب طاسة نضيف فيها الزيت ونسيبه يسخن على النار وبعد كده نضيف البصل والثوم ونقلب لحد ما يتحول لونهم للون الأصفر.

6. بعد كده هننزل فيها صدور الفراخ اللي شوحناها عشان تتبل وتاخد الطعم من البصل والثوم.

طريقة تحضير الوايت صوص:1. هنجيب وعاء ونضيف فيه الزبدة ونسيبه على نار هادية لحد لما يسيح بعد كده نضيف الدقيق ونقلب لمدة دقيقتين حتى يتحول لون الدقيق للون الأصفر ويتجمع مع بعضه على هيئة كتل.

2. علي طول هنضيف اللبن لخليط الدقيق مع التقليب المستمر لحد لما نوصل لقوام الصوص الثقيل السائل.

3. بعد كده نضيف 1 كوب من الجبن الشيدر للخليط الصوص الأبيض التقيل، ونسيبه لحد لما الجبنه تذوب تماما.

طريقه التحضير الاخيره:

1. نجيب المكرونة اللي سلقناها وسيبناها تتصفا ونخلطها مع صدور الفراخ اللي عملناها فوق ونقلبهم شويه على نار هاديه ونطفي عليهم.

2. هنضيف عليهم الصوص الأبيض مع التقليب.

3. بعد كده هنحط خليط المكرونة بالصوص الأبيض في الطاجن بس قبلها ندهن الطاجن من جوه بالزبدة وندخله الفرن، ونضيف على الوش كوب من الشيدر وكوب من الموتزاريلا.

4. ندخل صينية المكرونة بالوايت صوص الفرن لمدة 20 دقيقة لحد ما يتحول لونها للذهبي.

وتكون كده خلصت معانا المكرونة بالوايت صوص والفراخ، بعد ما تطلع من الفرن نقوم بتقطيع المكرونة بالوايت صوص والفراخ ونقدمها في اطباق وبأذن الله نوعدكم انها هتعجب الكل، وسر نجاحها معاكوا في وقت سلق المكرونة ياريت متسلقهاش اووي تكون نص سلق عشان لسه هتدخل الفرن وبردوا عشان متلزقش ف الطاجن وهيبقا شكلها مش كويس، اما فوايدها باه فهي كتيره ده غير ان كل الأطفال والشباب بيحبوها وبيطلبوها كتير منك وكمان مفيدة لمرضي السكر لأنها تخفض مستوى السكر في الدم وتضبطه، وبتحسسك بالشبع لوقت كبير جدا.

 وبكده نكون وضحنالكم طريقة عمل طاجن المكرونة بالوايت صوص والفراخ جميلة جدا، وان شاء الله هتعجب الكبار والصغيرين، والطريقه بتاعتنا احلي طريقة ممكن تعملو بيها في أي وقت وفي أي عزومه، لانها سهلة وبسيطة وكل مكوناتها متوفرة على طول في كل بيت، ولو في أي حاجة مش واضحة في طريقة عمل طاجن المكرونه بالوايت صوص والفراخ متترددوش ابدا وسيبولنا استفساراتكم واسالتكم تحت في التعليقات 👇👇.

ولو في عندكم أي اكلة غريبة ومش عارفين تعملوها ونفسكو تعرفو بتتعمل ازاي سيبلنا اسمها تحت في التعليقات واحنا هنعرفكم طريقتها في أسرع وقت، جربوا طاجن المكرونة بالوايت صوص والفراخ بتاعتنا باذن الله هتعجبكم بالهنا والشفا، ودمتم في صحة💪💪.

اكلات ممكن تعجبك:

• طريقة عمل الفراخ الصينى.
• طريقة عمل فراخ ستربس.
• طريقة عمل الكنافة النابلسية.
• طريقة عمل العجة التركية.
• طريقة عمل البان كيك | البان كيك الأصلي.
• اصابع البطاطس الهندية المقلية المقرمشة.